Library

МартI а 4 атшын «Алашара» адкIылара аунашвачпагIвчва агIвымакъральква руысла Россия а-Министр йынйара йалазларныс йдрайгватI. Анйара агIвымакъральква йырпщылата МИД йрыцынхауа ажвлара организацияква ргIащтийыгIвчва алан.

ЙгIачважвара апны Лавров С.В. араса йхIватI: «ХIара хIацынхара амагIны шдуу ауралагьи йхIхIвитI, ауи рыцIа-рыцIа штшауацIнахуаш амальква нахIахвитI. УахьчIва хIбзазара аъащагьи ауи апш ащтаныкъвара хIаквгIазшIнатитI. ХIацынхара арыбагъьара йазынархапI асквш 2012 май а 7 агIан а-Президент Путин В.В. мачвы зцIайцIаз ащаквыргылрагьи. Ащаквыргылра йшгIанахIвауала, агIвымакъральква руысла ажвлара рыцынхара, ауат ауи аполитика нархара зму айззараква, афорумква, айчважвараква йрылалныс йыргвышхвара магIны амапI. А-Президент йщаквыргылра абзазара йалагIыжьныс хIмурадта агIвымакъральква йырзынарху аполитика ауысла Россия Федерация а-Концепция лыхIхтI. Ари ашвъа апынгьи йгIарбапI агIвымакъральква йырзынарху аполитика апны ажвлара организацияква рыцынхарала ахачIвква. ХIанйара йгIаннаршаз амаль гIасрысабапуата сшырзыразу схIваныс стахъыпI хIызлачважвауа а-Концепция апроект адынхалра йацхърагIаз апхьахьаква, ажвлара организацияква, аэкспертква.

Адуней акъральква йгIарбжьашвауа аквыргъвгъвараква йрылахIитI, разазаъащаква руысла йгIаншауа апсахраква атурых апны зыщтаква гIанхауа цIыхъватшара ду рпщылапI. Ауат азазаъащаква апхъахьыла йшщаквгылуашла гвынгIвыра гьаъам, кьангьаш гIауылазцIауа щардапI. Ауи ахIатырла агIвымакъраль уысква йрылу ажвлара организацияква рхъвыцща магIны амата йхIпхьадзитI. Ауи гIальаматра ду азыгIбитI. Ужвы адуней акъральква разазаъащаква рпны Россия Федерация агыларта аквыргъвгъвараква йрылнардзгIитI. Ари ахъгалра хIара-хIара хIхъа йгьаквхIцIум, айчважвараква рпны хIзынйауа агIвымакъраль гIащтийыгIвчва ракIвпI йызхIвауа, йалкIгIата «агIарып гIапны» агIаншараква рымщтахь».

ЙцIыхъвахауа асквшква руацIа «Алашара» адкIылара Йорданшта йауу а-Черкес гвчIагIв жвлара, Йордан хашимит паштахIыгIва апны Россотрудничества аунашвачпарта, Трыквшта йауу а-Дуней абаза-апсыуа жвлара, датшагьи къральквакI рпны йаныргIалу адуней жвлараква йрыцынхауата гIвымакъраль нархара зму уыс щарда дырхъйитI.

Йхъатала Лавров С.В. данйынйа «Алашара» адкIылара апрезидент Егьзакь Муса йшгIаликIгIазла, рынхара анархара хъадаква йрыуапI агIвымакъральква йырту хIхаквлагIвчва йырпщылу ауысква рахъвдаквыщтра, ауаса агIвымакъральква рпны «Алашара» рынхара шадыргалуа Россия акъральыгIва гIальаматраква йрызгылата акIвпI.

Асквш 2013 мартI а 11 атшын «Алашара» апрезидент Егьзакь Муса ХIабальа йыхьызла агIвымакъральква руысла Россия Федерация а-Министерства йгIарщтийыз аразыра сальамшвъа араса йаныпI: «Швабыж хIразыта йгIалхIкIгIитI МИД йгьи швара швыжвлара гвынгIвыра рызбжьата йшацынхауа, ари ацынхара агIвымакъраль уысква рпны Россия агIальаматраква ртшауацIыхра йшацхърагIауа».

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki