Library

Сентябрь а 1 Мало-Абазинск кыт апхьарта ахъазла мыш дууын: Адырра Амш йаццауата араъа ддыртлапIун апхьарта зыхьыз ахъу ауысагIв, агIвгIвы, ажурналист Цекъва Пасарби Квчыкв йпагьи. Йшбергьльу апшта, ауи абаза литератуара ащата щтIазцIаз агIвгIвчва дрыуапI. Ауи апхъала ари апхьарта апны дынхауата сквшщарда руацIа йкъаругьи йдырраквагьи йгIайрысабапуан.

СынчIва Цекъва Пасарби сквшы 90 йхъыцIуашын, ари аюбилей йадахIвуата апхьарта апны йакIвшаз агвыргъьарамш рахIагьи тшауацIнахтI. Цекъва Пасарби квырмыш йзырчпаныс, арыпхьагIвчви апхьагIвчви Адырра Амшла йрайхIвахIвырныс ахъазла сентябрь а 1 апхьарта йгIадгылтI Грушка кыт амуниципал гIаныршара ахъада ШвхIагващ Артур, арыпхьарала Адгьа-ХIабльа район ахъвшара аметодист Кундохов Виталий, Россия агIвгIвчва р-АдкIылара йалу, сквшщарда абаза газет йаредактор хъадаз Хвыжь Ращид, ажвлара мгIвайсра «Абаза» апредседатель йцхърагIагIв Чагва Щорс, ареспублика гIвырагIацIщтырта аредактор хъада Щбзыхва Лариса. Ари атшын араъа йаъан Пасарби Квчыкв йпа йаргванкви йъахIыльчви. Ауат апхьарта согIата компьютер рыртатI. Баскетболасрала аклуб «Эльбрус» рыхьызла абжьагIвы хъада Меремкъвыль Юрий апхьарта согIата атопкви чгIвыча комплекти рызгIайгтI.

АпхьагIвчва асасчва тшырзынадырхауата Цекъва Пасарби йынхара-бзазара йауацIыхта йгIаквчважватI. Араъа йаъаз щардагIвгьи дара рхъатала ауи бзита дырдырхуан, дгIаргвалашвахуата пхата йылачважвун.

– Сара сакIвын хIаба йуысаква йапхъахауата йызйыргIалуз, – лхIватI Пасарби йпхIа Елена. – Ауахъ шабгу закIы дамыртынчуата атдзы ангIамидуз ащымта араса шихIвуш здыруан: «Лена, бгIагылта ари баздзыргIвыстI», – хIва. АпхьагIвчва дрынйаныс данцуз щардала сйыцйырцун, йлитература нхара шабгу сыла йыцIан. Ауаса сгьимыргIачIвузтI. «Абзазара уысква рпны бгIасмайгвгъан, бапхьата бара-бара бымгIва рхъйа», – йхIвалун ауи. Абарат абжьагажваква сынцIра апны агангьи йгIасыхъватI. АгIвычIвгIвыс йпхыцIа йнапIыла йанйыргIалхуата рхIвитI, хIабагьи абарат рапш сатыр зны йгIвытI: «…мгIва майракIгьи сгьазымпшгIузтI – снапIыла сара-сара йысуыхвун». ХIаба абзазара швабыж бзи йбун, ауаса йницIыз гьщардам. ХIара, йгIарикви йъахIыльчви, ауи дызхъмаштылуа, пIатIу йыквызцIауа зымгIвагьи швабыж хIырзыразпI.

– Айсра аналга агIамта абаза гIвгIвчва йрыуата йапхъахауата акъраль агIвгIвчва р-АдкIылара йнарахвыз Цекъва Пасарби йакIвпI, – йхIватI Хвыжь Ращид. – Ауи йроманква, йхабаргIвыраква, йуысаква – айшыста йухIвушызтын, йлитература нхара швабыж йцIолан, нархара щарда аман, ауи хIыуа дзачIвызлакIгьи дарыпшдзауата хIхъа алахIырдыуитI. Сара ауи йыршIыйара йауата датша хъатакIгьи салачважварныс стахъыпI. Айсра амщтахь счкIвынта хIаба ахъвмарраква рпны сйыцйырцалун, ауаса ауаъа абаза бызшвала ашваква анбыжьгуз мачIдзан. Цекъва Пасарби йалкIгIата абаза ашваква ргIащаквыргылхри ртшауацIнарыхри руысла щарда йчпатI, ари ауыс къару ду алайцIатI.

Апхьарта асасчва пхата йгIаргвалашвахуан асанрыкьтара ацирыхIвачвумцара Пасарби йаргьи ашва шихIвуз. УахьчIва йъагIадзазгьи датша закIгьи йузашIмырпшуаш абари асанрыкьтара бжьы щардагIвы рлымхIа йтггIаркIвитI, Цекъва Пасарбигьи дацгIаргвалашвауата. Йылшараква хъата щарда ъарымаз тарымщахIауата йыршIыйара джьащахъва рыцIа-рыцIа тшауацIнахуан. Абар лгIагвалашвахраква рпны Тлабыча Мира ауи дшйылачважвуз: «Пасарби дыгIвгIвдууын, дуысагIвын, ауаса йпхыцIахаз азаман швабыж йбаргвын, рыцхIагIа щарда йыла йыцIстI. Сшхъвыцуала, хIапхъахьыла ауи йыршIыйара цIолата йззырхъвыхуаш, апшдзара абгата йхIзыгIахъызтIуаш апхьахьа гвыбзыгъа гIаншуштI. Ауи йпроза гIвыраква рыхв дупI, ауаса сара кIьыдата йуысакви йашвакви гIалскIгIарын. ЙыршIыра апны ауат ргыларта кIьыдапI. Ауат ашваква рахIа датша закIгьи даднымхалыргьи абаза культура атурых анцIрала дгIалахушын. ХIара зынгьи йхIхъхIраштылра гьатахъым Цекъва Пасарби шйакIву хIапхъанчIви уарадква рщарда гIащаквзыргылхыз, шIыц-шIыц ауат псы гIархъазцIахыз…»

АгIачважвараква рымщтахь Цекъва Пасарби йбжьы дута йгIагатI. Датша бжьыкIлагьи йуызмыргIващуш ауи апшкара, атIатIара, апшдзара щардагIвы рыладзква гIанарыцIстI. Апша пха тшгIащтIнахын Пасарби йбжьы хъарата йджвыквнагатI – швабыж бзи йбуз йцри ТIапIанта кыти Къазма архъакви йгIарыкIвшауа.

Квициниа Инна
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki