Library

«Къарча-Черкес» телерадиуакомпания апны йынхауата зыхьыз бергьльу аоператор Табыща Роман абаза кыт ТIапIанта дгIатадритI. Арра къвырльыкъвхара амщтахь Черкесск апны атехникум дапхьатI, ауаъа йгIацIигаз аъачIвагIала сквшквакI дынхатI. Асквш 1987 агIан Роман унагIва далалын рыцIа гвышхваракI зпщылу нхартакI дазыпшгIауа далагатI. МышкIы хIадагIвачата ауи агIан Пятигорск телебара студия апны йынхуз Брынза Григорий дйабадыртI. Ауат ацынхауа йалагатI, апхъапхъа оператор йанхъихуаз арылашара ауысла дицхърагIун, уадыргIвана йаргьи йазалху акурсква дгIарылган операторта йапхъахауа ачIвырхъаква атиптI.

Ауыс йазгIашIыхаз агIальаматра даргвышхвауата йъачIвагIа шIыц цIолата тшахайыргIвазан апшыгIвчвагьи ргватра йхъихуаз асуратква йырзынадырхатI. Асквшква агIвсуан, йаргьи Роман йыхъазла ари анхара бзазара ъачIвагIата йщаквгылтI. Алыгажв йзымкIыз аладз, ан лпшвырхъыччара, йгвлахIару асаби хъыччара, ахIбачва рылапш нашхыйаква, йчвалатшычпарам агвыргъьара – абарат алахъвгIахъасраква зымгIва узыгIакIра атахъыпI, ауатдаъа ажурналист йажва акъдзыра ацIцIитI, ателебарагьи апшыгIвчва агхитI.

Й-90-хауа асквшква рагIан КЧР апны йапхъахауата телебара студия «Канал-3» гIаншатI. Араъа Роман сквшквакI руацIа операторта дынхатI. НТР (Ареспублика аугIа ртелебара) ангIанша амщтахь Табыща Роман ауаъа оператор ахIбата дынхауа далагатI. Йынхара йапщыла йъатынчмыз аштаква рпынгьи дцалун. Чачан айсра йашымтата ауаъа операторта дынхатI.

Араъа Черкесск йтайгаз асквшква пхата йгIайгвалашвахитI. Ауи анцIралагьи йгвы йгIатахатI аконтрабас йапщылата йакIвшаз аэксперимент. Ажурналист Брынза Григорий дйыцта аурам йгIаквлын йагIвсквуз аугIа аконтрабас согIата йрыртныс йалагатI. Агород аъарагIвшара гIамырдазапI, ауаса асогIа найахвныс заджвгьи йгьйымуытI. Ауаса агъыцIара йдыргылта тшпсырщаныс тIакIв йанчIва аконтрабас ргъычтI… Амшыркъвараква рльажьахызма? Ауи хъвлапны амузыка училища йгахра атахъын. Абарат йрапшу агIаншараква ауи йынхара-бзазара апны йгьмачIмызтI. Ауипхьадза аугIа раъащаква рыцIа бзита йылайхIвун, ргвы дзытапшуан, рыцIа йджьащахъвата йпхьадзузгьи апшыгIвчва йдйырбахныс йылшун.

ЗымгIва кIайпсата нхаша ду зпщылу нхартакI далаганыс шгIайтахъхалузгьи гьцIайкIуам. Ауаса закIы дгIашIанакIуан. ДгIашIазкIуаз амагIну ажвакIла йгьузыхIвушым, апшыгIвчва драйжьара гьитахъымызтI, ари анхара апны йхъатала йылшауа датша заджвы йылымшушшва йбун. Апхъала акамераква руыс ага йбаргвызтынгьи дзачIв операторызлакIгьи дызмыргIващауата йызхъыхыз асуратква анахьанат йрыламдзуата йгIащаквхитI.

УахьчIвала Табыща Роман «Къарча-Черкес» къральыгIва телерадиуакомпания апны дынхитI. АцIх йаласкIьакIьахьата рпны дгIайхитI, ателевизор апахь дчIвитIта йгIапсара злайцIаз анхара дапшыхитI. Йаразаджв йакIвпI йыздыруа акадрква йрыламшвауата йгIанхауа: агвыргъьара аладзква, йгвыгIвмыгIву алапш. Запытла йшцауала, ауи апшыгIвчва йырзынамдзауа заджвы йзахварапI йа йхьыгIапI. АгIвычIвгIвыс йынхара апны къару гIайылазцIауа йунагIва апхара шакIву Роман кьангьаш гьазгIайгуам. Арахьари ахъатала атгIачва ракIвпI бзи йубауа анхара рыцIагьи тшадукIылныс узыргвышхвауа. Афыр шIыцква урынйата, агIаншара джьащахъваква уыла йабата утгIачва уанырзгIацапахуа йагъьта йаъайа!

Ешерова Муъминат, джурналистпI, Черкесск.

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki