Library

ЗымгIвалагьи апхъанчIвиква рпIатIу ащтIыхра, йпшдзу ауысквала Абаза Къраль ахьыз ргара – абарат ахъвыцраква рылубгIитI ауысагIв шIа Шай Шамиль йуысаква зымгIвагьи. Ауи дчкIвынищтарагьи уыса йгIвитI, ауат «Абазашта» газет анапаква запыт йгIарыквшвалитI. Ауи йыгIвзачвагьи йъахIыльчвагьи йшырпхьадзауала, уыста йхъатайкIлакIгьи майрата йгIайдахIвитI. Ауаса адахIвраква йара йгIапсарала йшгIатигауа йан ФатIимат заджвыкI лакIвпI йыздыруа. Адырра цIолаква гIайыквшваныс, хIаль-шанла днардзата аугIа сабап рызгIайгуа дбзазарныс акIвпI ауи мурад хъадата йлихыз.

Шамиль ХIабаз алицей медаль гIайквнадыргауата дгIалгатI, Къарча-Черкес педагогика колледж – диплом къапщыла. АрыпхьагIв йъачIвагIа йара-йара йгIалихтI, асабиква рарыпхьара ауралагьи йгвалан. Ауи агвала ужвыгьи йымапI, ауаса апхъапхъа йщапIы дхвынгылныс, йани йаби дырцхърагIауата тлашIа йчпара атахъыта йщаквйыргылтI. Уыжв хIзаман апны щардагIвы йшырчпауа апшта, атичIвпкъыгIваква нкъвигитI, ауи анхарала нхашата йгIайыртуа рыцIа йайхIапI.

Анхара нхарапI, ауаса йпсы бзи йабауа ауыс дгьзакъвыцIуам, ансимшгьи йкъальам уысакI гIацIымцIуата йгьагIвсуам. «ЙнапIы ахьы гIацIпIлитI», – араса рхIвитI аугIа Шамиль йыхъазла. Ауи апш ажважв рымапI абазаква зуыс йазъазакву йанрылачважвауа.

АчIвыйа ауи йуысаква гIазквчважвауа? ДгIадзынзыргылыз йан, къару гIайылазцIауа йцри шта, зхацква байарата йзалуа йабадучва рабачва…

УишIашвата уанйачважвауа угвы пшыхь таситI. Зпсы йлашару аршIыйара алу, згвы абзибара ачIвец гIаткIкIгIауа абари апш чкIвын абаза кыт АлбыргIан дъату швабыж йгвлахIарапI .

СЦРИ АБАЗА!

Амара щымта йгIакIкIаджьуа,
Апсабара къагIауа пшдзадза,
АшIыпIа пхара-нурла йъахърысу
ЙбзазитI суагIа абаза-хIва йызпхьауа

КIавкIаз абыхъв чIвыца шкIвокIва
Адзыхь зтолкъвынква аквызчвауа
АхIгIара йъахварззауа ауарба
ЙбзазитI суагIа абаза-хIва йызпхьауа

Сылахь йыцIапI са щардала,
Сгвы йщтIнахитI са пшдзадза
ЙзачIвытагьи ауи бзийа-
АшIыпIа Абазашта-хIва йызпьауа.

Араъа йгIарылапшырквын хIгIата
УчIвата уазхъвыцырквын зынгьи
Йджьауымщушта йгьаъам, сыгIвза,
ЙхъацIа, насып цIолапI ауи.

ЙшвасхIвныс са йстахъу закIыпI,
ЙшвылашвхIва ауи багъьата:
Абаза – ажва Абаза
ЙщтIышвх хIагIата анцIрагьи!

Швапхъала йжвга, йшврыпшдза,
Йшвырбайа, швахьпшы, йынкъвыжвга.
Абаза-ажва Абаза
Швгвы йалазтI йачIвата ауи.

Шай Шамиль

Ешерова Муъминат, журналист, Черкесск
«Абаза Къраль» йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki