Library

Сентябрь а 30 хIсайт йгIаквшватI Йорданшта йауу Хэйр ад-Дин Абд аль-Азиза Мыхц Абаза. Ауи Хъвыжвду йатабзазуз йткъвым рылахь шцаз дазцIгIитI. Асайт аредакция ари ауыс йазцIгIауа йалагатI. Йорданшта йауу абаза чкIвын йсальмамшвъа аджьауап гIаквхIцIауата асайт апхьагIвчвагьи ражва шырхIвушла хIгвыгъитI.

Уымш бзита, хвду ззыгIбауа Хэйр ад-Дин Абд аль-Азиза Мыхц Абаза.
Асайт йгIаквхIцIаз усальамшвъа щардагIвы гIальаматра азырбауата йаъапI. УазцIгIараква рджьауап абгата йгьгIахIнапIыцIамшвастI, уахьчIвала йхIзыгIардырыз акIвпI зунашва хIхIвауа.

Аткъвымхьыз «Мхцы» Къарча-Черкес апны йбергьльыпI. Ауи збзира алу йбергьльу абаза уысагIв Мыхц Кьарим йакIвпI. Швабыж йгвасрапI, ауаса ауи адуней йхIваджьхьатI. Ауи йпхIа Мыхц Олеся тшанылзынахIырха усальамшвъа ахабар шылдыруа гIахIалхIвтI, ауаса Мыцх Азиз (ГIазиз) йхабарква гIаллырдырныс гьлылымшастI.

Ахабар шыгIдыруала, Хъвыжвду кыт апны МыхцргIа йрыуата заджвгьи дгьтахым. Ауат асквш 20-ква рагIан ари акыт абзазагIвчва йгIандыршаз агвла ХъвыжвчкIвын кыт апны йщардан, ауысагIв Мыхц Кьаримгьи ауаъа акIвын дъауаз.

Йара ауи акIвпI йхIвауа «Сара с-Хъвжвы» – хIва йахьызта книга гIацIызщтыз ХIвран Алексейгьи. Йкнига апны Хъвыжвдугьи ХъвыжвчкIвынгьи ртурыхква йауацIыхта дгIарыквчважвитI. Усальамшвъа гIальаматра ду азибатI, йуыргылыз азцIгIараква джьауап ззатуаш акыт абзазагIвчва рыхьызква гIахIайхIвтI. Ауат хIрынйата йырхIвауагьи гIахIхIырдыруаштI. Ауи тIакIв уазпшра атахъхуштI.

Хъвыжвду кыт амузей аунашвачпагIв Адзын Земфирагьи тшылзынахIырхатI. Ауи дгIахIцхърагIаныс дхIазырпI, ауаса уара уыхъаз рыцIа щарда лдырра атахъыпI. Уабаду йаба йыхьыз ачIвызйа? Йзапш сквшыйа хIхакв дантыцIх? Уара йшгIауыгIвуала, уабаду КIавкIаз дтыцIта акIвпI. Запш шту рытамамра атахъыпI – Хъвыжвду кыт дтыцIма момкIва датша зджьара дтазма? Аща, ахща аджвырагIв йымазма? Йшубауа апшта, азцIгIараква рыцIа йщардаркIвапI аджьауапква рацкIыс, ауи ахIатырла йащтагIайуа усальамшвъа хIазпшитI, ауат азцIгIараква рджьауапква рныта.

УъахIыльчва ргIаухра апны хIуцхърагIаныс хIылшушта хIгвыгъитI. Ауи гIамта атахъхуштI акIвмызтын. Асайт апхьагIвчва рцхърагIарагьи хIазпшитI. ЗакIы гьазхIвам МыхцргIа дрыуата заджвымзара заджвы ари асальамшвъа дапхьата асайт аредакция йхабар дйырдырныс.

Хвду узызбауа, Квициниа Инна
«Абаза Къраль» сайт йазалху акорреспондент.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki