Library

ТхIайцIыхв Бемырза Хангьари йпа асквш 1929 агIан дзын мшыта Къвбина кыт апны дйытI. ХвымызкI ахIа йхъымцIскIва йаба дпсытI. Йан дамальынтшата лыхыгIв сабичвагьи налахвын лани лаби ъатабзазуз Гвымлокт дацапахтI. Араъа акIвпI Бемырза дъагIадзынгылыз.

Асквш 1936 агIан ачкIвын йапхъахауа акласс дыцIалтI, ауаса азгIваква запыт йъагIайыдсыллуз, уадыргIвана йгIалагаз айсра ршвхIаусыгIвала быжькласскI дангIарылга асквш 1946 агIан акIвпI. УадыргIвана сквшыкI акъваш дыквын: тшынла атанаква йхчун, уахъынла атдзыжв акв дыквчIвата ажвква йчIапщун. Абарат ауахъ сахIатква рагIан ауыса сатырква йызгIашIыхауа йалагатI.

Асквш 1947 агIан Бемырза Черкесск йтагылу педучилища дыцIалын пщысквша дапхьатI, апычIв классква дырарыпхьагIвхатI. Апхьара сквшква баргвын, апхьагIвчва мгвала йгIапсун. Ауи азаман йауата рыцIа йгIайгвалашвахлун атшпсщара мшква рагIан щапIыла акытдза йшцахлуз, щапIыла акыт йгIатыцIхта Черкесск йшгIайхлуз – афачIвква (кIартIоф, нартыхв рыгъгъ агьиква) рыхъвда йхъата. Апхьара сквшква датшагьи щтакI гIанырыжьтI: асквш 1949 агIан абаза газет «Черкес къапщ» анапаква йапхъахауа йуысаква гIарыквшватI. Апхьара даналга ТIапIанта кыт арыпхьагIвта дгIарщтитI, араъа апхьарта аунашвачпагIв МалабазинскIа кыт дищтитI, ауаъа йцбахауа класскI йахъазыта йаъан. Йхъазы апредметква зымгIвалагьи йайрыпхьун: абаза бызшвала, литературала, урышв бызшвала, намыца бызшвала, физикала, геометрияла, алгебрала, географияла, историяла, физкультурала, ашвахIварала. СквшыкI данынха амщтахь Гвымлокт дацапахтI, ауаъа математикали намыца бызшвали дарыпхьагIвхатI.

Асквш 1954 агIан ТхIайцIыхв Бемырза арра къвырльыкъвхара дызшIырттI, асквш 1956 агIан ауи далгатI, асквш 1957 апрель мыз йгIашIарышвта абаза газет «Социалист Черкесия» аредакция апны дынхауа далагатI. Асквш 1962 агIан гIвуыса азкIкIракIи гIахIвахра азкIкIракIи гIацIищтхьата СССР агIвгIвчва р-АдкIылра днарахвтI.

ТхIайцIыхв Бемырза йыршIыйара уысагIвта далагата урышвли хIыбызшвали йалата 11 уыса азкIкIракI гIацIищтызтынгьи дызлабергьыльхаз апроза гIвыраква ракIвпI: ахабаргIвыракви ароманкви. Абаза бызшвала йгIацIцIуаз акнигаква йрыуата Бемырза йкнигаква рапш амакIыранадзара гIадрыцIсуата апхьагIвчва датша закIгьи абаза газет анапаква рпны йгьрыламчважвузтI. Ауат агIвыраква йрыуан ароман «Нышв напIыкI» (1966), ахабаргIвыра «ХIаджьмурат йыгIвпхIвысчва» (1987). «Нышв напIыкI» йангIацIцIбырг йгIашIарышвта уыжвгIандзарагьи апхьагIвчва бзидздза йырбауа романпI хIхIварыквын хIгьгIващарым. Ауи йаквшахIатпI асквш 2012 агIан ароман йгIвбахауа агIацIщтра абаза бызшвала йгIацIцIыз датша книгакI йапшымкIва ласдзата йъапшцIыцIыз (ага йгвасразтынгьи, ауи атираж пхьадзара мачIдзапI – экземпляр 500 ахIа йгьнадзум). Ауи ахIатырла йгьджьащахъвам ТхIайцIыхв Бемырза йанизаманыз зымгIва йрагъьу проза гIвгIвыта абаза литература апны йыхьыз ъагуз. ЙыршIыйара апны йгIайцхъагIатI Ставрополь пединститут афизика йгьи аматематика факультет апны хысквша руацIа дъапхьаз, уадыргIвана ауаъа дгIацIцIхта сквшыкIла экстерн амальла Къарча-Черкес пединститут дъагIалгахыз, асквш 1967 йгIашIарышвта асквш 1969-дза Москва апны Литинститут йадкIылата йакIвшуз ЙхIаракIу алитература курсква дъагIарылгаз. ЙыршIыйара сквшква руацIа Бемырза Хангьари йпа книга 20 гIацIищттI, асквш 1995 агIан ауи ачIахIныгIва хьзы «Къарча-Черкес Республика ауагIа рыгIвгIвы» гIайквнадыргатI.

ТхIайцIыхв Бемырза асквш 2007 сентябрь а 20 атшын адуней йхIваджьтI, йчIвылахъв Къвбина кыт апны йаутI.

ЧкIала ПIитIа,

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki