Library

Сара анцIрала сгвы йгIатахатI акъвабызчы Апса Диана лажваква: «Акъвабыз уаркьахвра йахъазымкIва угвы арыпшкауата йаъазарагьи атахъыпI». Абараса угвы арыпшкауата, уарынашхыйауата, йшпакIву ухIварыквын хIугIахъа музыка культура злагIалагауа агъыбзаква ракIвпI, йалкIгIата зтурыхла йбайу аугIахъаква рчIвква. Ауат амакъымква ауагIа рхьыгIа, асквшышвква йгIарылсуа рымгIва, рдахIвракви рылдзгIаракви, ргвыргъьари рнашхыйари гIадырбитI.

Апса Диана пщысквша ахIа дгьыртамызтI ауи агIан щарда йылгIалуз ауарад «Эльбрус» амакъым къвыбыз къапщхвыцкI йапхъахауата йгIалахвта йангIатылщт. Йапхъахауа акласс даныцIал къвабызла арыпхьагIв Гваджьа Галина ауи зынла гвы гIалылттI. Диана ларыпхьагIв уыжвгIандзарагьи пхата дгIалгвалашвахитI. АпхьарасахIатква рымщтахь рпны дгIайхуан. Араъа рахIагьи йткIьийыз арыпхьагIв, ауи агIан йбергьльыз акъвабызч ъазала, ланду Тохтамыш Льольа, дгIалнапIыцIалкIуан. Йшцазла, апхьарта апынгьи лунагIва апынгьи акъвабыз йазлыму абзибара даквдыргвышхвун.

УадыргIвана Диана арайон, ареспублика руацIала йакIвшуз анкъвакъвраква дрылалуа далагатI. АрыпхьагIв ъаза Аджьбакь Валера ауи гвы литтI. Ауи асхъан апхIвыспачкIвын Къарапагва апхьарта дгIалган Черкесск йтагылу акультури аршIыйари рколледж дыцIалтI. ГIахIврала атеатр «Меркурий» апынгьи дынхун.

Акъвабызасра дазгIашыкъта, цIолата йыллырдырра лгвалата Апсны апынгьи дапхьатI, уадыргIвана Нальчик йтагылу ршIыйарала Лагъь КIавкIаз институт дыцIалтI. Ужвы ауаъа йхвбахауа акурс дапхьитI. Акъвабыз йахъазымкIва датша музыка ъамапсыма щардагьи дрысуа тшылбжьитI. «АпхьарасахIатипхьадза сара сыхъазла гвыргъьара дупI, зуыс йазъазадзу арыпхьагIвчва рпны уапхьарныс швабыж йгвлахIарапI», – лхIвитI ауи.

АнцIрала лгвы йгIатахатI Петропавловск ассамблея йаланакIуата йакIвшаз афестиваль анкъвакъвра. Къраль 40 йгIартыцIыз къвабызч 1500-гIв раъара алан ауи анкъвакъвра. ЙцIасу акъвабызасщала ауаъа Диана йгIвбахауа агыларта лкIытI, академия къвабызасщала – йхпахауа агыларта.

Апса Диана лхаквлагIвчва дызларгвныркIылыз СССР-ла гIатгара змаз Ерыжв Зули лыхьызла йакIвшаз анкъвакъвра йалакваз йачIва лашарата дъагIарылкIкIгIаз акIвпI. Ауи асквш 2008 агIан Абаза район апны йакIвшатI. Ауаъа кьангьаш аламкIва йапхъахауа агыларта гIалквнадыргатI.

ЙачIвыйа щта ужвы ауи лкъвабыз йгIатылщтуа амакъымква гIазквчважвауа? Йапхъахауа абзибара, лцришта, апхъанчIвиква рбзазара адахIвра дуква… Абарат йгвщтIыхгу амакъымквала абаза чкIвынчви ахIвсси пшахъынхIвыта йгIахIвитI, ащхъаква гIарайгвыргъьауа.

УахьчIвала Апса Диана Къарча-Черкес республикала йбергьльу акъвабызч ъазаква дрылапхьадзапI. Ауаса ауи уахьчIва дыззынадзаз адахIвраквала дгьгIашIасуам, мурад пшдза щарда лымапI. Ауат йрыуахъадапI хъатачIв ансамбль агIаныршара.

РыцIа бзидздза йылбауа амакъым аунашва хIаназцIгIа, – «Йсцрийу абаза макъым», – хIва лджьауапхатI. Ауи аджьауап йгIацIанакIитI швкIпхьадзара йнадзауата аугIа ргвы йтабзазауа амакъым пшдзаква.

Ешерова Муъминат, джурналистпI.

«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki