Library

Зуыс йазъазу ахореограф, Къарча-Черкес республикала гIатгара зму артист Гаги Мурат Владимир йпа апхьарта апны йгIвбахауа акласс дыцIаркIвата КIавкIаз гIахIвраква йымагIальаматхатI. ЙшгIайгвалашвахуала, данчкIвыныз амузыкагьи агIахIврагьи йалидыргIуз гьаъамызтI, ауаса амакъымква рритми агIахIвчва ъазаква йгIадырбуз агIахIвракви швабыж дхъырхуан. АчкIвынчваква йгIарныпщуаз ахъацIари ахIвссаква ргIахIвыща пшдзи угвы йаладырхIауата хIапхъанчIвиква рдунейпшыща уаззырхъвыцуаз алахIвараква гIадрыцIсуан. Ауи акIвзарын апхъала агIахIвра магIны ду азырбауата агIвычIвгIвыс йнашхи йлахIваракви йыргIарбагата йзаъаз.

– Адунейла зыхьыз бергьльу агIахIвгIвы ЕмгIвыкъва Уали йгIаджвыквцIарала съацIаз апхьарта апны агIахIвчва рансамбль гIандыршатI, – йгIайгвалашвахитI Гаги Мурат. – Ансамбль апны КIавкIаз агIахIвраква ракIвын йыззырбжьуз. Ауи апш амаль агIвсщт йауазма, сцан тшандсырцIатI. АгIахIвраква руыс цIолата йыздыруа Уали швабыж бзита дхIыдынхалуан. ХIаргьи ауи йапшта агIахIвра хIазъазаханыс хIтахъыта йхIйырбуз зымгIва хIгвынхIкIылуа тшыгIбжьун. АгIахIвра хIдунейпшыщагьи апсахуата пшдзара щарда гIахIыланацIун. ХIара хIансамбль «Абазинка» – хIва йахьызта афестивальква, анкъвакъвраква щарда хIрылалуа хIалагатI, апхъагыларагьи гIатыгIгун. УадыргIвана хIунашвачпагIв йара-йара кIьыдата адунейла йакIвшуз агIахIвра анкъвакъвраква дрылалуа джвыквылтI. Ауи йгIалцIла, йшатахъу апшта дхIыдынхалныс заман гьизымхъахуазтI. Ансамбль алымпIлахныс ахъазла Псыжв кыт акультура тдзы аунашвачпагIв Джьардис Аскьарби дхIыдынхалуа далагатI. Йаргьи йыквлата агIахIвра йазъазахаз ахIбачвагьи йырдыруа закIгьи хIагъьарымщауата йхIыдынхалуан.

Апхьарта дшапхьаркIвуз ачкIвын йгвы йтайкIытI – абари аршIыйара ъачIвагIа дапхьата даланханыс. Йаргьи йгвала гIайыдахIвтI – агIахIвра йбзазара йахъв хъадахатI.
Апхьарта амщтахь Мурат Черкесск йтагылу амузыка училища гIахIврала ахъвшара дыцIалныс йгвыгъан, ауаса ауыс хIадагIвача гIаншаракIла тшапсахтI. «Эльбрус» къральыгIва ансамбль асолист Тарасунов МухIарби «Абазинка» апны йгIахIвквуз ачкIвынчваква йззычпу йдырбаныс йрайгватI. Архъвыхраква дахIврала йгIарыцIсыз Гаги Мурат асквш 1991 йгIашIарышвта жвыхвсквша ахIа дыртамкIва «Эльбрус» агIахIвчва дрыларцIатI. Араъа дшынхузымцара йгвы йтаз мурад щарда йзырхъйатI. Ага дчкIвынызтынгьи йъазара йшалайырхIуш дащтан, ансамбль фестиваль дуква йрылата йъагIахIвуаз гвышхвара ду гIайыланацIун. ЙыквлагIвчва драпшдзата йныбыжьла акъвырльыкъвхара ангIайыквшва арра дцатI, йборч йырхъйан дгIацапахтI. Дыззъазаз ауыс дадгылхтI. Ауи азаман ансамбль йаунашвачпагIвыз Таниа Валерий агвып йрылаз ачкIвынчви ахIвсси абакI йапшта драйгвыгIвуан. Ауи ансамбль агIвымакъральква рпнынадзара йгата рыршIыйара гIадырбаныс амаль гIайауан. Йпрофессионалхара йахъазымкIва рхIальшанква шпшдзахушызгьи ацIыхъва дтагылан ауи.
Йджьаущушта йгьаъам КIавкIаз агIахIвраква адуней апны йшбергьльу, аугIа бзи йшырбауа. Франция апны концерт артуата Трыквшта йауу хъацIа импрессариокI рыршIыйара хIагIа аниба йцришта йрайгваныс гIайтахъхатI. СквшквакI анахъыцI Таниа Валерий йгIанйыршаз ансамбль шIыц «Нарт» Гаги Муратгьи дрылата йынхарныс Трыквшта йцатI. Абарауаса Псыжв кыт йауу ачкIвын атрыкв къала Мармарис дтанагатI. Ауаъа йъадзатанхуз асквшква руацIа акъала абзазагIвчвагьи асасчвагьи «Нарт» рыршIыйара бзита йырдыртI, КIавкIаз агIахIвраква бзи йырбатI.

– ГIвымакъараль уаныъу асхъан уцришта, уцриква, уцри бызшва гIаугвалашвитI, – йхIвитI Мурат. – Ауи йгIалцIла хысквша анцIы агIахIвчва зымгIва гIацапахтI, ауаса хIунашвачпагIв ауаъа дынханыс дгIанхатI. Араъагьи уысдъа щарда хIгьчIвамызтI. «Эльбрус» унашва ахъызцIуз Хвби Хусей дгIахIыхIватI ансамбль хIрылата Адыгея апны йакIвшушыз афестиваль хIалалныс. Йдыруан ауат рпрограмма агIахIвраква хIышрыхагIвазаз. Абараса «Эльбрус» апны сынхауа саталагахтI. СквшквакI рымщтахь швхIаусыгIвакIла жвежвыгIв хIнадзауата ансамбль хIгIарылцIхтI. ХIгвы хIымрыдзуата ауи асхъан ансамбль гIанзыршаныс змурадыз зыхьыз бергьльу ажвлара уыснкъвгагIв Дер Станислав тшацизынахIырхатI.
Айчважвараква рымщтахь Трыквшта йаъаз Таниа Валерийгьи дгIайрайгван гвыпкIта хIынхауа хIалагатI. Араса агIахIвра театр «Меркурий» гIаншатI.

Мурат йшихIвауала, Дер Станислав ансамбль анхара штшауацIнахуаш дащтан: йзыгIвнанхуш пещ рзалихтI, йпшдзу афашаква рыздирыдзахтI, рконцертква ракIвыршара адигалуан. Ансамбль къральыгIва статус шамазлуш дащтан, ауаса дгьахамдзахтI. Ауи адуней анихIваджь амщтахь агIахIвчва руыс баргвхатI. Ауаса ргвы гьдымрыдзтI, бзи йырбуз ауыс гькIадымрышвтI. АкъральыгIва филармония апны йынхауа йалагатI. Ауат рыршIыйара бзи йызбуз гьмачIгIвмызтI, йгIарцхъагIуш аугIа бзиквагьи гIаншатI. Ауат дрыуапI РТИ завод аунашвачпагIв Тльабыча Родион. Ауи йзыгIвнанхуш пещ гIаритатI, арчIаджьра нхараква дара ркъарула йакIвдыршатI.

– ХIара ансамбль шамцIымпIлушгIваца акIвын хIызхъгвыргIвуз, ауи ахъазла йхIылшуз зымгIва хIчпатI. Батдыев Мустафа ареспублика данапрезидентха хIансамбль къральыгIва статус азыщаквйыргылтI. Ауи асквш 2007 агIан йгIаншатI, – йхIвитI Мурат.

ЙшыгIбауа апшта, Гаги Мурат йыршIыйара нхара швабыж йбайапI, йауацIыхпI. Ауи йынцIра апны аршIыйара амгIва гIалихын мышкIымзара-мышкIы дгьамайгIваджьхтI. Асквш 2010 агIан Мурат ансамбль апны балетмейстер хъадата дынхарныс йангIайыхIва «момо» гьйымхIватI. Йара ауи асквш агIан «Къарча-Черкес республикала гIатгара зму артист» чахIныгIва хьзы гIайквнадыргатI. УахьчIвала Мурат ахIбачвагьи айцIбачвагьи агIахIвра йазибжьитI. ЦIыпх ауи агIахIвра йазибжьаз, дыздынхалыз апхIвыспа чкIвын Кнухова Эстела агIшвгIвы алата Париж апны анкъвакъвра анакIвшуз йгIвбахауа агыларта гIатылгатI. Абари агIатгара йгьахъазым ауи йгIапсара злу. Мурат йуыс швабыж бзи йбитI, хIауадаъа бзазара шаъам апшта гIахIврадаъа йбзазара йыла йгьйызгIацIажьуам.

Джьандар Залина,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki