Library

АлбыргIан кыт апны Квача ЩугIайиб дзымдыруа дгьтам. Ауи йныбыжьла сквшы 90 йнадицалхьатI. ЙынцIра бзазара майрата йгьщаквымгылтI, ауаса аугIа йрызйыму абзибара йгьалымдзгIатI. АгIвычIвгIвыс йбзазара апны баргвыра, рхъвыхра щарда дгIарыцIста абараса йгIвычIвгIвысагIа гIащаквхауата йангIаншауа мачIсачIпI. РахIагьи йгвлахIару ЩугIайиб аугIа рыцIагьи драргванхатI, йгвы рзыхътIпI. Ажва гьалам, баргвыпI йтауырдзаныс уымгвала убжата усабихъа анагIвсуа, баргвыпI хъапщыла дуымахымкIва пщгIвысабичва гIадзынуыргылныс, уадрыгIвана ахъазыра ухьыгIахауата. ЙгIариква дрымбахуата гьакIвым (ауи апш хIугIахъа рпны зынзамызадзапI йангIаншауа), аба йцри кытдаъа дгьызбзазум, йгIадзынгылыз йгIариква араъа нхарта рмауата акыт йтыцIра атахъхатI.

Квача ЩугIайиб уыс щарда дрызъазапI, уысдъа дчIвата зынгьи дгьубушым. ЙгIащтIихуа амшIы зны гара гIалихитI, зынгьи айшва алайчпитI. Йъазара дугьи хвыцгьи аргвыргъьитI, ауи йгIалцIла йыпшцIа зынгьи йгьымцырахум. ЩугIайиб йымадзаква йрыуапI амзагIвцIла йгIалху агъвы азаъащата йазйыму. КIавкIаз апны щарда цIуата амзагIвцIла амшIшыла уъапкътлапкъ быгIвква рыхъазла йшъазагIву бергьльыпI. Йаргьи дамайгьдзауата ауи амшIшыла йазыбжу зымгIвагьи йрититI.

Апхъала ЩугIайиб йнапIы йгIацIцIуаз апкъыгIваква пшдзата йчпан, агвхIаркви ахъатарыхъвакви йангIалдзауата йгIатйырсун. Ужвы ауи апш къару шйымахым гьцIайкIуам.

– УнапIыла йучпаз апкъыгIва акыт апны унагIвипхьадза (акыт гIвымаква рпынгьи) йшыгIвну анудыруа насып дупI, – йхIвитI ауи.

ЙшырхIвауа апшта, агIвычIвгIвыс йзахъвдаквыцIуа ауысква ракIвпI йымлыкву. Араса йгIахIахвырквын АлбыргIан кыт апны Квача ЩугIайиб швабыж млыкв ду зму дгIвычIвгIвыспI. ЧкIвынргIа ЩугIайиб йызлайшIпшуаш, швапха злагIайхъырхуаш щардапI: аугIа йырцIаста йгIамгIвайсуа ауыс дазъазапI, агIщара ззырхIвауа гьидырам.

Ешерова Муъминат
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki