Library

Октябрь мыз ацIыхъва СогIвым апны гIвтланыкъвакIла йыздынхалыз апроект «Акультура агIамтаква: Апсны – Россия» ауысла «стол гьажьы» акIвшатI. Айчважвараква йрылан акультури аршIыйари рынхагIвчва, акультура ауысла Россия йгьи Апсны рминистерстваква ргIащтийыгIвчва.

Ари апроект асквш 2009 агIан культура ауысла Россия йгьи Апсны рминистерстваква ангIалра мачвы анацIарцIа амщтахь абзазара йалалуа йалагатI. Ари ангIалра абзирала хысквша руацIа агIвкъралькIгьи йгIартыцIыз аршIыйара гвыпкви зыхьыз бергьльу акультура анхагIвчви алата анйара 83 акIвшатI.

ХачIв хъадата апроект йархъйауа ауагIахъа культура агIатгараква агIвымакъральква ахадыргIвазаныс акIвпI. «АршIыйагIвчва гвыпква Россия абзазагIвчва хIышта акультура абайара ддырбитI», – йхIватI культурала Апсны аминистр Гунба Бадра.

Айчважвара йалакваз рыуа дзачIвызлакIгьи ари йапшу агIаджвыквцIараква сабапта йгIанагуа аунашва рхIвун. Москва апны Некрасов йыхьыз нкъвызгауа абиблиотека абзирала Апсны абиблиотекаква книга зыкь 28 рзазыркIкIтI. СынчIвагIваца асабиква рыхъазла гIвпроект дукI абзазара йаларыжьтI: «Моцарт йбзазари йыршIыйари ртурых», «Аконцертква рпарад». Апсны арайонква рмузыка апхьартаква рапхьагIвчва афилармония асцена ду апны рыршIыйара гIадырбатI, Апсны Республика акъральыгIва аурышв драма театргьи «Мелихов гIапны» – хIва йахъагылата Чехов А.П. йыхьыз зхъхIвалгIу агIвымакъральква рквтала йакIвшуз афестиваль йалалныс рылшатI.

Асквш 2012 акультура агIамта акIвыршаща мачIкI йырпсахтI. Апроект адгалагIвчва йшырпхьадзауала, апсуа ршIыйагIвчва гвыпква рконцертква ъагIадырбауа Россия агородквагьи рыцIа йщардазара, Апсны апны аконцертква ъакIвшауа аштаквагьи ргеография рыцIа йауацIыхзара атахъыпI.

Акультура агIамта «Апсны – Россия – 2012» Санкт-Петербург апны агIвымакъральква злата йакIвшауа афестиваль йалата ахореография ансамбль «Абаза» йгьи авокал ъамапсыма ансамбль «Гунда» ргIахъвмаррала йхъыргIвахитI. «ЙгIаталуа асквш ауацIа апроект йаланакIуата аршIыйара анархараква зымгIва гIахIырбаныс хIмурадпI. Россияла ауи йадынхалуа агвып зымгIвалагьи йхIыцыркIитI. Россия апны йакIвшауа аконцертква рымщтахь хIара хIартистква аршIыйара ауысла айгвачва рщардахитI. Ауи йгIалцIла асквш 2013 акультура агIамта джьащахъвара щарда алазлуштI. ХIымадзаква зымгIва ауатыкв йгьгIатасцIарым, ауаса агIамта анадзара хIагIата йадгалазлуштI», – лхIватI культурала аминистр йцхърагIагIв Смыр Динара.

Козлова Эльвира

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki