Library

Февраль а 15 атшын Ставрополь апны ЧкIвынргIа йапхъахауа рфорум «Абаза – 26: ахачIвкви агвыгъаракви» акIвшатI. Афорум адызгалыз, йакIвзыршаз Ставрополь край абазаква руагIахъа культура автономия «Абаза» ракIвпI. Ауи анхара йалан Ставрополь аунашвахъцIарта агIащтийыгIвчва, адиннкъвгагIвчва, апхьахьаква, ажвлара уыснкъвгагIвчва, Нарцана йгьи Къарча-Черкес Республика ргIащтийыгIвчва гвыпква.

Афорум Ставрополь край йтабзазауа абазаква р-НКА аунашвачпагIв Чагва Армида Хзыр йпхIа йгIахъылтIытI. Ауи йшылхIвазла, ажвлара ашвъаква асквш 2012 август мыз агIан хабзала йдрыбагъьан угIа 5000-гIв райхIа йнадзауата Ставрополь край йтабзазауа абазаква аднакIылтI. Ажвлара уыс хъадата рпахь йдыргылуа абазаква рыбызшва, ркультура, рхабзаква, рцIасква ргIащаквыжьра акIвпI. ХIуагIахъа руачIвы злащаквгылу йгIадзынгылуа абанпараква ракIвпI, ауи ахIатырла «Абаза» жвлара нархара хъадата йырпхьадзауата асабикви чкIвынргIи йрыдынхалитI.

УадыргIвана ажвлара гIаншищтара йцIуа ацымызкI руацIа нхарата йакIвдыршаз йауацIыхта йаквчважватI. Ставрополь апны абаза бызшва ззырдыруа акласс шгIахъыртIыз рхIватI – мтшашипхьадза асабиква Петова Анфиса дрыдынхалитI. МагIны ду амапI знархараква щардата ажвлара йгIандыршаз аинтернет портал: Джьандар А. йгIацIищтыз «Абаза-урышв айчважвага» тарцIатI, акультура, атурых, афольклор, ауагIахъа фачIвква агьиква йырзынарху ахъвква амапI, ажвлара анхара гIазырбауа авидеоматериалква, асуратква тапI.

Ставрополь авузква рпны йапхьауа чкIвынргIа йазалху атемаквала йгIачважватI: дресс-код ауысла, интернет апны этикет ауысла, кIавкIаз гIахIвраква рпны аэтикет ауысла, датшагьи.

Афорум апны йызлачважваз ауысква йрыуапI акрай ауацIа йъанымгIалуа ашIыпIаква рпны лезгинка агIахIвра акIвдмыршаланыс, аурышвкви анахьанат ауагIахъакви амакIыра гIарбжьамшваланыс. КМВ апны абазаква руагIахъа культура автономия «Абазашта» ргIащтийыгIв ЧвзыкIьа Радик йшипхьадзауала, арат ауысква йгьугIахъа уысым, амакIыра гIалазгауа, хIваспатыхла йайсуа ачкIвынчва чвгьахагIвыпI. Ауат ауысква алзыргара атахъу ахабзахчагIвчва ракIвапI. Ауаса ачкIвынчваква лезгинка йгIахIвуата акробатика ъазара гIадырбузтын ауи гвымхаракIгьи гьгIанырщтуам. Джьмакъвыл Бэла ари ауыс далачважвауата йгIалгвалашвахтI Лондон апны йгIважвижвабахауа апхын Олимпиада акIвшауата хIкъраль рыхьызла йапхъахауа аххьапщ медалькI гIатызгаз КIавкIаз йауу ачемпионква лезгинка йгIахIвуа йаналага зымгIвагьи дута напIы йшырзасуаз.

Афорум анхара а-Дуней абаза-апсуа адкIылара «Алашара» ргIащтийыгIвчвагьи алан: ауи авице-президент Ажьи Зауыр, адкIылара ахъвшараква рунашвачпагIвчва. Ажьи Зауыр «Алашара» адкIылара а-Президент йыхьызла дхIвахIвын йцIыхъвахауа агIамта ауацIа нхарата йакIвдыршауа далачважватI.

Ахъвлапын алгауата афорум йалакваз зымгIвагьи Къарча-Черкес Республика акъральыгIва абаза театр йадыргалыз аспектакль «Хьапщ сагIындакъ» йапшытI, Къарча-Черкес Республикала гIатгара зму артист Напщ Аминат лыршIыйара тшахадыргIвазатI.

Бежан ГIайщат.
Информацияли рхъвыхрали «Алашара» ахъвшара.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki