Library

15.07.2012
Июль а 13 АкъральыгIва абаза драма театр апны апшыгIвчва айззатI. Ари атшын араъа атеатр агIамта хъыргIватI. Ауи анхагIвчва «Атеатри апшыгIвчви» – хIва йахьызта йазалху программа дрыхIазыртI. Апрограмма атеатр аунашвачпагIв КIьыщмахва Умар йакIвйыршун. Арепертуар йаланакIуа аспектакльква ршIчIвараква гIадырбатI. АпшыгIвчва актерква ръазара йатаркIвах йаквшахIатхауата йатарпшхтI ЧквтIу Микаэль йгIвыра «ХIваджьа йтурыхква», КIьыщмахва Умар йгIвыра «АпхIвысква рымшыркъвараква», Щбзыхва Лариса лгIвыраква «Гващагъагъ» йгьи «Акъвышри абзибари рбагъьата» йгIархъыху аргылчIвква. Аспектакльква ракIвымкIва апрограмма дрыпшдзауата араъа йбыжьгатI ашва гвлахIараквагьи.

АкъральыгIва абаза драма театр гIаншищтара щарда гьцIуам, 11 сквша ракIвпI йахъыцIуа. Абаза культура апны ауи агIахътIра гIаншара дута йдыртлапIатI, ауищтара ауи акультура атшауацIнарыхра апны уыс ду архъйитI. Заман айшысла атеатр апны репертуар байа щаквгылтI.

– ЙзапштеатрызлакIгьи анхара жвасквшапхьадзарала йщаквгылитI. УахьчIвала хIара хIтеатр арепертуар 18 спектаклькI алапI. Ауат абаза гIвыраква йырхъазымкIва агIвымакъраль классикквагьи аурышв драматургквагьи ргIвыраква йгIархъыхпI, – йхIвитI атеатр аунашвачпагIв КIьыщмахва Умар. – Араъа швапхата рыхьызква хIхIва йауаштI Чеховгьи Мольергьи. АпшыгIвчва йрымагIальаматхушшва йыгIбауа апьесаква ракIвпI хIара хIыздынхалуа. Ауат апьесаква згвапхауа агIвычIвгIвыс уадыргIванагьи йызнымкIва атеатр дгIайныс гIайтахъхитI, йатаркIвах атеатр ршIыйара йылайхIваныс ахъазла.

Атруппа йалу актерква рщардагIв чкIвынпI, талант ду шрыму гIадырбитI. Ажва гьалам ауат бзазара мгIвата йлырхыз ари ауыс шнадырдзахуаш. ЙшырхIвалауа апшта, асцена апны агIахъвмарра зща йалалуа агIвычIвгIвыс ауи «ъазагIва змам згIвата» йзалитI. ЛгIачважвара апны атеатр ршIыйара абари ахъата даквгIашIастI Къарча-Черкес Республика аугIа рартист, Россия апны гIатгара зму артист Уаз Лильагьи.

– Ага аурышв драма театр апны сынхарыгьи, сара абаза театр ахъазла сгвы цхIитI, ауат рынхара шакIвшауа сапшныс сгIайзапытитI, – лхIвитI Лильа. – УахьчIвала атеатр аршIыйагIвчва нхашата йгIаргуа закIгьи йгьашIысым, ауаса ари ауыс тшадызкIылуа агIвычIвгIвыс файда ду дазыпшгIауата дгьаъам. Абараса зуыс йазыъу агIвычIвгIвыс пIатIу дугьи йыквхIцIара атахъыпI.

Датшагьи сасчва щарда пхата йгIачважватI, атеатр анхагIвчва йрайхIвахIвтI.

«Абазашта» газет аредактор хъада Къвыл Фардауыс абаза бызшва агIахчара ауысла атеатр нхарата йакIвдыршауа гIалылкIгIатI.

КЧР аугIа рартист, Апсны республика апны гIатгара зму артист ЧквтIу Владимир актерква драйхIвахIвуата аспектакльква анакIвшауа апшыгIвчва азал йыгIвнамшвауата йщардаханыс шитахъу йхIватI, ауи актер шIаква аргвышхвауа рдахIвраква йрылахIанысла драйхIвахIвтI. АпшыгIвчва тшырзынайырхауата ауи араса йхIватI:

– ХIара атеатр хIсабиквагьи гIагIдрала атахъыпI, абаза театр рыршIыйара тшахадыргIвазауа, рцри абаза бызшва рахIагьи бзи йднарбауата йгIадзынгылныс ахъазла. Абари ауысла хIара хIпатриотизмгьи хIзыгIарбуштI.

Ари ахъвлапын азал апны чкIвыныргIа йрыуата щардагIв чIван. Абаза чкIвынргIа радкIылара «Шарпны» апредседатель Джьмакъвыл Бэла атеатр адиректоргьи актерквагьи пхата драйхIвахIвтI, руыс йамайчуа, ргвы цхIауата йъанхауа гIалылкIгIауата.

– Сара бзита йсыласхIвитI файда зпщылам ауыс уадынхалныс швабыж йшбаргву, ауаса хIара-хIара хIугIахъа уысква хIмырхъйузтын дзачIвыйа хIзайгвыгъуш, дзачIвыйа ауат хIцынхъвы йызчпуш? – лхIватI Бэла. – ЗугIахъа рыхъазла згвы цхIауа дзачIвызлакIгьи ймурад пшдзаква гIайыдахIвуаштI. Шваргьи швмурад бзиква зымгIва напIыла йшвкIныс швзыстахъпI.

Атеатр агIамта хъыргIватI. Ауаса заманкIла. Адзын ангIаталра атеатр агIамта шIыц гIахъыртыхуаштI, ауи анхагIвчвагьи къару шIыцла руыс йадгылхуаштI, апшыгIвчва лахIвара пшдзала йатадыргвыргъьахныс йащтата.

Квициниа Инна
«Абаза къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki