Library

Абашта ахчагIвчва рхъмаштылра Амш Апсны апны август а 14 атшын йдыртлапIитI. Ари амш афыр хъачва рпсадгьыл йшазцIабыргу, ауи рпсы ацкIыс бзи йшырбауа йырдамыгъапI. Ари атшын ауагIа асквшква 1992-1993 рагIан йакIвшаз Абашта айсра апны зхъа щтIазцIаз айсыгIвчва йырчвахъабагата йдыргылыз асинква йрызцитI, квырмыш рзырчпитI, ахIврапшдзаква рзыщтIарцIитI. СогIвым аквта йгылу а-Мемориал апны ахIврапшдзаква щтIарцIатI айсра аветеранква, Апсны апрезидент Анкваб Александр, авице-президент Логуа Михаил, ажвлара уыснкъвгагIвчва, Абашта айсра агIан йаладзкваз, зпхыцIа бергьльымкIва йгIахънымхIвыхыз айсыгIвчва рцриква. Абашта ахчагIвчва рхъмаштылра Амш артлапIара йалан Лагъь КIавкIаз аштаква йгIартыцIыз агIащтийыгIвчва гвыпква, ауат йрылан айсра аветеранква – зтахъырала айсра йпшцIалта йайсыз ачкIвынчви ауат ръахIыльчви.

Август а 14 атшын рыцхIагIа ду апщылата апсыуа уагIахъа ртурых йгIалахатI. Ари атшын Очамчира район йаланакIуа Баслаху кыт апны айсра йаладзыз хгIвычкIвынчва – Квициниа Валерий, Нарсиа Валерий йгьи Гогиа Резо – рхъмаштылра йазынархата син гIахъыртIытI. АкъральыгIва гимн, аркъвырльыкъвхагIвчва роркестр быжьква гауата акIвпI ауи шгIахъыртIыз. АдиннкъвгагIвчва адин ацIасквала йчпачIву зымгIва надырдзатI, асин йазныхIватI.
Ахъмаштылра айззара гIахъитIуата Очамчира район ахъада Квеквескири Вячеслав Апсны афырква рхъацIари рджьгарри гIаликIгIатI, апсыуа уагIахъа ауат анцIрала ргвы йштазлуш йхIватI. Афырква ранчва гIачважвауата йгIайззаз ауагIа, асин зыргылыз зымгIвагьи йшырзыразу гIархIватI. Араъа йгIачважвакваз зымгIвагьи Абашта айсра апсыуа уагIахъа ртурых апны щта цIола шгIаннажьыз йызнымкIва йаквгIацапахуата йырхIватI. Айсра афырква рыуа дзачIвызлакIгьи йыхьыз Апсны абзазагIвчва адуней йъадзакву зынгьи йгьырхъаштылуашым.

Квициниа Асида,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki