Library

Асквш 2012 октябрь а 12 Ставрополь край аугIахъа культура автономия йапхъахауа ргIаджвыквцIара чкIвынргIа йырзынархата дахIврала йакIвшатI. Ставрополь йтагылу «Скиф» ресторан апны йгIадрайгватI араъа йапхьауа абаза чкIвынчви ахIвсси 150-гIв йнадзауата йгьи Нарцана, Къарча-Черкес, Апсны рпны йынхауа чкIвынргIа рыжвлараква ргIащтийыгIвчва.


ЧкIвынргIа хIвахIвра йгьи бжьагажва ажвала тшырзынадырхатI акрай жвлара апредседатель Чагва Армида Хзыр йпхIа, чкIвынргIа руысла Ставрополь край аунашвахъацIарта патриот бжьарала аквта аунашвачпагIв Мухин Сергей Владимир йпа, аугIахъа йгьи акъазакъква руысквала Ставрополь край аунашвахъцIарта анхагIвы Полонский Григорий, Ставрополь къала абазаква ркультура квта апредседатель Къвырча Владимир ИсмагIиль йпа, аэкономика наукаква рдоктор, Ставрополь къральыгIва агроуниверситет апрофессор Йуан ЧагIбан ХIаджьбакьыр йпа.


Ахъвлапын дрыпшдзатI ашвахIвагIвчва Амирина, авокал ъамапсыма гвып «Абазгьква», агвщтIыхга гIахIвра макъымква акъвабыз йгIатызщтуаз Напщ Аминат. Агваран лахъвгIахъасракIгьи йгьымцырамызтI. ЧкIвынргIа зылапш йыцIаз агIахIвчва ъазаква йамайчуата ауат аугIахъа гIахIвыща алкIгIараква, амадзаква йырзырбжьун.

Гватра кIьыда рызрыман йапхъахауа акурс йыцIалыз астудентква. Ауат «абаза студент» рыхьырцIауата йазалху ахъвмарра рзакIвдыршатI. Анйара йалаз зымгIвагьи аквшахIатта ауат ныха рхIватI рцри бызшва зынгьи йырхъдымраштылныс, абаза угIахъа цIасква пшдзата йынкъвыргаланыс, айщчвари айгвари йрызцIабыргызланыс, ахIбачва-уасаражвква пха рыквырцIаланыс.

Ахъвлапын рыпшдзага кIкIарала йалдыргатI. АжвгIванд апны йзигIву акIкIара суратква йырпшуаз чкIвынргIа йзырчвуаз алахIвараква рзымкIуата «Анчва дыбзыразхатI, Армида!» – хIва йацшIакIта йхIвхIвуан.
АчкIвынчви ахIвсси йкьахвтI, йгIахIвытI, йабадыртI, ауи йахъазымкIва апхъахьыла мурад пшдза щарда лызхуа, гIаджвыквцIара бзи зщарду угIахъа культура жвлара акрай апны йшгIаншаз, йшынхауа ахабар рдыртI. Ажвлара анхара тшадыркIылра, йацхърагIара шатахъу рылархIватI. Ужвы йащтагIайуата Ставрополь край апны чкIвынргIа рыжвлара агIаныршара, ауи анхара тшауацIнахуата йадгалра ауыс ауатыкв йтапI.

ЧкIала ПIитIа,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki