Library

«Къарча-Черкес» телерадиуакомпания арадиуа амузыка архив йаланакIитI жвасквшапхьадзара руацIа йанырцIаз ашваква. Зъара йнадзауайа КIавкIаз ауагIахъаква рпхыцIа йгIаквчважвауа ауат ашваква! Абари абайара шабгу уахьчIвала Наша Карина дахьпшитI. Ауи лакIвпI архив абыжьгIвыраква уыжвгIанчIви амальла йгIазыршIыцхуа.


Зсабихъа йгIашIарышвта ашвахIвара бзи йызбауа, амузыка апхьарта йгIалгаз апхIвыспачкIвын лыхъазла ари ауыс адгылща агIаура гьбаргвымызтI. Ауаса архив адынхалра гьмайрам, йалкIгIата ашваква Къарча-Черкес йтабзазауа ауагIахъаква рыхвбызшвакIла йшанырцIуз уаназхъвыцра. Архив агIаршIыцхра сквшпхьадзара шатахъхуш гвынгIвырапI.
Абаза бызшвала архив ахъвшара Карина рыцIа дсакъуата дазыъапI. Ауи лыхъазла ауат ахъаз йгьашвагIвацам – лпсы йахъвыпI, луагIахъа турых йауапI. Ерыжв Зули, Цекъва Зарыльа, Йуан Муса йанырцIаз амакъымкви ашвакви шIырпшыра змам байара дупI, адырра цIолакви абаза уагIахъа ртурых анапакви йыргIалцIыртапI.
Наша Карина йшылхIвауала, ари ауысгьи йуылауымхIвакIва йамуаш лкIгIара амапI. УангIапсара, амакъымгьи хъарачIвыла йгIагауазшва йангIаугвыквыгIвуа анхара ашIарысымкIва амаль гьамам, мачIкI тшанпсущара ауыс атагIаджвыквуцIахитI. Абараса акIвпI макъымипхьадза йгIаныцIуа, ауагIахъа турыхи акультури рыхъазла амагIны шдуу шуылаукIуа.
Наша Карина уыста йлырхъйауа архив агIаршIыцхра йгьахъазым. СквшыкI цIитIта ателебара асайт гIанлыршауата дадынхалитI. Асайт анхIазырхара дзачIвызлакIгьи йанакIвызлакIгьи зынзаман аэфир йталыз атраква дырпшыхныс йылшуштI. Ари ауыс ансимшы шIыцракI шалалцIуш дащтапI. Ага уыс бзи щарда лырхъйазтIхIва, Карина йшылхIвауала, лгвы йнадзауа абзазара уыс дгьадымгылстI. Ауаса лгвы гьылрыдзуам – йзачIв бзазара нархартазлакIгьи апны ууагIахъа ртурых, рыбызшва, ркультура анудыруа ухъатачIв бзазара мгIва лукъьарныс рыцIа ймайрахитI.

Ешерова Муъминат,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki