Library

Ауи абаза уарадква ранкъвакъвра «Асквш абаза ашва» йахъыцIуа ахвысквша йадахIвуата йадгалазлуштI.

Сентябрь а 16 йгьи а 17 рагIан Черкесск апны абаза культура а-Фестиваль акIвшуштI. Афестиваль адызгалуа культура дыррала а-Дуней абаза-апсуа адкIылара «Алашара» ракIвпI.

ЙцIыхъвахауа ажвасквшапхьадзараква руацIа адуней ауыжвгIанчIви жвлара-политика аъаща КIавкIаз аугIахъаква рпхыцIа апны йгвыгIвмыгIву ащтаква гIаннажьуан. Ауат агвыгIвмыгIвраква абазаквагьи апсуаквагьи йгIарыдсылуан: араса йанхIхIвара Апсны йгьи Россия йыртабзазауа аугIа йырхъазымкIва агIвымакъральква йыртабзазаквауа рунашвагьи гIацIанахIыркIитI – Трыквшта, агIарып къральква, Европа акъральква йыртабзазауа амхIаджьырква ртынхаква. ХъатакIла йгIауахвырквын, КIавкIаз аугIахъаква рхъамаль рзыбахуата йрылшауа гьмачIым. Аправительстваква уахьчIвала аугIахъа культура жвлара организацияква ргIаныршара йацыркIитI. Абараса Къарча-Черкес аправительства аунашвала араъа Абаза район гIандыршатI. Апсны ахъахвитра адуней акъральква йацыркIтI, ауи амщтахь сквшкъомкI руацIа ареспублика абзазагIвчва зтаз аэкономика йгьи ашта блокада йгIалцIхуа йалагатI. Трыквшта апны КIавкIаз аугIахъаква (амхIаджьырква) ркультураква акъраль акультура йаланакIуата штшауацIырхуаш амальква рзыгIандыршитI.

Абарат йрапшу агIаншара гвырбзигаква йгIарпшIагылитI аглобализация амыгIвхъгаракви зщапIы багъьам адуней аэкономики. КIавкIаз апынгьи анахьанат аштаква рпынгьи чкIвынргIа нхарта рмауата акытква йыртыцIхитIта акъалаква йырталитI. Ауипхьадза акытква злащаквгылу ажвлара цIасква алпIлитI. Акъалаква рпны ауат рцIасквагьи, рыбызшвагьи, датшата йухIвушызтын, ругIахъа культура рчвыдзуата рбзазара тшапсахитI. ЙгIважвахуз асквшышв агIан абарат агIаншараква рыцIа йльальата йакIвшазтIхIва ужвы азаман уыла йгIацIахуата рыцIа йласхатI.

А-Дуней адкIылара «Алашара» анхара адгалра щатата йазалуа ари акIвпI: абазакви апсуакви рпахь змагIны дуу ахачIвква гылапI – аугIахъа тшдырра тшгIащтIнахта ажвлара ркъару бзазара шIыц гIаннаршауата дахIврала йщаквгылныс. Абари акIвпI абаза культура а-Фестиваль задыгIгалуа, «Астоль гьажьы» ауатыкв йтахIцIауа ауысква ззынархазлуш. А-Фестиваль апрограмма йаланакIуата хвысквша руацIа «Асквш абаза ашва» анкъвакъвра йалаз абаза ршIыйара гвыпква рконцерт акIвшуштI.

«Астоль гьажьы» анакIвшауа асхъан абазаква, апсуаква, адгьа-апсуа гвып йаланакIуа анахьанат аугIахъаква ртурых, рцIасква, рхабзаква руысла а-Дуней адкIылара «Алашара» анхара агIарбараква хIрылачважварныс, аугIа йдхIырдырныс хIгвыгъапI.

ХIуыжвгIанчIвиква цхърагIарата йырзалныс акIвпI ари афестиваль задагIгалуа: рбзазара нашх лашара аланацIаныс, агвыргъьара гIаншараква йрылахIаныс, агвлачва рдахIвраква рыцагIвыршауата, ргIвычIвгIвысагIа йалахIауата тшырпсахныс, чкIвынргIа угIахъа тшдырра рымата тшырзадкIылуа йаъазларныс, ругIахъа цIаскви ахабзакви рмагIны рдыруата йынкъвыргауа йгIадзынгылырныс.

Егьзакь Муса,
культура дыррала а-Дуней абаза-апсуа адкIылара «Алашара» а-Президент


А-Фестиваль адгалра аплан

Ауи гIвымшкI гIацIанакIитI:

1. Сентябрь а 15 – асасчва йырпыралта йандыргIалуаштI.
2. Сентябрь а 16 асахIат а 11 йгIашIарышвта а 15-дза – «Абаза феномен: Россия апынгьи агIвымакъральква рпынгьи» темала столь гьажьы адыргалуаштI.
3. АсахIат а 18 йгIашIарышвта а 21-дза – «Асквш абаза ашва» аюбилей гала-концерт акIвшуштI.
4. Cентябрь а 17 – КъарчачкIвын район йаланакIуа Красна Восток (Гвымлокт) апны йазалху культура программа акIвшуштI:

– асахIат а 9 – ауаъа йцуш агвып Черкесск йтыцIта йджвыквылуаштI;
– асахIат а 11 йгIашIарышвта а 13-дза – КъарчачкIвын район апшдзартаква тшрыхадыргIвазуштI;
– асахIат а 15 йгIашIарышвта а 17-дза – «Астоль гьажьы» йалакву йгIвбахауа ралачIвара акIвшуштI;
– асахIат а 18 йгIашIарышвта а 21-дза – Красна Восток акультура тдзы апны «Асквш абаза ашва» аконцерт йгIвбахауа ахъвы акIвшуштI (Агала-концерт апрограмма йаламшваз анкъвакъвра апхъагылагIвчвагьи араъа йадыргалуа апрограмма йалазлуштI);

5. АсахIат а 22 – агвып Черкесск йгIацапахуаштI.
6. Сентябрь а 18 – асасчва нардасхуаштI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki