Library

Октябрь а 22 СогIвым апны цIаста йщаквгылу астудентква йхвбахауа р-Дуней конгресс «Интердиалог» акIвшатI. Апхъала апшта аконгресс Апсны къральыгIва университети Лобачевский йыхьыз зхъу Нижегород университети йадыргалтI. Нижегород область аправительстви Апсны республика аправительстви ауи адгалра йацхърагIатI. ЧкIвынргIа рфорум студентта 250-гIв райхIа гIадгылтI: Апсны къральыгIва университет йапхьауата, Нижегород университет йапхьауата, Приднестровье, Сирия, Сербия йгIартыцIта. Йапхъахауата афорум йалазланыс йгIадрайгватI Трыквшта йтабзазауа апсуа диаспора ргIащтийыгIвчва.

Астудентква йхвбахауа рфорум анхара хнархаракIла йахъыхацIыхын: арыпхьара-бжьара ауысла, аршIыйара ауысла, ажвлара руысла. Аконгресс адгалагIвчва йшырхIвазла, аконгресс апны уыс хъадата ауатыкв йтаз арат ракIвын: акультура ауысла ащтаныкъвра щаквгылра, ажвлара радкIылра, аугIахъа культураква ргIахчара. БыжьмышкIы руацIа астудентква рфорум апны йапшым абжьара тренингква акIвшатI, агIарбартаква, аршIыйара хъвлапынква адыргалтI. Аконгресс йалакваз йапшым аугIахъаква ркультураква тшрыхадыргIвазаныс рылшатI.

Адуней конгресс акIвшауата чкIвынргIа футболла, волейболла, тшрыгIврала анкъвакъвраква йрылалтI.

Апсуа диаспора рыхъазла ауат рапхъанчIви псадгьыл аларпшыртаква, атурых йапщылу ахъмаштылра синква, ашIыпIаква ддырбауата агIамдараква адыргалтI, акытква йгIарыкIвыргашатI. Араъа аъахIыльчва абайаухныс, шIыц-шIыц йабадырхныс рылшатI.

Трыквшта йауу апсуа диаспора йрыцта йгIайыз Эран Ходжаа йшгIаликIгIазла, щарда цIуата йымаз агвтара гIайыдахIвтI – йапхъахауата йапхъанчIвиква рпсадгьыл дазгIайтI, йбатI, дыквгIамдатI. «ХIара хIхъа аладухауата апсуа чкIвынргIа тшрылахIпхьадзитI. ХIара араъа йапхъахауата хIгIайызтIхIва хIгвыгъитI апхъахьыла йызнымкIва хIшгIайлуш», – хIва йгIацицIахтI Эран.

Аконгресс анхара йалгауата йцIыхъвахуз ахъвлапын агIащтийыгIвчва гвыпква злаз айззара ду акIвшатI. ЧкIвынргIа йапшым акъральква ркультураква тшрыхадыргIвазатI: ашваква, агIахIвраква, аугIахъа фачIвпкъыгIваква, ауат рмацIауыща агьиква.

Асасчва зымгIвагьи адгалагIвчва йгьи апсуа чкIвынргIа швабыжта йшырзыразу гIархIватI. Рыуа дзачIвызлакIгьи алахIвара шIыцкви Апсны ашта апхари йгвы анцIрала йгIатахатI.

Асида Квициния,>

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki