Alashara

08.08.2012
«Сгвы пшыхьта йтасйа!» – араса сгвы йгIанагхтI хIанйара амщтахь. Абараса дзачIвызлакIгьи йгвы ашваква йдрылашарауа щымтала хIгIашIыхалазарквын хIбзазара шпацарыз? ЙкъагIауа ацIлауатра йапшхушзарын, амара акIкIара йгIанарылашарауа, ауаъа ахIврапшдзаква швтуа… Ауаса гьакIвымма амакъым пшдза абжьы алахIвара пшдзаква шгIанарыцIсуа, йалкIгIата уцри абаза бызшвала йанбыжьгауа?..


Ныр Надежда Къвбина кыт апны дйытI, анахьанат акыт хIвсысаква рапшта дгIадзынгылтI. ЦIабыргыта, драпшдзамханысгьи ауаштI. Ауи акIьанджьква ауи аъара дгьхъырымхуазтI, йлыгIвзачвахаз агвла чкIвынчваква ракIвын. Ауат злагIалайхIвапсузгьи закI лылан. УшпалмайхIвапсуш апхIвыспачкIвын йылквнаумыргушта айха гьажьы рыцIа хъарата йанылзаущтуазара, нагIвгIагIврала ачкIвынчваква данрапхъанысуазара, ахысра апны пхьадзара 50 йрыуата 45 анылзагIатырцуазара!

Апхьарта дангIалга Надя Ставрополь йтагылу ахвгIахвтра техникум дыцIалтI, асквш 1968 дгIалгатI. Аистория факультет апхьара лгвы йштаз йгIатахатI, йгьгIалдамыхIвтI.

Надя лаба ПIаз Рауф аугIа ршIалахIвара бзита йдыруан, ауи йакIвпI абазаква ртурыхгьи рапхъанчIви бзазара йапщылаз зымгIвагьи бзи йылзырбаз. Лан Льальа лыбызшвала дармельызтIхIва абаза бызшва цкьата далачважвун, цIбакIгьи лыцIуымбушта хIугIахъа цIасква лзынардзун.

Надя апхьарта даныцIаркIвазгьи йдучвам агIвыраква абаза газет аредакция апны йылщтилун, сквшы жвабапхьадзара анцIра амщтахь ауи алахIвара аталзгIашIыцхушта йгьлымдыруазтI.

Атехникум дангIалга унагIва далалын йащтагIайуаз асквшква асабиква ргIадзныргылра йазыналырхатI. Асквш 1985 йгIашIарышвта ткванкI апны атичIвпкъыгIваква руыс анлыргIалуа дынхун. Асквш 1994 агIан «Надежда» – хIва йахьызта лхъатачIв ткванква радкIылара гIанлыршатI. РахIа йбаргвыз асквшква рагIан йпхIвыс уысым хъаталкIыта айрышта, джьгарта йъалзынардзуз щардагIвы йджьарщун.

Асквш 2008 агIан «Асквш абаза ашва» анкъвакъвра джвыквылтI. Надя дыздыруаз пхIвыспакI ашвакI лзалалцIаныс дгIалыхIватI. Ауи захваракI алан: ажваква аквлыршвауата йапшым ауарадква йшрыцылхIвалауа щардагIвы гвы артхьан. Йуан ГIальиса йуыса «Мамаду» макъым азыгIанлыршатI. Абараса йгIаншатI Квырджь Мадина йапхъахауата йылхIваз ашва. Ауи йащтагIайыз ашваква зымгIвагьи лара лажваквала йалалцIатI. Апхъапхъа зымгIвагьи йджьарщун ауат рапш ашва пшдза анотаква лымдыруата, музыка ъамапсымакIгьи дамсуата йшылзалацIуз. Ауи цIабыргыпI, ауаса хIапхъанчIвиквагьи амакъымкви ашвакви шгIандыршуз йара ауаса акIвзарын.

УахьчIвала Надя ашвата 30 раъара гIанлыршахьатI. Ауи ауысла йгIалцхърагIауа Китов Тимури Аджьбакь Динари дшырзыразу лхIвитI. Ауат ракIвпI лакъыльпшгIара йгIанарыцIсуа ажвакви амакъымкви гIазкIыта йшатахъу апш йанзыргIалхуа.

Ашва текстква абзазара йгIаннаршитI. Абар дъанхауа аткван чкIвынкIи пхIвыспакIи нашылитI, ачкIвын аморож квпшыраква алихуа апхIвыспа йлйырбитI, ауаса лгвы дгьнадзум. Ауи атшын Надя «БачIвытагьи айрышйа» – хIва йахьызта уарад алалцIатI. Ауи ЧIвачIв Алина йылхIвитI. Ауи йащтагIайтI ашваква «БызчIвуда бара?», «Сара с-Абазашта», «Йайшысу амгIващла усызгIай», датшагьи. Ауищтара ашвалацIара лбзазарахатI. «Ашваква зымгIва абаза бызшвапI йызлаласцIауа, ауаса акIвпI йшаъазлуш», – лхIвитI Надежда. ХъачвамщаракI гIанылщтуата гьакIвым, ахIбачва ртынха тшауацIнарыхра атахъыта йылпхьадзитI.

Надежда армель бызшвагьи бзита йылдыритI, пIатIу рыквылцIитI армельква рцIасква, ругIахъа фачIвква ррыхIазырра дазгIашыкъпI. Абаза фачIвквагьи армель угIахъа фачIвквквагьи алалпсауамцара дъамацIауа лтгIачва йгьджьарщахуам.

Ауаса лашваква ргара йтата пшкадза йылрыцIсуа Абазашта Ныр Надежда йгьилхьыгIапI, йгьилбзибарапI.

Ешерова Муъминат
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki