Library

Абазаква рапхъанчIви культура апны ацIасква рынкъвгара магIны ду аман. АхIбачва йгIадзынгылуаз абанпараква ауат рынкъвгаща ддырбауа, йддырдыруа, йрыладдыркIуамцара йгIамгIвайсуан. АцIасквала ажвлара рбзазара, ауагIа разазаъащаква, ауагIи апсабари разазаъаща агьиква щаквгылан. Черкесск ашта музей анхагIвчва рэкспедиция архивква рпны ахIбачва йырхIвахитI ауат аншIаз ажвлара йынкъвыргуз ацIасква шаъаз. Ауат рызджьакI уагIв ангIаншара ауагIа аква йшахIвуз йазынархапI. Абари апхъанчIви цIас йгIважвахауа асквшышв йгIвбахауа аъарагIвшара асквшква рагIангьи абаза кытква рпны йнкъвыргаркIвун. Асквш 1984 ауатква рунашва Ажьи (Ашкацауа) Муъминат Уасыф йпхIа (асквш 1910 дйытI) амузей анхагIвчва йгIаралхIвтI.

Абаза кытква рпны аэкспедиция рхъвыхраква, асквш 1984

Дзиуара

Ари ацIас агIвау ангIаншара асхъан йынкъвыргун. АхIбачва ачвыргъвы пхIвыс чгIвычала (хIанцыргващата) йыргIвычунта асабиква йрыртуан. Ауат акыт кIьадыгв-кIьадыгв йакIвшумцара абарат ажваква рхIвун:

Дзиуара-а, дзиуара-а,
ДзамаркIакIа маркIакIа.
АхI йпхIа дыдзышитI.
Уа ква тIакIв, уа дзы тIакIв!
Адзыхь ахъа дзы къвырман.
Джьабар ахъа чапс-чапс!

Асаби гвып пшцIакI йтшкIаралпхьадза апшвыма пхIвыс дгIарпыралуан, дзы гIарыквылчвунта хIазырта йлымаз арызкъква гIарылтуан. УадыргIвана асабиква апсыхIва йталуан, йгIвычаз алаба адзыгIв йаладрышвуан, даргьи тшыркIвабун, йадзхъачIвунта йазыркIкIыз арызкъква рфахуан.

Дзтажьра

АгIвау ангIаншара асабиква акыт йакIвшун, атажвква йырзынашылуанта араса рхIвун: «ЗымгIва агIвау йцIанакIытI, апсыхIва хIталта АлахI хIйыхIвуштI, рызкъы натажвгата швнай!» – хIва. Акыт апхIвысква хъкIы, хшы, хырчIвы дасу йымаз датша рызкъы азырггун, ауандыр йа амашина йанырцIунта апсыхIва йталуан. АмацIауыгIвчва кIьыдата руыс рбун, ахвша гIацIырчIва ачамыкви ахIальыжви рзырчпунта асабиква АлахI йдрыхIвун. Атажвква кIьыдата йчIвата азкьырква рхIвун, а-Къвыръан асурква йрыпхьун. УадыргIвана ауатгьи йадзхъачIвунта йчун.
Ачара йаналгара азаджв азаджв дзы йыквырчвахуан, адзы йабатарышвуан, заджвзаджвыкIгьи бахта дгьгIанырымжьуазтI. «Ахабза бзи гIахIыта!» рхIвунта ПсыхIвагваща йлыхIвун. Ажьи Муъминат йшылхIвахуазла, ПсыхIвагваща йылмагIну заджвгьи йгьйымдыруазтI, ахъаз лыхьыз рхIвун. «Бара хIбанаматпI» рхIвун ауи йанлыхIвуз. Ауатква рчпунта зкьыр рхIвауа акытла йгIахъалхуан.

ЙангIваухара адыгьаква аква йшахIвуз

Абазаква йраргвану ауагIахъаква йангIваухара аква йшахIвуз, цIаста йынкъвыргуз аунашвагьи гIараха йауаштI. Ажва ахъазла, акъабардква апсабара гIаншараква рынчваква квырмыш ду рзырчпун. АдзыгIвква рынчва – ПсыхIва-Гваща акъабард апхъанчIви хабарква рпны лныбыжь апшымкIва йлыквчважвитI. Зныбыжьла йчкIвыну ПсыхIва-Гваща зынзамыза ауагIа дрызбзита даъазлитI. Зныбыжьла йнаскIьахьу а-ПсыхIва-Нана зхьзу ауи апш гвчIагIв гьгIалырбум. Адзыр ангIаншарыз, адзыгIв атшпква йангIартыцIрыз аныгьи арахьарыгьи ауагIа йырзыцIыруан: «Сара ужвыгьи сыгьнамхъастI, сгIариквагьи рымгваква гьымчвыстI. Швсабиква сызгIажвг!» – хIва (1).

Арат анчваква ракIвын адыгьаква йангIваухара аква гIадыркваныс ахъазла тшыззынадырхуз (хIанца – чвыргъвы, гваща – нчва, кIважва). Асквш 1930 агIан адыгьаква «ХIанцагваща» – хIва йзпхьауа ахабза шынкъвыргауа Шиллинг Е. даквчважватI. Ауи йшигIвызла, ауагIв ангIаншара асхъан ахIвссакви апхIвыскви ачвыргъвгIвыча рымата адзыгIв йазцунта ауи адзы йтадрышвуан. АдзыгIв йаназцуз йгIарынйуз зымгIвагьи дзы гIарыквырчвун, арахьаратгьи ауат рыцнарахвуанта адзы йыцIырщуан. АцIыхъвадза ачвыргъвы дыртIлахуан, йхъырчIвахуанта йкIадрышвхуан (2).

«Асквш 1993 агIангьи акъабард кыт Аушигер абзазагIвчва санрынйа ауи асхъангьи «ХIанцагваща» шырчпаркIвуз гIасархIвтI. Йшырчпуз араса акIвын. Ачвыргъвы пхIвыс чгIвычала йыргIвычунта ауи рымата акыт йакIвшун, йзачIвпшцIазлакIгьи йъатшкIаралуаз дзы гIарыквырчвунта закI гIарыртуан. Ауи зымгIва йгIаныцIуа ари акIвпI: адыгьа уагIахъаква рапхъанчIви хабзаква рыщайдза ауи аъара йцIолапIта ужвыгIандзарагьи йбзата йгIамгIвайстI».

Исльам ахабзакви ацIаскви

Апхьахьа Шиллинг Е. й-1930-хауа асквшква араса йгIвуан: «ХIанцагваща йылпщылу ацIас анкъвгара апхIвысква рыжвлара гIаныршараква йырхъазымкIва адиннкъвгагIвчвагьи апшIагылапI. Ауат йшырпхьадзауала, ауи ацIас адингьи йапшIагылитI, гвнахIрхIагатагьи йалитI». Ауаса исльам апынгьи акытмлыкврхIара нхараква йырпщылу ацIасква щаквгылапI. ЙангIваухара аква ахъазла АлахI ушйыхIвушла Аль-Бухари йхIадисква йырну щардапI (3).

АфигIамбар йъашвхIабква йрыуазаджвыз Анас бин Малик йшихIвахуазла, «МухIамад дабгаркIвата (йъашвхIабквагьи йаргьи Мадина́ йантабзазуз атлахан) зны швабыж йуагIвхатI. Хвашата афигIамбар зны уаз анитиуаз йаздзыргIвуаз рыуа заджв дгIагылын дахIватI: «Уа АлахI йфигIамбар тлапIа! ХIымлыкв ыдзитI, хIсабиква амла йхIчвагитI. АлахI ухIызйымхIвума!» – хIва. Арат ажваква МухIамад-фигIамбар йгвы швабыж йдрыпшкатI. ПстхIвакIгьи зхъымыз ажвгIванд ахьыла дхъапшылтI, йнапIква щтIихын АлахI тшизынайырхауата аква дахIватI. ЙнапIква гIанайыркъвыхныс дахамдзаскIва ажвгIванд апстхIва квайчIваква йдрылащцаратI. Аминара дангIакIныцIхуаз йжакIьа аква ткIвапсква шгIакIажжуаз збатI». Ауи амщтахь, йшырхIвахуазла, аквашуа йашIамсуата мчбжьыкI йгIакватI. ЙащтагIайуаз ахваша атшын йарауи амсылман афигIамбар щамхъаша дула тшатагIайзынайырхахтI аква шашIасхуашла АлахI дйыхIварныс. «ХIтыдзква хъвашатI, хIымлыкв адзы йхънагIватI», – йхIватI ауи. УадыргIвана МухIамад араса дахIватI: «Уа АлахI йдуу, хIара йхIзыгIамдзауата йгIахIыкIвшаргIатI!» – хIва. Мадина́ ахъахьла ажвгIванд гIацкьахатI, ауи йшгIакIвшауа апстхIваква хъарачIвыла йнаубауата йцатI. Аргван штаква йгIартыцIта Мадина йгIайуаз ауагIаква щардала йалачважвун ауи асхъан йахъысыз аквашуа ауыра (4).
Ауи акIвпIта, йангIваухара амсылманквагьи аква йахIвауата АлахI тшизынадырха йауитI, адин ацIасла ауи гьгвнахIым.

ЙгIаузырдыруа агIалцIыртаква:


1. Шортанов А. Адыгьаква ркультква. Нальчик, 1992. 85-86 ан.
2. Шиллинг Е. Агвхъауаква//СССР ауагIахъаква рдиннкъвгара. М.-Л., 1931. 2 атом. 48 ан.
3. Аль-Бухари йхIадисква / Аимам Абу-ль-Аббас АхIмад бин ал-Латиф аз-Зубайди йадигалтI; ГIарып бызшва йгIахъыхпI, аццIараква В.А. Нирша йчIвыпI. 1 агIацIщтра, 1 атом. – М., 2002. – 503 (1005, 1011), 504 (1006), 505 (1007), 506 (1009), 508 (1010), 508 (1013), (1014), 509 (1025), 510 (1031), 511 (1032), 512 (1034), 513 (1035), 514 (1037), 515 (1039).
4. Аль-Бухари йхIадисква. – 479 (933).

Емельянова Надежда,
аистория наукаква ркандидат
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki