Library

Къарча-Черкес республика ахъада Темрезов Рашид ареспублика а-Правительства аргIапсщагьи йалакву рыхьызквагьи мачвы зцIайцIаз йунашвала йрыбагъьатI. Ауи аунашва йшгIанарбауала, культурала аминистр йъанатIа Псыжв кыт йауу, ажвлара-политика бзазара ауыснкъвгагIв ЕмгIвыкъва Уали Рауф йпа даддыргылтI. ХIара ауи хIйынйан аминистр йъанатIа ахъвдаквцIараква йырхъйауата йапхъахауа чIвырхъата йчпуш, апхъахьыла мурадта йыму ауысла хIйачважватI.

«Ари апш ъанатIа ду ануызхъарцIара йапщылу аджьауапкIра дугьи уылаухIвитI, – йхIватI Уали Рауф йпа. – Апхъапхъа йхIчпуш ари акIвпI: акультура анхартаква зымгIва рпынгьи цIас бзита йщаквгылхьу абгата йгIахIрысабапуаштI, апхъахьыла йчпачIву ауысква хIрылачважвата ауат злахIырхъйуш амальква лыхIхуаштI.

Акультура анхартаква рунашвачпагIвчва срынйахьатI, уахьчIвала баргвырата йзынйауа зымгIва хIрылачважвахьатI, абжараква йрыдз злауаш амальква хIырзыпшгIауа хIынхитI. ХIайчважвара апны йшсхIваз араса акIвпI: хIынхара ахъазла нхаша ангIахIыртуазара агIарбараквагьи аъазара атахъыпI.

УгIахъа щарда зтабзазауа хIреспублика апны ансамбльква рыцIа йщардазара атахъыпI, ауагIахъа музыка ъамапсымаква йрысуа ансамбльквагьи рылата. Ауат аршIыйара гвыпква хIреспублика ахьызла Москва апынгьи агIвымакъральква рпынгьи дахIврала йгIахъвмарныс рылшауата акIвпI хIынхара шатахъу. Ауи ахIатырла гватра ду рызхIымазлуштI саби ршIыйарала апхьартаква. АгIвычIвгIвыс дансабийу йгIашIарышвта уйыдынхалуамцара акультура ахацква йылацIара атахъыпI. Сара багъьата йазхъасцIитI акультура тшанауацIнахуа ажвларагьи апхъала йшзымгIвайсуа, штшауацIнахуа. Араъа зунашва хIхIвауа йаланакIитI агIвычIвгIвыс ажвлара рпны, йтгIачва рпны, анхарта апны йаъащаква шаъу, йкультура анадзара. Акультура аннакъвра ажвлара рбзазара гвыргIва ду гIауыланацIитI. Ауи ахIатырла хIреспублика аунашвачпагIвчва акультура йазрыму агватра рыцIа йшцIолахуш, штшауацIнахуаш хIащтазлуштI, хIхъаталагьи йхIылшауа хIчпуштI».

ЕмгIвыкъва Уали йгIаликIгIатI хIреспублика йтабзазауа уагIахъипхьадза рэтнокультура агIахчара амагIны швабыж йшдуу. РахIа йхвыцу кыткIгьи аминистерства ргватрадаъа йгьгIанхушым. Ауат аштаква рпны акIвпI хIапхъанчIвиква ркультура цкьата, йалыргата йъагIащаквхаз. АпхъанчIви культури уыжвгIанчIви культури анадгылра шIырпшыра змам угIахъа байара гIаншитI – ауагIахъа культура абайара.

Квициниа Инна,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki