Library

Сентябр а 2 атшын а-Дунейла адкIылара «Алашара» анхагIвчва Къарча-Черкес абаза кытква рапхьартаква рапхьагIвчвагьи рарыпхьагIвчвагьи апхьара сквшшIыц агIаталымтала йрайхIвахIвтI. Адырраква ры-Мш йадахIвуата йакIвшаз айззараква рпны «Алашара» адкIылара анхагIвчвагьи аэкспертквагьи ауи анхара шакIвшауа гIархIватI, «Алашара» адкIылара апрезидент Эгьзакь Мусса ХIабальа йпа йхIвахIвра сальамшвъа йгIапхьатI.


Эгьзакь Мусса арыпхьагIвчва, апхьагIвчва, анчва-абачва араса тшырзынайырхатI: «Сгвы йгIатыцIуата апхьара асквшшIыц ангIаталуа адырра Амшла снашвайхIвахIвитI. Йджьащахъву адырраква рдуней апны зсабихъи зчкIвынхъи насыпла йырчвыз зымгIва рыхъазлагьи ари агвыргъьарамш лкIгIара амапI. ЙгIадзынгылуа абанпара швпахьла йджьащахъву амгIва гIащтIалитI. Ауи амгIва апны швара ашIыцра гIальаматква, амадзаква щардата шврынйуштI. Швара ашIаквагьи хIуагIахъа рпахь ахачIв дуква шгылу швылашвхIвара стахъыпI. Ауат ахачIвква рырхъйара, абзазара ралажьра швкъаругьи швдырраквагьи алашвцIара атахъхуштI. Ауи ахъазла швамайчуата швакъыльгьи швылшараквагьи йрылашвырхIа, швгватшныта швапхьа, швапха пшдза гIашвырба, хIапхъанчIвиква ртурых, рцIасква бзита йшвырхъвых, йшвшвырдыр. ЙгIаталуа апхьара сквшшIыц апны адырра шIыцква швдыргвышхвауа, уагIахъа тшдырра швымата, тшшвзадкIылуата, швзацIагылуата абазазара апны чIвырхъа багъьала швымгIвайсра швзыстахъпI!»
«Алашара» адкIылара рпрограмма «Аспорт атшауацIнарыхра» апкъ йтата Къарча-Черкес республика абаза кытква рапхьартаква аспорт пкъыгIваква рзырхвгIатI. Физкультурала апхьара сахIаткви аспорт анкъвакъвракви рыхъазла апхьартипхьадза рыцIа йыззыбжу атопква (футбол, баскетбол, волейбол йзласуа), теннис йзласуа астольква, хъыпага, бадминтон агьиква рзыргатI.
Апхьартаква рпны асабиква тшырзынадырхауата ахIбачва хIвахIвтI, ауат адырраква шрыларкIуашла, аспорт штшадыркIылуашла, рцри бызшва, рапхъанчIвиква рцIасква, руагIахъа турых рдыруата, йынкъвыргауата абзазара мгIва чIвырхъа багъьала йшалачIвырхъушла йрайбжьатI.

Квициниа Инна
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki