Library

25.07.2012
Пицунда йауу апсуа ансамбль «Аламыс» Трыквшта йаъан, щарда мцІуата йгІацапахтІ. Ауаъа Инегёль къала апны йакІвшуз культурали ршІыйарали а-Дуней фестиваль йалан. Афестиваль июль а 7 йгІашІарышвта а 15-дза йакІвшатІ. Датшагьи ауи йалан Россия, Македония, Косово, Болгария, Босния, Герцоговина, Кипр къральква йгІартыцІыз аршІыйагІвчва гвыпква. «Аламыс» ансамбль абари апш фестивальта й-51-хауа апны рыршІыйара гІадырбатІ. Трыквшта апны апсуа диаспора ансамбль артистква дыргвышхвауата йрыцыркІуан.

Ансамбль йрылата афестиваль апны йаъаз Джикрба Сима йшылхІвауала, апшыгІвчва апсуа гІахІвыгІвчва асцена йгІаквылпхьадза напІасра дула йгІарпыралуан йгьи йнардасхуан. «ХІара аугІахъаква зымгІвагьи мамырта йбзазаныс хІтахъыпІ, культурала йаргванхапхьадза амамырра бзазарагьи багъьахуштІ», – лхІватІ ауи.

Пицунда йтыцІыз ансамбль апсуаква ъатабзазауа Адапазар кыт сасра йдрайгван йаъан. Араъа апсуа мхІаджьырква ртынхаква йрыуата щардагІв бзазитІ. Адапазар апны «Аламыс» ансамбль концерт артатІ, ймхІаджьырхаз апсуаква рыуа дзачІвызлакІгьи амакъымкви агІахІвракви рпшдзара рабадучва рпсадгьыл гІаднаргвалашватІ.

«Аламыс» ансамбль Трыквшта йанцуз культурала Апсны аминистр Гунба Бадри Согъвым амэр Лабахуа Аляси рыцын. Ауат Инегёль амэр Аллинур Актай йынйан акультура уысквала Апсны республики Трыквшти ращтаныкъвара йалачважватІ. Апсны ащтийыгІвчва апшвымаква пхата йъагІарпылыз ахъазла швабыж йшразу рхІватІ, йащтагІайуа афестиваль апны йъагІадрайгваз ахъазлагьи квырмыш рзырчпатІ.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki