Library

АкъральыгIва республика абаза драма театр апшыгIвчва ргылчIв шIыцла йдыргвыргъьуштI. Ауи ахабар «Абаза къраль» сайт аредакция йгIахIирайдзатI атеатр аунашвачпагIв КIьыщмахва Умар. Щарда мцIуата алокI «Хьапщ хрихыц» атеатр агвацчпа совет йнарахвтI, уыжв ласыла апшыгIвчва йддырбуштI.

– Ари аргылчIв йара атурых амапI, – йхIвитI КIьыщмахва Умар. – ГИТИС апны йсыцапхьаз, ужвы Къалмых республика АугIахъа драма театр йаунашвачпагIву Шураева Галина хIызту адзын ауаъа хIгIахъвмарныс хIылрайгватI. Рсабиква датша угIахъа культура тшахадыргIвазаныс ахъазла хIугIахъа ркультура гIазырбауа спектаклькI дхIырбара лтахъыта акIвын ауи дызлахIваз. Акъалмыхква рфольклор шбайу бергьльыпI, хIаргьи йхIымапI адуней апны йбергьльу нартргIа рэпос. Ауи аэпос афырква йрыхахIыргIвазаныс хIтахъыта Шидов Юри хIари хIацынхауа хIалагатI. АргылчIв дарежиссерта дгIахIрайгватI Балкъар театр арежиссер хъада Атмурзаев Магомет. Ауи агIвычIвгIвыс ауралагьи шIыцракI дазыпшгIауа дынхитI.

АргылчIв шIыц ауысла Магомет КIьыщмахва Умар дгьимайжьатI. Атмурзаев Магомет ршIыйарала Лагъь КIавкIаз къральыгIва институт апны йайрыпхьитI, «Къабард-Балкъар республика апны ршIыйарала гIатгара зму анхагIвы» чIахIныгIва хьзы нкъвигитI. Ауи йбзирала актер шIаква ауи аъарала ласы ауыс йаланахIван атеатр аунашвачпагIв ауи аспектакль апшыгIвчва йдйырбандзыкIьара йымарачвапI. ЦIабыргыта, апхъапхъа «Хьапщ хрихыц» тшахазыргIвазуш абаза пшыгIвчва ракIвпI. Арат амшква Къалмыхшта апны Асетин театр саситI. Ауи ашвхIаусыгIвала абаза театр ацара асквш ацIыхъва йазыщтIарцIатI. Адзын тшпсщара мшква рапхъала, октябрь а 27 йа а 28, аргылчIв апремьера анакIвшауа Абаза район апшыгIвчва шIаква драйгвуштI. Абаза район аунашвачпагIвчва ауи ауысла йрынгIалхьатI. Ауи алокI аргылрала абаза театр агIамта шIыц гIахъыртIуаштI.

– Сара заджвыла санчкIвыныз абаза театр аспектакльква сырпшныс амаль гьсымамызтI, абаза театр гьаъамызтI, – Умар йгвгIанаграква хIыцагIвишитI. – Ага ауаса йаъазтынгьи, абари аршIыйара квпшыра тшахасыргIвазаныс сылшатI, ГИТИС апны ауи ауысла дыррагьи гIацIызгатI. Ужвы талант зму хIычкIвынчви хIыхIвсси руыс рыцIа ймайрапI: хIтеатр хIымапI, чкIвынргIа ауи йазалху адырраква Москвадза йымцауата йгIарыквшваныс рылшитI. Ажва ахъазла, ужвы йгIайуа апхьара сквшы ангIадзара ршIыйарала Лагъь КIавкIаз къральыгIва институт апны Атмурзаев Магомет йкурс йалата йапхьуш угIа адикIылуаштI. Йари хIтеатри пхата хIащтаныкъвитI, ауи ахIатырла актер ъачIвагIа йапхьаныс зтахъу хгIвы-пщыгIв чкIвынчва ауаъа апхьара йхIщтинысла хIангIалтI. Ауи акIвпIта, швсайт амальквала чкIвынргIа тшырзынасырханыс стахъыпI: шгврыхваха, адырраква гIацIыжвга, швгвала пшдзаква швырзычIвырхъа, ауи ауысла хIаргьи йхIылшауала хIшвцхърагIуштI.

ЙхIхIвахьу йацхIцIахуаш ари акIвпI. УахьчIвала абаза театр апны йынхауа рщардагIв ршIыйарала Лагъь КIавкIаз къральыгIва институт йгIалгакваз йрыуапI. ЗакIы гьазхIвам сквшквакIла ауи аинститут йгIалгауа ачкIвынчви ахIвсси абаза атеатр асцена йгIахвынгылта рыгIвзачва ахIбачва йрыцчIвырхъаныс, абаза театр ршIыйара атшауацIнарыхра рхатI джьгарта йырзалацIаныс.

Квициниа Инна,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki