Library

Асквш 2012 ноябрь а 11 Ставрополь йтабзазауа абазаква рхаквлагIв ахIбадза, аэкономика наукаква рдоктор, апрофессор, акытмлыкврхIара дырраква ракадемия ачлен-корреспондент Йуан ЧагIбан ХIаджьбакьыр йпа сквшы 75 ъайхъыцIуа йадахIвуата ддыртлапIатI.

Йджьаущадзушта йаъу ари акIвпI йпрофессорхаз, йакадемикхаз ачкIвын дгIазлыцIыз атгIачва рпны заджвгьи гIвыра гьйымдыруазтI, йаргьи ужвы йгIадзынгылуа чкIвынргIа рыхъазла ЧагIбан адырра дазгIашыкъта, айрышта йпахь йыргылыз амурад дшазцуз швабыж йшвапха бзипI. Ауыс зквызла, асквш 1937 ноябрь а 5 ЧагIбан дъагIатадрийыз ТIапIанта кыт пщысквшагIваца йъадрыпхьауа апхьартан йтагылаз. Асквш 1949 агIан ауаъа дангIалга йгIашIарышвта ачкIвын апхьара найырдзахныс йтахъыта айтыпара щарда дрынйатI: йхвбахауа акласс Адгьа-ХIабльа дгIалгатI, йцбахауа акласс – Грушка къвтыр апны йджвыквицIан Абаза-ХIабльа апхьартала дцахра атахъхатI, апхьара сквшы алымгаскIва йцри кыт апны йцбахауа акласс гIахъыртIын ауаъа йнайырдзахтI, йбыжьбахауа акласс дапхьара ахъазла Йынджьыгьышхва кыт дцатI, йагIбахауа акласс Эрсакон кыт апхьарта дгIалгатI. ЙцIыхъвахуз агIвысквша Черкесск йтагылу аобласть апхьарта интернат апны дапхьахтI. Ауи апхьарта асквш 1955 агIан рызна медальла дгIалгатI.

ЧагIбан апхьара абари апш азгIашыкъра ъазйыму джьаущушта йгьаъамзарызтI айсра алгагIвацата азаман хIатламзарквныз, атгIачва йыртахъу мачIдзакIла йнахъазарквын, йапхьара злабжула йадгал йауызарквын. Йаба Абашта айсра Ду апны асквш 1943 агIан дырщытI, йаща цригьи йан лыхыгIв айщчвагьи айсра йаладзтI. АчкIвын йани йабадуи дрыгIзачIвхатI. Йабаду йакIвын ЧагIбан йапхьара найырдзаныс даквзыргвышхвуз, агIвыма кытква йыртабзазауа аъахIыльчва рпны дищтиуамцара дайрыпхьун, азаман ъабаргвыз ахъазла тгIачвакI рпны щарда дгьгIанимжьуазтI, датша зджьара датирыпахуан. Ауи ашвхIаусыгIвала апхьартаквагьи тшырпсахуан.

Апхьарта дгIалымгаскIва газеткI апны МГУ аунашва дгIапхьатI. АрыпхьагIв данылцIгIа ауи йгIаныцIуа гIайалхIвтI. ЧагIбан ауаъа дыцIалта дапхьаныс багъьата йгвы йтайкIытI. Ауи апш гвала йхъару абаза кыт йгIатадрийыз ачкIвын йыхъазла гвышхвара йахъазымкIва айрышрагьи гIаныпщуан. Йыцапхьаквуз лакъырдуан – ауниверситет дыцIалнысгьи гIайтахъхатIхIва. Ауаса абзазара йшгIанарбазла, йгвала гIайыдахIвтI, асквш 1955 агIан Москва дцан Ломоносов йыхьыз зхъу ауниверситет аэкономика факультет дыцIалтI.

Ауниверситет апны апхьара сквшква Йуан ЧагIбан йгвы лашарата йгIатахатI, ауаса ауаъа дангIалга анахьанат абаргвыраква гIаншатI. Асквш 1960 агIан Къарча-Черкес къральыгIва пединститут апны нхара дгIарщтитI, ауаса йцынхъвы датша заджвы днарахвхьата йгIацIцIтI. ЙъачIвагIала Къарча-Черкес область апны нхарта гIвысквша руацIа дазыпшгIатI, ауаса йгьимаутI. УадыргIвана асквш 1962 агIан Ростов университет аспирантура дыцIалтI, ауаъа хысквша дапхьан дахIврала дгIалгатI. Нхарта йзалхта дшгIарщтихызгьи Къарча-Черкес апны йатаркIвах дынхадахатI. УадыргIвана йхъа амаль йбахныс ахъазла аобласть дтыцIтI. Асквш 1965 октябрь мыз агIан Ставрополь кытмлыкврхIара институт политэкономияла акафедра апны ассистентта дынхауа далагатI. ЙащтагIайуаз асквш мартI мыз агIан кандидат диссертация йхчатI, гIвысквша анахъыцI доцент апхьахьа хьзы гIайырттI. Асквш 1987 Ростов къральыгIва университет апны доктор диссертация йхчатI, ауи амщтахь йгIаталыз асквш апны акафедра даунашвачпагIвта ддыргылтI, уадыргIвана дпрофессорхатI. Ауаса анаука апны йгIатгараква ауыла йгьашIамстI: асквш 1994 январь агIан Россия анаукаква ракадемия апрезидиум Йуан ЧагIбан наука стипендия йзыщаквдыргылтI, асквш 1996 агIан кытмлыквргIара дыррала Россия академия член-корреспондентта днарахвтI.

Анаука йгьи арыпхьара руысла дынхауищтара ЧагIбан ХIаджьбакьыр йпа гIвыра 200 раъара гIацIищттI, ауат йрыуата амонографиякви апхьагакви жваба йнадзитI. Адунейла, хIкъральла, ареспубликаквала, арегионквала йакIвшауа анаука конференцияква рынхара дамайчуата дрылалитI, дгIачважвалитI, йунашва йацIата астудентква йдрыхIазырыз анхараква анкъвакъвраква рпны йгIалыркIгIитI, артшхъвага грамотаква рквнадыргитI, 50-гIв раъара йнадзауа аспирантква наука ауысла друнашвачпагIвта акандидат диссертацияква рхчатI. ЙхIаракIу арыпхьара апны йгIатгараква хвы рыквырцIауата аквплацIа «Анхара апны йхIаракIдзу адахIвраква», амедаль «Анхара аветеран» гIайыртатI. Щардата йымапI артшхъага грамотаква. Сквшы 75 анихъыцIуашыз атшын апхъала «За доблестный труд» – хIва йзпхьауа амедаль гIайквнадыргатI.

Йуан ЧагIбан ХIаджьбакьыр йпа дгIвычIвгIвыс гвапапI, дымшыркъвагIвыпI, агвып зрыпшдзауа ахIбачва дрыуапI, аугIахъа цIаскви ахабзакви бзита йдыритI, йнайырдзитI. Ауи йаццауата швабыж дщаквкIыпI, йъадаб-намыс хIагIапI, йакъыль цIолапI. ДтгIачвапI, хгIвысабичва гIадзынйыргылтI. АхыгIвгьи йхIаракIу адырраква гIацIыргатI, анаука хьызквагьи нкъвыргитI: ахIба Амир – аэкономика наукаква дырдокторпI, айцIбачва Мурати Асйи – кандидатпI.

Ноябрь а 5 ЧагIбан ХIаджьбакьыр йпа сквшы 75 йхъыцIтI. АнбжьагIвчва, йхаквлагIвчва, йыцынхауа агIвычIвгIвыс бзиква рыхьызла абари аюбилейла хIйайхIвахIвитI, апхъахьылагьи амайчри, азгIвадари, нцIра дуи йымазтI. ХIара хIыхъазла ауи дшвапха дупI, дшвапха бзипI. ГвыхътIыла швабыж йхIтахъыпI апхъахьылагьи щардала швапха пшдзата дхIзалуата йахIбара ауыраханыс!

ЧкIала ПIитIа,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki