Library

Черкесск апны акультура бзазара а-Дайджест йызкьазуу агIацIщтра «Абаза Краль – 2013» апрезентация акIвшатI. АпхьагIвчва ргватра рзынархапI асквш 2012 йгIвбахауа асквшбжа йгIашIарышвта асквш 2013 йапхъахауа ахмызкIдза «Абаза Къраль» сайт йаншвалыз агIвыраква.

Айззара а-Дуней адкIылара «Алашара» Къарча-Черкес Республикала ахъвшара аунашвачпагIв Мыхц Рамазан йгIахъитIытI. ЙгIайззакваз зымгIвагьи ауи ажва гвапала тшырзынайырхатI, абаза культура а-Фестиваль йаланакIуата асквш ашва «Абаза – 2013» а-Гала-концерт йгьи акультура бзазара а-Дайджест «Абаза Къраль» апрезентация шакIвшауа йхIватI.

Мыхц Рамазан ажва литатI РФ культурала а-Министерства апны культурологияла а-Институт аъачIвагIагIв ахIба, апхьахьа, «Алашара» адкIылара авице-президент, а-Дайджест аредактор ахIба Емельянова Надежда. Ауи а-Дайджест агIвыраква зладгалу асайт шгIаншаз атурых гIалхIватI. ЙшгIалылкIгIазла, асайт йархъйауа ахачIв хъадаква йрыуапI абазаква руыжвгIанчIви культура бзазара абиблиотека агIаныршара, знадзара хIагIу абызшвала агIвыраква йгIадзынгылуа абанпара йрызрыхIазырра.
– А-Дайджест згIанхIыршаз акорреспондентква ргIвыраква адхIкIылгIвацаныс гьакIвым, бызшва майрала йгIву аматериалква апхьагIвчва йырнапIыцIахIыршварныс ахъазлагьи акIвпI – зымгIва рапхъа абаза апхьартаква рапхьагIвчва ахIбачва. ЙалкIгIата, акытква рапхьартаква йырзынадзаныс ахъазла, йшпакIву ухIварыквын араъа арыпхьара цхърагIагаква гьнахъум. А-Дайджест амаль бзита йгIаннаршитI абаза бызшвали англьыз бызшвали атекстква рашIырпшра, абызшваква злаквымшвауа ахцIараква злагIалкIгIа ауаш, – лхIватI Емельянова Надежда.
Датшагьи ауи асайт агIарысабапыгIвчва йырмагIну, рпхьадзара гIазырбауа астатистика даквгIашIастI. Акъральква ашIуырпшрыквын агIарысабапыгIвчва рыцIа йъащарду Россия апны акIвпI, абгата йгIауахвырквын асайт апхьагIвчва ргеография къраль 88 гIацIанакIитI. Трыквшта йтабзазауа апхьагIвчвагьи гьмачIгIвым – сквшыкI апны асайт йталитI угIа 4000-гIв раъара, Йорданшта апны – 1200-гIв, датшагьи йгIашIыпхьадза йауаштI США, Украина, Германия, Казахстан, Азербайджан, Испания къральква.
– Асайт аверсияква ргIаныршара йашвхIаусыгIву абазакви апсуакви рдиаспора ду агIвымакъральква рпны йъану акIвапI. Зунашва хIхIвауа агIарып къральква, Трыквшта, Европа акъральква, США йыртабзазауа амхIаджьырква ртынхаква ракIвпI. АгIвымакъральква йыртабзазауа апхьагIвчва асайт аматериалква гIаргвынгIвра ахъазла атакIыгIвчва гIахIаутI. Ауат гIамта айшысла атакIраква пщбызшвакIла йакIвдыршитI.

– АпхъанчIви замани уыжвгIанчIви бзазари, ахIбачви йгIадзынгылуа абанпари злапщылу ахацква ргIащаквыжьра, гIвымакъраль йту ауагIа рпсадгьыл йазаргванчIвра ауысква рмагIны швабыж йдупI, – лхIватI асайт акорреспондент Ешерова Муъминат.

Асайт бызшва щардала йъалу магIныта йаму йауацIыхта даквчважватI афилология дырраква ркандидат ХIасарокъва Бильаль. Ауи йшихIвазла, а-Дайджест апхьагIвчва йырхъазымкIва Къарча-Черкес йтабзазауа ауагIахъаква ртурых, ркультура, рцIасква йырзынархата уыс щарда зырхъйауа абжьагIвчва гвымчIваквагьи цхърагIара бзита йырзалуаштI. Арат ауысква рпны ахъгалра, ажва аламкIва, абазаква йрымапI.

АбызшвадырыгIвчва рыхъазла а-Дайджест йгIаннаршауа амальква нархарта щарда рымапI. Ауи ахIатырла а-Дайджест аэкземплярква абиблиотекаква йырзалхзара атахъыпI. ХIасарокъва Бильаль датшагьи гвы айтатI, уыжвгIанчIви абаза бызшва апны атерминология баргвыра щарда шапщыларкIву, атакIра апны ари ауыс амаль шIыцла уадгылра шатахъхауа. Датша хъатакIла йгIауахвырквын, атакIра абаза бызшва атшауацIнарыхрагьи цхърагIара бзита йазалитI. Ауыгьи афилологква рнаука нхара йанархартакIта йаъапI. Асайт аматериалква электрон квпшырала адискква йырныта ргIацIщтрагьи ауатыкв йгIаталтI. Ари апш амаль бзира щарда алапI: атекстква йырхъазымкIва асуратгIвыраквагьи абыжьгIвыраквагьи алацIа йауаштI. Асуратква рнадзарагьи рыцIа йхIагIазлуштI.

Асайт акорреспондентква ргIачважвараква рпны культура арыпхьарала а-Дуней абаза-апсуа адкIылара «Алашара» анхара анархартаква зымгIва йгIарыквчважватI. Апрофессор ЧкIала ПIитIа йгIачважвара апны уыжвгIанчIви абаза литература аъащата йызтагылу кIьыдата даквгIашIастI. Ага йгвасразтынгьи, айсра амщтахь асквшква рагIан йшаъази уахьчIвала ауыс зквуи ашIуырпшрыквын уыжвгIванчIви абаза литература зтагылу аъаща швабыж йгвыгIвмыгIвпI.
– Айсра амщтахь асквшква руацIа алитература йалалтI зыхьызква бергьыльхаз, абаза литература аунашва хъарата йзыргаз агIвгIвчва: Джьгватан Къальи, ТхIайцIыхв Бемырза, ЛагIвычв Джьамльадин, ЧквтIу Микаэль, ЧвзыкIьа ШахIымби. Ауат ргIвыраква рнадзарагьи швабыж йхIагIапI, – йхIвитI ЧкIала ПIитIа. – Й-60-хауа асквшква рагIан абаза гIвгIвчва рсатыр йалалтI Шхай Катйа, Тльабыча Мира, Батал Къасей, Мыхц Кьарим, Дагвжвей МухIадин, датшагьи. ЙащтагIайуаз ажвасквша руацIа абаза литература апны автор шIыцкIгьи дгьгIанымшатI. Й-80-хауа асквшква рагIан гIвыджь гIалалтI: Йуан ГIальиси Аджьбакь ХIаджьисмельи. Й-90-хауа асквшква рагIан Щбзыхва Лариси Къвапсыргьан Валентини алитература йазгIайтI. Арат апхьадзараква ашIшвырпшы. Гвы ашвтума автор шIыцква рыцIа-рыцIа йшрылдзгIауа? ЙцIыхъвахауа ажвасквшаква руацIа йара хьыз шIыкIгьи гьгIанымшатI: йа йчкIвынта, йа йнаскIьахьата. УахьчIвала абаза гIвгIвчва сквшы 50 зныбжьу йрайцIбата заджвгьи дгьрылам. Мыхц Кьарим, ажва ахъазла, йапхъахауата йуысаква ангIацIцI 19 сквша ахIа дгьыртамызтI. УахьчIвала абаза литература автор шIакIгьи дгьалам. Ари аъаща гвыргIва ду гIауыланацIитI.
ЧкIала ПIитIа йшгIаликIгIазла, ари анархартала ауыс адынхалра асабигIзартаква рпны асабиква рыдынхалра йгIашIарышвра атахъыпI – йшхвыцыркIву цри бызшвала хIрачважвауамцара, арыпхьара-бжьара уысква адыгIгалуамцара чIвецкI злу асабиква гIахIрыбергьыльуа, ауат ззычпу ауысква йрыквхIыргвышхвумцара.

Асайт акорреспондентква рымщтахь йгIачважватI «Алашара» адкIылара аэксперт ТхIаквщын Шамильи Черкесск къала аимам Хвби Инальи.
– Сара йшгIасгвынгIвуала, «культура» – хIва йзпхьауа ауагIа рбзазара аргIапсща акIвпI. ЙзачIв уагIахъазлакIгьи сквшышвпхьадзарала йгIандыршаз дара ркультура рымапI, – йхIватI Хвби Иналь. – ХIуагIахъа сквшызкьпхьадзарала йдырхIаз акультура акIвпI уыжвгIандзарагьи рбзазара злащаквгылу, йызлагIащаквхауа

Хвби Иналь йцIыхъвахауа ажвасквшапхьадзараква руацIа агIвыма культура рыцIа-рыцIа хIуагIахъа шхънахуа, йшнанауахвуа, рцри культура ацIас бзиква шырхънараштылуа гIаликIгIатI, адин хIуагIахъа ркультура йшахъвыкIугьи йхIватI. Хвби Иналь адин ауыскви акультура ауыскви агIвхIымшауата хIацрылачважваныс хIаквгIазшIиттI.
Абзазара апны тшауацIызхауа аглобализация, аинформация амаль шIыцква йгIархъшахъыцIуата абаза уагIахъа рапхъанчIви культура зарар ду аквшваныс йшшварагIваругьи йалачважватI айззара апны. Абараъа «Абаза Къраль» сайт ахъаз информация гIалцIыртагIвацата гьакIвым йшаъу, ауи сквшышвпхьадзара руацIа йадыркIылыз, абаза уагIа йырбайару акультура тынха агIащаквыжьра йазынхауа амальпI.

Квициниа Инна
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki