Library

Асквш 2012 июль а 23 абаза гIвгIвы Джыр ХIамид Дауыт йпа сквшы 100 йхъыцIуашын. Абашта айсра Ду амщтахь абаза литература атшауацIнарыхра Джыр ХIамид йхатI ду алайцIатI. Ауи апхъапхъа абаза бызшвала йгIацIцIыз ахабаргIвыраква, ароман, апьесаква, агIагвалашвахраква дыравторпI.

Джыр ХIамид йбзазара гьмайрамызтI: 10 асквша ахIа дыртамкIва абадъа дгIанхатI, йынбжьагIвчва драпшта, дчкIвынищтара йцри Хъвыжвду кыт апны драхвхчагIвын. Акыт апны апхьарта ангIахъыртIы дцауа далагатI, урышв бызшвагьи черкес бызшвагьи йдыртI. Ауи агIамта амадырса апны гIарып бызшвала дгIвуа, дапхьауа тшибжьахьан. Амадырса апны апхьара хвы аквын: ауи дъапхьуз ахъазла сквшыкI апны хIвыскI йа уасакI рыртра атахъхун.

Абазаква гIвыра анрымамызгьи ХIамид абаза бызшва абыжьква йрыквйыршвауа ахIарыфквала дыгIвныс дгвышхвун, черкес бызшва йгIахъихуанта текст тшытквакIгьи хIыбызшвала йгIвуан. Джыр ХIамид латин графика щата змата Тобыль Тольыстан дыздынхалгIвацаз абаза алфавит апхъапхъадза зыла йабакваз дрыуапI. Ауи асхъан абаза алфавит гьдымрыбагъьасызтI.

Асквш 1938 йгIашIарышвта Джыр ХIамид «Черкес къапщ» газет аредакция дынхауа далагатI: корректорта днарахвын йъазара йалахIумцара аредактор хъада йъанатIа гIайызхъарцIатI. Абаза фольклор щатата йызмаз йгIахIвахраква йапхъахауата агазет анапаква асквш 1940 агIан йгIаквшватI.

Абашта айсра Ду ангIалага Джыр ХIамид афронт дпшцIалтI, агенерал Доватор дызкомандирыз акавалерия корпус дрылата дайсытI. Айсра амщтахь, асквш 1945 йгIашIарышвта, абаза газет апны редактор хъадата дынхун. Ари азаман ХIамид абаза литература шIыц-шIыц агIащтыххра джьгарта йхъатайкIытI, алитература тшадызкIылныс зтахъыз чкIвынргIа адикIылуан, йыргвышхвун.

«Ауи зынгьи агазети алитератури гьимыркIьыдузтI. Ауи йыхъазла агазет литературан, алитература газетын», – араса йгIагвалашвахраква рпны йгIвуан ТхIайцIыхв Бемырза.

«ХIара журнал гьхIымам, йхIыму агIвырагIацIщтырта заджвыкI апны сквшпхьадзарала акьазу уазпшра атахъхитI. Ауи йгIалцIла агазет акIвпI магIны зму ауысква зырхъйара атахъу», – Джыр ХIамид щардала йхIвалуз арат ажваква йынхарагьи йыргIарбаган. ЦIабыргыта, ауат асквшква рагIан, ауи абаза газет апны редактор хъадата данынхуз азаман, абаза литература акъару ззыгIатацIахыз, атшауацIнарыхра йазынхауа йалагаз гвып бзи адикIылныс йылшатI.

«ЗгIвыраква йызгIазгуаз ачкIвынчваква рыуа заджвгьи зынгьи дгьацаймырпузтI, – йгIайгвалашвахитI ТхIайцIыхв Бемырза. – Заджвы йапхъахауата уысакI йызгIайгзарквын, – «ЙауаштI, ужвыгьи йгIвла», – йхIвунта дгIауищтхуан, ага дызпшыз агIвыра ауысара йачвыхъаразтынгьи. Йаъан чкIвынчва зны йызгIвыта уадыргIвана йашIасхуаз. ХIамид ауатгьи йылапш йыцIан, аредакция йнайдылуанта драйбжьун. Абарауаса агазет анапаква рпны йапхъахауа агIахIвахраква, ауысаква гIаквшвауа йалагатI – агазет ауатыкв апны алитератор шIаква тшадыркIылтI.

…ХIычкIвынчва рыуа аджвырагIв апхьара дджвыквылзарквын ауыгьи гватрадъа дгьгIанымхузтI. Анхарта йстоль ахъахь акъала дуква рпны йапхьуз ачкIвынчва рыхьызква гIвыта йыман. Ауат цхърагIаракI шдирайдзуш дащтан. Рцри бызшвала йапхьаланыс ахъазла абаза газет рнапIыцIайыршвун…»

Асквш 1952 агIан Джыр ХIамид Москва КПСС а-ЦК рпны йаныргIалыз ЙхIаракIу апартия апхьарта дгIалгатI. Аобласть архъйагIв комитет апредседатель дицхърагIагIвта дынхатI, уадыргIвана агазет аредакция апны йъанатIа дазгIайхтI.

«Джыр ХIамид гIвыра бзидздза йымапI. Ауаса ароман «Ащхъаква ргIашIыхара» ахIа датша закIгьи йымгIвызаргьи – гIахIвахразтынгьи, пьесазтынгьи, хабаргIвыразтынгьи, – йыхьыз дута анцIралагьи хIлитература йгIалахушын, – йгIвитI ТхIайцIыхв Бемырза ХIамид йыршIыйара даквчважвауата. – «Ащхъаква ргIашIыхара» – ари абзазара ахъатаквагьи йапшымкIва йгауа абыжьква зымгIвагьи гIазырбауа романпI, ауи хIугIахъа рыхъазла Джыр ХIамид йгIанижьыз тынха дупI, хIлитература атшгIва апхара анцIралагьи йгIазхчуш гIвырапI».

Ауи йхабаргIвыракви йгIахIвахракви зыншвалыз йцIыхъвахуз йкнига «Амара йгIанаршIыхаз» дымчмазагIвхаскIва атипография йрырттI, ауаса йара адуней йхIваджьхьата йгIацIцIтI.

«ЙцIыхъвахауата ауи йбжьы ачымазагIвхьпшырта апны акIвпI йъазгIаз, – йгIвитI ТхIайцIыхв Бемырза «Амара йгIанаршIыхаз» азкIкIра ацIыхъважва апны. – АзгIва хьанта ащта йлакта йгIанахIвун. «Йацы профессоркI дгIайын уачIвы Ставрополь сшыргуш йхIватI. Сышйырбзихушла сйыргвыгъатI. Саргьи апсра тшастныс гьсмурадым, ари азгIва хIзайгIайуаштI», – йхIватI дгвышхвауа ауи агIан ХIамид. Ауи амщтахь йызгIва дгьаламчважвахтI. Датшан дызлачважвуз: йынцIра шабгу ззынайырхаз алитератури агазети. «Швуысква шпаъу? ХIлитература апны шIыцрата йаъайа? ХIгазет ауысква ащтацума? ЙгьаладмырхIасма ужвыгьи? Йжвбахауа акласс апхьагIвчва рыхъазла апхьага шгIацIцIыз ахабар згIан сайгвыргъьатI, ужвы йжвабахауа акласс апхьагIвчва рыхъазла апхьага гIацIырщтзарквын йубарын хIлитератор шIаква йшгIарылахIауа. Уара укнига Москва апны йгьгIацIымцIсма? ШвымгIащауата швкнигаква урышв бызшвала йгIацIшвщтла. Ауи амаль абзирала хIлитератури хIугIа рбзазащи рунашва хIкъраль абзазагIвчва йырдыруаштI…» Ага апсра тшайымтныс йхIвазтIхIва ужвыгIандзара арат ажваква уасйатта слымхIа йтггIаркIвитI. ХIамид йара йуысква анхIатлахагьи хIугIахъа дрызхъвыцуан, дырхъгвыргIвун. «Адуней апны угIахъа хвыц гьаъам, йаъу зпхьадзара мачIу угIахъапI. Сара сугIахъа рпхьадзара мачIызтынгьи угIахъа дупI», – йхIвалун щардала Джыр ХIамид. Йажваква йырцIабыргхныс йтахъызшва йкъаругьи йдырраквагьи абгата хIугIа уыс бзила йшщтIихуаш дащтан – йгIвыраквала, йгвапарала, йгIвычIвгIвысагIарала. ХIамид джвлара уыснкъвгагIвын. Йхъазы жвларакI дырпсан».

Джыр ХIамид гIапын мшыта асквш 1972 адуней йхIваджьтI. Ауаса ауи адуней дыквта дбзазитI – йгIвыраква дрылата, йгвапари йгIвычIвгIвысагIари дырмайгьдзауата йззишуз аугIа ргвы пхата дтата.

Квициниа Инна

«Абаза Къраль» сайт йазалхпI

ЙгIарысабапу алитература:

ЧкIала ПI. Абаза гIвгIвчва рынхара-бзазара швъаква разкIкIра. – Москва, 1996.

ТхIайцIыхв Б. ДжьыкIахбаста: агIахIвахракви аочерккви. – Черкесск, 1974.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki