Library

Асквш 2012 ноябрь а 22 йгIашIарышвта а 25-дза СогIвым (Апсны республика) апны йцбахауа а-Дуней апсуа-абаза Конгресс акIвшатI.

ХIара Ставрополь ноябрь а 21 хIтыцIын хIджвыквылтI. Адзын кIьаса агъны шгIаргванхауа унардыруата хьшвашварали, пстхIвали, квассали хIнанадасуан. ЙащтагIайуаз ащымта Апсны уыла зхвуа амара акIкIарала йгIахIпылтI, уадыргIвана СогIвымдза амгIва аурала йачIвата йкъагIаркIвауа армала йнаубуз акIадза хIагIакви армала зтолкъвынква тынчта йаквтштшуз атенгьызи хIрыгIвсуан. ХIапхъанчIвиква рышта апны хIъадзасасуаз гIапныта йпхаркIваз амшква щаквгыларкIван. АцIлаква рызбжа адзын ачваквпшыраква йхъдрысызтIхIва гIапын фгIвы гIархъыцIуан ахIвра удзышвагьи йкъагIаркIвуз анахьанат агIайыракви.

А-Конгресс йгIадгылтI Россия (Москва, Ростов, Ставрополь, Черкесск), Трыквшта, Сирия, Германия, Голландия, Франция ргIащтийыгIвчва. ЗымгIва рацкIыс рыцIа йдууын Трыквшта ргвып – 60-гIв раъара надзун. А-Конгресс анхара йалан Апсны а-Президент Анкваб Александр, йапхъахауа авице-премьер Вардания Индира, йбергьльу аурышв политик Бабурин Сергей, апхъала Сирия апарламент йалаз Шараф Абаза (Марщан), адуней рыцIа йъазадзу ахирургква йрылапхьадзу Ардзынба Джьамльадин…

Афырра а-Мемориал апынгьи амхIаджьырква рсин апынгьи ахIврапшдзаква анщтарцIа амщтахь а-Конгресс йалакваз Апсны Республика а-Министрква р-Кабинет йнашылтI. Араъа йауацIыху алачIвара акIвшатI. Ауи ВААК апрезидент, академик Шамба Т.М. йгIахъитIытI, уадыргIвана ажва гвыхътIыла йгIайззакваз тшырзынайырхатI ареспублика апрезидент Анкваб А.З. Ауи ареспублика аполитика-жвлара бзазара ахъата щарда дгIарыквчважватI. РыцIа йхъадата пщуыскI гIаликIгIатI:
1. Стратегияла йгIауахвырквын России Апсны республики йадкIылата йащтаныкъвуштI. АгIвымакъральква рахьыла мразыра гIаншапIхIва йымшвауата ари акъраль аджьауапкIра рыхъвдаквырцIан Апсны ахъахвитра йацыркIтI, ауи ахъахвитра рхчитI, анахьанат акъральква рпахь апсуа угIахъа рхвитнагIакви ргIальаматракви йрызгылапI.
2. Апсуакви Апсны ахвитнагIа рыцызхчаз ачеркескви анцIрала йадкIылазлуштI. Ауаса Грузия апны йгIадрыцIсуа “ачеркес уыс” “КIавкIаз апны аквыргъвгъвараква ргIаныршара йазынарху политика авантюрапI”. Ари ауыс ауатыкв йгIатазгакваз хачIвыта йдырхъйауа ачеркес жвлари Абхазии Россия йырпшIадыргылныс, сквшышвкIи бжакIи рапхъала йаъаз агIаншараква уыжвгIанчIви Россия аладыркъванчаныс акIвпI.
3. Ареспублика аэкономика швабыж йалазрыхъвашаз айсра ацIыхъватшараква ужвыгьи йгьгIарылымцIстI, ауи йгIалцIла алшараква гьдууым. Ауи ахIатырла адиспораква ркъару Апсны аправительства акъару йгIаларцIауа йалагандзыкIьара рапхъанчIвиква рбзазартаква рахьыла абазакви апсуакви ррепатриация ауыс льальаркIвата йакIвшуштI. “ХIара хIгвыгъараква йъартабазазауа акъральква рпны дахIвра ду ззыгIатгаз хIхаквлагIвчва ракъыльпшгIари ркъару алшаракви хIрайгвгъитI”, – йхIватI апрезидент йгьи йгIаликIгIатI: “Абари акъару гIалцIырта амагIны швабыж йдупI”.
4. Ауыс араса йъану ашвхIаусыгIвала Адуней апсуа фонд агIаныршара ауатыкв йгIаталтI, йшпакIву ухIварыквын экономикала йкъарусызу, йрыцхIу акъраль заджвгьи дазгIацапахныс йгьиуашым, ага ауи апхъанчIви псадгьылызтынгьи.

ВААК агенеральна секретарь Аламиа Г.Ш. йауацIыху йгIачважвара апны йшгIаликIгIазла, а-Конгресс ангIандыршуз адуней йыкву абазакви апсуакви зымгIва радкIылра ахачIвы архъйара йазынархан. Йаргьи ари ажвлара организация гIаншищтара йцIуа асквш 20 руацIа агIвымакъральква йыртабзазауа амхIаджьырква ртынхаква рапхъанчIви псадгьыл тшазыгIанадырхатI. “Апсны йгьи Къарча-Черкес йыртабзазауа апсуа чкIвынчви абаза чкIвынчви агIвымакъральква йыртабзазауа рыквлагIвчви абадырныс, йащтаныкъвауа йалаганыс хIацхърагIатI, йхIылшатI, агIвымакъральква рквтала йынхауа адуней организацияква рыуа щарда абазакви апсуакви рдиаспораква ъатабзазауа акъральква рунашвахъцIагIвчва йызнымкIва хIрынйатI. Анйараква рпны адиаспора рбзазара уысква хIрылачважватI, ауат акъралькви Апсны республики ращтаныкъвара уысква ауатыкв йгIатагIгатI”. Аламиа Г. йшгIаликIгIазла, апхъахьыла а-Конгресс анхара йаланакIуата йгIандыршаныс рмурадпI апхIвыскви чкIвынргIи рдуней организацияква, аугIахъа уасаражвква рдуней совет.

АлачIвара апны агIащтийыгIвчва гвыпква рунашвачпагIвчва зымгIвагьи гIадырчважватI.

ЙащтагIайуаз атшын Апсны а-Президент й-Администрация апны анйара акIвшатI. Араъагьи Апсны ажвлара-экономика уыскви, аполитика уыскви, адиаспораква руыскви ауатыкв йтан. Ари айчважвара апны йызтахъыз зымгIвагьи рыгвгIанаграква хвитта йырхIваныс рылшатI, йгьмачIмызтI рбыжьква андухуз, амакIыраква ангIарбжьашвуз. Араъа йгIаргыз ажванахъаква а-Конгресс анхара агъьчIвра йахъвушта йаъапI.

Щыбжьанщтахь а-Конгресс йалакваз асасчва Ткъварчал, Очамчира къалаква рпны йаъан. Араъа ауат рыла йабаз абзазара аъаща гвырбзигакIгьи гьаламызтI: ашварахъва йнанауахвыз адгьылква, йрыхъвашата йнымхахуа арачва завод ду, азаман щарда цIуата йаквыргIапсхым абазар, автовокзал. Йара араъа уыла йгIанакIуан ачIахъварыдзырта шIыц, Ткъварчал апны йдырчIаджьгIвацаз асабигIзарта, Очамчира апны шIыц-шIыц йыруыхвахыз акультура Тдзы… Абари ашIырпшыра йдууым ареспублика апны ажвлара-экономика бзазара агIащаквыргылхарала ауи акъару зквымхъауа нхара ду шаъаркIваз нахвата йгIанарбатI. Датша хъатакIла, Апсны абзазара анщаквгылхра асхъан йшаъазлуш асуратквагьи узымбушта йгьаъамызтI. Араъа йатаркIвах ареспублика аэкономика агIащаквыргылхра йазынарху акъару ззадкIылуаш а-Дуней апсуа фонд агIаныршара ауысла йгIаргыз ажванахъа йатахъдзата ауатыкв йшгIаталыз гвынгIвырахатI.

Зтшын хIгIаджвыквылхуаз, ноябрь а 25, амш чвщын. Щымта ква гIакIапссауа йалагатI. Асасчва рапхъанчIвиква рышта йтыцIхта йъамцIыцIхуаз Апсны арынашхыйауазшва йаъан.

СогIвым хIгIатыцIхта хIангIамгIвайсхуаз хIара, Ставропль йгьи Къарча-Черкес йрыуаз агIащтийыгIвчва гвыпква, Нижние Эшеры кыт хIгIашIасын уыжвгIанчIви апсуа къральыгIвара гIанзыршаз, Апсны Республика йапхъахауата йапрезидентыз Ардзынба Владислав квырмыш ду йзыхIчпауата йнышвынтара апны ахIврапшдзаква щтIахIцIатI.

ЧкIала ПIитIа,

“Абаза Къраль” сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki