Library

ГвыгъаракIгьи змахым агIвычIвгIвыс дгIацауырпахра ахъазла зъарайа къарути дыррати йатахъу? ГвынгIвырапI йшмачIым…
Асквш 2001 агIан Къарча-Черкес апны зчIва згIва хьанта аду ачымазагIвква адонорква рбзира йгIаннаршауа амаль шIыцквала йрайъазауа йалагатI. Акъраль ауацIала ачIва азгIваква (гепатит, церроз, чра агьиква) уагIата йыргадзауа гIаупхьадзарыквын ари ашIыцра амагIны ахърыкъьара аламкIва йдупI. Гибрид амальла ачIва айъазара асквш 2001 йгIашIарышвта йызбзиру Черкесск акъала чымазагIвтара реанимация, анестезиология хъвшара аврач, амедицина наукаква ркандидат ПIаз (Первакова) Эльза Ибрахим йпхIа лакIвпI.

Эльза Ибрахим йпхIа ХIвмаран кыт апны дйытI, йара араъа апхьарта дгIалгатI. Асквш 1989 агIан Саратов медицина институт айъазара факультет ауи аъачIвагIала дгIалгатI. Йлыцапхьуз ачкIвын Перваков Валера дихъапщылахатI, пхIа длаутI. АхъацIи апхIвыси рбзазара айъазара йапщыламкIва рыла йгьырзгIацIамыжьуазтI. Ауаса рыцхIагIа ншатI – Валера амгIва пхаста йалашваз чкIвынкI дйыркъьан йпсы гIайхчатI, ауаса йара ачкIвын апхъала йыхьуаз азгIва гепатит С йща йгIалалын дагатI.

Ага луысква баргвхазтынгьи, Эльза абзазара дазхъвыцра атахъын, рпхIа лхIатырла, лхъапщыли лари йацыздынхалуаз ауыс анысла, лайъазара йазыбжу ауагIа рыхъазла.
Асквш баргвква дгIарыцIсын Эльза Ибрахим йпхIа асквш 1995 агIан Москва йтагылу трансплантологияла анаука рхъвыхра институт аспирантура дыцIалтI. Асквш 1998 агIан ари анархартала кандидат диссертация дахIврала йылхчатI.
Пщысквша руацIа Эльза Ибрахим йпхIа аэфферент амальквала дъазауата Черкесск ачымазагIвтара анестезиологии ареанимации рхъвшара апны дынхатI. Асквш 2002 агIан ауи Москва йтагылу Склифасовский йыхьыз нкъвызгауа анаука рхъвыхра институт нхара ддрайгватI. УахьчIвала ауи шIыцта йгIандыршаз ахъвшара даунашвахъцIагIвпI. СквшкъомкI руацIа гIапсарата йталцIаз ахъазгIваца йгьымдзтI: ужвы ПIаз Эльза Москва апны ареаниматологкви анестезиологкви рнаука жвлара, Россия адиализ жвлара дрылапI, Россиялагьи агIвымакъральквалагьи анаука айззараква рпны экспертта дынхитI, наука гIвырата 72 гIаквылцIахьатI, хIкъраль апны йахъазымкIва агIвымакъральквагьи рпынгьи.
Эльза Ибрахим йпхIа лнаука нхара, аклиника апны лынхара йырхъазымкIва арыпхьара уысквагьи дрылапI – Москва йтагылу акъральыгIва медицина йгьи стоматология университет апны трансплантология акафедра дадоцентпI. Аквта телебара атраква рпны ауи айъазара уысквала щарда дгIачважвалитI.
Лтшпсщара мзы амшква рызбжа апхъала апшта лцри акыт апны даъазлитI, лцриква, лъахIыльчва дрылата тшпсылщитI. УадыргIвана ачымазагIвква ъалызпшуа Москва дацапахитI. Ащхъа кыт апны йгIадзынгылыз апсхIвыспачкIвын зны лылахь йгIанылыз архъвыхра баргвква лгвы дымрыдзуата дгIарыцIстI. УахьчIвалагьи лхъагвы аквыпI, йъадзалылшауа гвырбзига змахым ачымазагIвква драйъазуштI, рыгвква багъьата йшкшуш дазабакIуаштI.

Ешерова Муъминат,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki