Alashara

13.07.2012Ö
Адуней абаза-апсыуа адкIылара «Алашара» йахъыцIуа асквш йазынархата

ХIара йгIважвизакIхауа асквшышв апны хIбзазитI. Апсахра цIолаква швабыж йщардапI: аиндустриализация, аурбанизация, аглобализация. Арат апсахраква хIара хIреспублика хвыц йачвыхъарата йазхъвыцуагьи даъазапI. Ауаса хIаргьи хIугIапI, хIъабзазалакIгьи арат апсахраква гIахIхьымсуата йгьхIыгIвсуашым. РахIагьи ари аъаща зылсуа КIавкIаз шта йтабзазауа зпхьадзара мачIу аугIахъаква ракIвпI: сквшвышвпхьадзарала йщаквгылыз рцIасква, рхабзаква, рбзазара аргIапсща агьиква йрызарархитI. Ари апш аъаща рыцIагьи йзрыцIолауата йгIаншауа ари акIвпI: зцришта йтыцIта Россия акъала дуква, йапшым ашта хъараква йыртанагауа чкIвынргIа ругIахъара рчвыдзитI, апхъала йщаквгылаз абанпараква разазаъащаква шIчIвитI, ругIахъа культура ацIасква, ахабзаква йырчвыхъарахитI, йгврыдзгадзахугьи – рцри бызшва рхъаштылхитI. Йара акIвпIта, аугIахъара йадамыгъа хъаду абызшва акIвпI. Араса зызнийуа аугIахъа рпхьадзарала ймачIызтын ауыс йауацIыхта ауатыкв йгIаталитI.

from ALASHARA on Vimeo.

Адуней апсуа-абаза адкIылара «Алашара» апны йынхаквауа йшырпхьадзауала, ари аъаща гврыдзга гIашIаукIырныс, щтахьла йгIацауырпахныс ахъазла ужвыгьи йыгькIьасам. Ауи акIвпI «Алашара» адкIылара йхъаду ахачIвква йызрыларпхьадзауа апсуакви абазакви ругIахъа культура агIахчари атшауацIнарыхри руыс, ауат рбзазара адуней апны йщаквгылыз аъаща йаквыргIапста тшауацIнахныс. Абарат ауысква абзазара йаларыжьныс ахъазла араъа «Евразия апны зпхьадзара мачIу аугIахъаква ркультура» – хIва йзхьзу апроект лырхтI. Апроект унашва ахъызцIауа Егьзакь Муса дгIвычIвгIвыс нардзапI, дпрофессорпI, дахIвра зму дхIаракьатчпагIвпI, анаукаква р-Дуней академия далапI, хвитра абакIра спортквпшыралагьи дмастерпI, аугIахъа уысква йгьи ахIаракьатчпара гIаджвыквцIараква йырзынарху апроектква дырспонсорпI. Ауи йшихIвауала, адкIылара йлырхыз апроект гIамта ду гIацIанакIитI, наука рхъвыхра йгьи арыпхьара нархара амапI, хъвшара щардала йахъыхацIыхпI, Евразия йтабзазауа зпхьадзара мачIу аугIахъаква ркультура атшауацIнарыхра йазынхауа амальква рнахвра йазалхпI.

А-Дуней апсуа-абаза адкIылара «Алашара» ахьыз урышв бызшвала «свет» – хIва йгIаныцIитI. Ари адкIылара шIаркIвапI. СквшыкI акIвпI йцIуа ауи гIаншищтара. Ауаса ажвлара рыхъаз магIны ду зму уыс щарда архъйахьатI. Ауат ауысква абазакви апсуакви ртурых, ркультура тынха ргIахчара, ргIащаквыргылхра, ртшауацIнарыхра йырзынархан.

АугIа ргвы йгIатахаз гIаджвыквцIара бзита йгIаншатI «Асквш абаза ашва» – хIва йзхьзу анкъвакъвра. УахьчIва йъагIадзазгьи ауи апроект зшIуырпшуаш закIгьи гьаъам хIреспублика апны.

«Алашара» анхара зтагылу аджыпха апны абазакви апсуакви ругIахъа культураква ргIахчари рырхъвыхри апны наука дырра щата ъаму лкIгIара дупI.
АдкIылара аунашвачпагIвчва ари анхара йагIарбагахара атахъыта йырпхьадзитI адуней апны абазакви апсуакви рыхьыз бзирала йгауата йаъазланыс, аугIахъаква айгвара рызбжьата йащтаныкъваныс, йбзазаныс йырзынарху ауысквала акъральыгIва уыснкъвгартаква йрыцынханыс.

РыцIа йхъаду мурадта «Алашара» адкIылара апахь йаргылуа аугIа цхърагIара рзыгIаныршара акIвпI: абзазара уысква рпны йгвышхваныс, абзира рзыбауата йаъазланыс, рдырра йаладырхIаныс, чкIвынргIа тшырзадкIылуа, ацIаскви ахабзакви рдыруа, ругIахъара тшдырра йалахIауа, рхъа аладухауа йбзазаныс ахъазла.

Батчаева Мадина,
«Къарча-Черкес» телерадиуа компания дакорреспондентпI.
АгIвыра «Абаза къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki