Library

Афилология дырраква рдоктор, апрофессор ЧкIала ПIитIа Константин йпа хъадата йырхъйауа арыпхьари анауки йырпщылу ауысква ракIвпI, ауаса йцIыхъвахауа асквшква руацIа ауат нархарта шIыцкIла йрылахIатI – атакIра ауысла. Асквш 2011 агIан ауи абаза бызшва йгIахъыху агIахIвахракви ановеллакви разкIкIра «Абаза проза» – хIва йахьызта урышв бызшвала йгIацIищттI. Ауи акнига намыца бызшвала Штеффи Хотивари-Юнгер йаталкIын уыжв ласыла Берлин апны йгIацIцIуаштI.

Абар ПIитIа йхIвауа:
– Асквш 2007 агIан Берлин ауниверситет адоктор Хотивари-Юнгер КIавкIаз алитератураква руысла йлыцынхуш аъачIвагIагIвчва дшырзыпшгIауа ахабар гIасархIвтI. Лари сари хIабадыртI. Абаза литераторква йрыуу апхIвысква ргIвыраквакI рсатырцIахьква ррыхIазыррала лахIвара сырхъйан Германия апны йгIацIцIуа анамыца-квырджь журнал «Георгика» анапаква Штеффи намыца бызшвала йаталкIта йгIарыквшватI Тльабыча Мира, Апса ФатIимат, Щбзыхва Лариса руысаква, Къвапсыргьан Валентини ПIаз Рози ргIахIвахраква. Йара ауи ажурнал йащтагIайуаз аномер ахъазла намыца бызшвала йаталкIын Апсны йакIвшаз айсра йазынархаз Мыхц Кьарим йуыса абаркIыра «Апсуа тетрад» йгIаквчважвуз сара сгIвырагьи гIаквылцIатI. Ауи амщтахь Штеффи сара сыхъазла йхъацIауачваз ахабар гIалыргатI – абаза гIвгIвчва ргIахIвахраква урышв бызшвали намыца бызшвали йацатахIкIуата нхара ду акIвхIыршаныс. Абари агIаджвыквцIара абзазара йалалныс ахъазла лара ауи апхIвыс гвымчIва асквш 2011 апхын Швейцария йтагылу атакIыгIвчва р-Тдзы «Лоорен» апны хIанйара адылгалтI. Ауыс ангIаджвыквхIцIуз атакIра йшатахъу апшта йсзырхъйапIхIва схъагвы гьаквымызтI, йшпакIву ухIварыквын съачIвагIала сгьлитераторым, атакIрагьи ауи апшта сгьазъазамызтI. УадыргIванагьи схъвыцтІ, схъвыцын садгылтI. Гвышхвара гIасылазцIаз гIаншаракIгьи аъан: Ставрополь пединститут сангIалгуз агIамта атакIра атеории акIвыршащи руысла диплом нхара срыхIазырын йыгьсхчахтI. Ауыс сшадгылуаш здыруан, ауи саргвышхван салагатI, атакIра нхара апынгьи швабыж йгIасыхъвахтI.
АтакIыгIвчва р-Тдзы «Лоорен» Швейцария ашIыпIа пшдзаква рпны йгылапI. Араъа анхара зымгIвалагьи йадгалапI: узыгIвнанхауа апещ йшатахъу апш йагвныргIвыпI, урышв хIарыфла ушзаквцIуш апшта акомпьютер гылапI, уахъгьи тшынгьи йапымшвтуата интернет йапщылапI, библиотека, апхьара пещ, мацIауырта, чарта агьиква аъапI. Ауи ахъахьгьи Россия, Мараташварташтаква рпны йаъу, зщапIы йхвнымгылс акъральква йгIартыцIуа атакIыгIвчва стипендия рыртитI. Ауи ахча ачара ахъазлагьи аларпшра ахъазлагьи йуызхъитI. Сара заджвыла Швейцария ажвкъалакI сгIарыкIвшата сылата йпшыз зынгьи йгьсхъаштылхуам.

АтакIыгIвчва р-Тдзы апны уынхарныс ахъазла ауагIахъа бызшва ажварква уыцугара атахъыта цIас щаквгылапI. ПIитIа Швейцария данцуз асквш 1967 агIан ТIыгв Владимир йадигалыз «Абаза-урышв ажвар» йгьи Тобыль Нурйа дыздынхалыз «Абаза бызшва аорфография ажвар» йыцигатI. УадыргIвана йхъатала йгIацIищтыз азкIкIра «Абаза проза» аэкземпляркIгьи йгатI. Абараса Швейцария атакIыгIвчва р-Тдзы «Лоорен» абиблиотека ду апны абаза бызшви алитератури ртып хвыц гIаншатI.
СынчIва апхын ПIитIа гIаджвыквцIара шIыцкI дадынхалныс йатаркIвах Швейцария датацахтI: абаза локIква апхъапхъа урышв бызшвала, уадыргIвана намыца бызшвала йатаркIта ргIацIщтра. ЧкIала ПIитIа ауыс дазгIашыкъта йхъатайкIытI, ауаса зынла абаргвыраква дрынйатI: асквшква 1940-1980 руацIа йгIацIцIыз абаза локIква разкIкIраква гIаууачвахатI.
ПIитIа ауыс араса далачважвитI:
– Тобыль Тольыстан абаза бызшвала алокIкIва ргIвазкIкIракI гIацIищттI, ТIыгв Владимир абаза бызшвала хазкIкIракI, урышв бызшвала йара-йара йатайкIта азкIкIракI, Меремкъвыль Владимир алокIква разкIкIракIи нартргIа ртурыхква разкIкIри абаза бызшвала йгIацIищттI. Ауат акнигаква зымгIвагьи уахьчIвала йкъытхатI, абиблиотекаква рпнынадзара йгьаъахым. Ауи амщтахь йгIасгвынгIвытI уахьчIвала йгIацIцIхьата ауагIа ршIалахIвара, ажважвквагьи, акытчаквагьи, анашанаквагьи, ашваквагьи аланакIуата, шIыц-шIыц йаныргIалхта йатагIацIщтхра шатахъу. Ари ауыс ауи ахIа йтащахIах йамуашта хIпахь йгылапI.
ПIитIа йатакIра уыс йырхъйахьатI – апсауышвхIаква, ауагIа рбзазара, ХIваджьа агьи йгIарыквчважвауа абаза локIква урышв бызшвала йатайкIтI. ЗымгIва шалу гIвынгIважви жваба йрайхIапI. РгIацIщтра ноябрь мыз йаквйырпшитI. Намыца бызшвала алокIква ратакIра Штеффи Хотивари-Юнгер йлыцынхауа Штефани Шааршмидт дадынхалитI. Апхын «Лоорен» апны данаъаз ПIитIа дызцынхуз ауи атакIыгIв шIа лакIвын.
ЙгIахIвахра далгауата ПIитIа араса йгIацицIахтI:
– Швейцария съацаз дахIвра дута йшсзалыз апшта апхъала зынгьи йгьсызшамызтI. Адуней съадзакву сылзыразпI абаза гIахIвахракви алокIкви ратакIра саквзыргвышхваз, ауат намыца бызшвала йрыдынхалхуа Штеффи, швабыж пхата сгвы йгIатахатI «Лоорен» апны сынхарагьи стшпсщарагьи адызгалуаз атакIыгIвчва р-Тдзы аунашвачпагIв Габриела Штёкли, ауи анхагIвчва Флоранс Витмер, Зорка Цикламина, Моника Мути.
Датшагьи йхIвара атахъыта йаъапI уахьчIвала ЧкIала ПIитIа йбергьльу абаза уысагIв Мыхц Кьарим йуыса 224 рсатырцIахьква урышв бызшвала йширыхIазырхьу (сатыр 3500 райхIа йнадзитI), ауат ауысаква ратакIра ауысла аурышв уысагIвчва дрынгIалныс дшащту. Абари агIаджвыквцIара архъйарагьи уыс шIыц дута абаза литература йахъвуш ауи йалацIарата акIвпI йшаъу.

ХIасарокъва Бильаль
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki