Library

СынчIва Абаза район йауу АлбыргIан кыт апны уыжвгIанчIви футболасырта шIыц руыхвуштI. Йъаруыхвуш акыт апхьарта апшцIа апны акIвпI. УахьчIвала араъа адгалра нхараква акIвшитI. Афутболасырта злахъдрысуаш ащаца напIлачпаразлуштI. Ауи ахIатырла апхъапхъа адгьыл дрыхIазыруата йазалху аргIапсра нхараква акIвдыршитI.

Физкультурала, спортла, чкIвынргIа руысла Абаза муниципал район аунашвачпарта ахъвшара аунашвачпагIв КIвыждза Руслан йшихIвауала, афутболасырта урата метр 110, ганыта метр 70 амазлуштI. АнапIлачпара щаца ацIахьла ауи зырпхуш агIалцIырта амазлуштI, ауи ахIатырла аспортсменква араъа атшыбжьара сахIатква гъынгьи пхынгьи йапдымрышвтуата асквш ауацIа шабгу йырзакIвыршуштI.

– Абаза район апны абари апш спорт уыхвара збзиру йазалху а-Федерал программа «Асквшква 2006-2015 руацIа Россия Федерация апны афизкультури аспорти ртшауацIнарыхра» акIвапI, – йхIвитI КIвыждза Руслан. – Ажва аламкIва, ари ауыс йбзира алапI Къарча-Черкес Республика а-Хъада Темрезов Рашид – ауи хIресублика ауацIала асабикви чкIвынргIи рыхъазла аспорт штшауацIнахуаш дащтапI. Ауи спортла Россия Федерация аминистр Мутко Витко данйынйа физкультури спорти ртшауацIнарыхра ауысла ацынхари ацацхърагIари йырзынарху ангIалра мачвы ацIарцIатI. Щарда мцIуата хIызлачважвауа апрограмма абзазара йаларыжьуата Чапаевск кыт апны абари апш стадион шIыц руыхватI. Ауи ангIахъыртIуаз хIреспублика ахъада дгIачважвауата ари апш футболасырта арайонква зымгIва рпынгьи йшыруыхвушыз йхIватI. ХIшгвыгъауала, сынчIва асквш алымгаскIва ауыхвара нхараква нахIырдзата хIфутболасырта шIыц агIахътIра агвыргъьахъв айззара акIвхIыршаныс хIылшуштI.

КIвыждза Руслан йшихIвазла, футболасырта шIыц ЙынджьыгьчкIвын кыт апынгьи йырчпитI. Ауи апш согIа абзазагIвчва йызлагIарайдзаз датша программапI – «Газпром – асабиква рыхъаз» – хIва йахьызпI. Ауи аспорт уыхвара ауралагьи аганлагьи йгIауахвырквын квадрат метр 1500 йнадзуштI.

Абаза район апны арат йрапшу аспорт уыхвараква андыргылра аспортсменква рыхъазла амаль шIыц щарда гIаншуштI. АлбыргIан апны йдыргылуа астадион апны арайонла анкъвакъвраква йырхъазымкIва ареспубликалагьи Лагъь КIавкIазлагьи анкъвакъвраква акIвыршала йауаштI. Абаза район асаби футбол гвып агIатгараква гIахIахвырквын апхъахьыла ауат рылшараква агалагьи йшрылахIауа гвынгIвырапI. Ажва ахъазла, хысквша рапхъала «Шарпны» футбол гвып Россия ауацIала йакIвшуз апроект «Сахтан топ» анкъвакъвраква рпны апхьагIвчва рквтала йапхъагылагIвхатI, цIыпх Апсны Республика ауацIала йакIвшуз футболла атурнир апны чкIвынргIа ргвып йапхъахауа агыларта гIаргтI. Ауи анкъвакъвра а-Дуней абаза-апсуа конгресс адгалра йадахIвуата йакIвшатI. Арат ашвапхаква аспортсмен шIаква ргIатгараква йрыуапI, ауаса йхъаду акубоккви амедалькви рпхьадзара гьакIвым. Адуней спорт апьедестал апны згыларта ззыкIыз абаза спортсмен дуква рсатыр йрылалныс лшара зму абанпара шIыц гIадзынгылитI.

Квициниа Инна,

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki