Library

Май а 25 Черкесск ареспублика драма театр апны Къарча-Черкес республикала гIатгара зму артист, Абаза драма театр аунашвачпагIв КIьыщмахва Умар Йараджьыб йпа йхъыцIыз асквш 60 йадахIвуата айззара ду акIвшатI. Аюбиляр йайхIвахIвтI акъральыгIва уыснкъвгагIвчва, Къабард-Балкъар, Ставрополь шта йгIартыцIыз агвыпква, ажвлара ргIащтийыгIвчва, йынбжьагIвчва, йъахIыльчва. Ахъвлапын ауи йынхара-бзазара йгIаквчважвауа афильм суратквала йгIалагатI.

Асцена йгIахвынгылуаз дзачIвызлакIгьи Умар йайхIвуата абаза уагIахъа ркультура атшауацIнарыхра ахъазла йалайцIауа йгIапсара, йамайчра хвы аквырцIауата йгIачважватI.

«Умар ГИТИС данапхьуз атлахан абаза театр агIаныршара йгвы йгIаташвахьан, – йгIайгвалашвахитI йынбжьагIв, йыцапхьаз, Балкъар театр агвацчпа унашвачпагIв Атмурзаев МхIамат Маджьид йпа. – Абар хIызту асквшышв агIаталымта ауи йгвала абзазара йахъвхан йаргьи дамайчуата, йылшауа закIгьи гIанимжьуата ауыс шагъьичIвуаш дащтапI. Сара Умар йюбилейла сйайхIвитI, абаза уагIахъа ари апш патриот дъагIарылцIыз анысла сныхIвитI».
Умар атеатр унашва ахъицIауа йахъазымкIва асцена апны атурасквалагьи дгIахъвмаритI. СынчIва агIапын мшква рагIан Абаза театр апшыгIвчва спектакль шIыц рыздыргылтI – Мурат Чапай йспектакль «Ахъгалра алыгква» абаза бызшвала йатакIта. Йхъаду атурасыла КIьыщмахва Умар дгIахъвмаритI.
Аурышв драма йгьи комедрия театр аунашвачпагIв Биджиев Хасан Россия атеатр нхагIвчва р-АдкIылара апредседатель, йбергьльу артист Калягин Александр йгIайщтийыз ахIвахIвра телеграмма зымгIвагьи ахайыргIвазатI.
Черкесск апны йаныргIалу «Алашара» адкIылра ахъвшара аунашвачпагIв Мыхц Рамазан Умар Йараджьып йпа араса тшизынайырхатI: «Оноре де Бальзак йшихIвазла, аршIыйара ауагIа рчгIвыча квпшыра йагIвызапI. АршIыйара йадынхалуа агIвычIвгIвыс анур лашараква йхъагылапI. Ауи ахIатырла, КIьыщмахва Умар уахьчIвала йылшата йчпахьу анцIрала абаза уагIахъа ртурых йгIалахуштI. КIьыщмахва Умар анцIрала ауагIа йрыцбзазауа аршIыйара данхагIвыпI».

Айззара апны йгIачважвакваз йшгIалыркIгIазла, Абаза театр анхара чкIвынргIа патриотта, руагIахъа рпхыцIа ргвы азыцхIауата, рцри бызшва бзи йырбауата йгIадзныргылра йазынархапI.
Ахъвлапын ргIахъвмаррала йдрыпшдзатI Россияла гIатгара зму артист ГIват ХIвсин, Россияла, Къвбинаштала гIатгара зму артист Луценко Лидия, Къарча-Черкесла гIатгара зму артист Напщ Аминат, «Абазинка» ашвахIвагIвчва, «Абазгьква» гвып, Меремкъвыль Ачар, Аракай Артур, Чамба Нателла. «Ридада» гIахIвыгIвчва сабиква асцена йангIаквыл заджвгьи гвалымста дгьгIанырымыжьтI.
Айззара алгауата йара дызпрезиденту КIьыщмахваргIа рткъвым йауу гвыпкI асцена йхъалын Умар Йараджьыб йпа йгIайайхIвахIвтI. Къабард-Балкъар йгIатыцIыз агвып КIьыщмахваргIа гIазлыцIыз БерзакьыргIа ргIащтийыгIвчвагьи рылан.
КIьыщмахва Умар ажва анйырт айззара йгIадгылыз зымгIва тшырзынайырхан дшырзыразу йхIватI, ажва пхата, ажва гвапата йзырхIваз ахъазла квырмыш ду рзичпатI.

Бежан ГIайщат,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki