Library

Джыр ХIамид Дауыт йпа асквш 1912 Хъвыжвду кыт адгьылрхарджьыгIв тгIачва рпны дйытI. Жвасквша ахIа дыртамкIва йаба дихъышвттI. Ауи азаман йгIадзынгылуаз арахьарат ачкIвынчва рапш рахв йхчун. Амадырса апны йапхьара Совет власть йапхъахауа асквшква йрыквшватI. ГIарып гIвыра ййырдырра ахъазла дазрыпхьуз сквшыкI апны чвчIвыскI йа уасакI йыртра атахъын. Акыт апны апхьарта анхъыртIы ХIамид ауаъа дыцIалын урышв бызшви черкес бызшви ййырдыртI. УахъыкIла гIвба-хпа тгIачва дгIарыкIвшауамца гIвыра зымдыруаз аугIа дрыдынхалуан.

Абазаква гIвыра анрымамыз асхъан йара-йара ахIарыфкви абыжькви аквйыршвауамцара цри бызшвала дыгIвныс далагун, йдучвам атекстква ачеркес бызшва йгIахъыхта йатайкIныс йхъатайкIуан. Латин графикала йгIаншагIвацаз абаза алфавит Тобыль Тольыстан йызйырбаз дрылашваныс йынасып йгIанакIытI. Комсомол далан, ауи ахIатырла аколхоз апхъапхъа йалалкваз дрыуан, гIвычIвкI зцIахIваз ауандыр алайцIатI.

Асквш 1938 йгIашIарышвта Джыр ХIамид абаза газет аредакция дынхауа далагатI. АуагIа ршIалахIвара йгIахъыхта апхъапхъа йгIанйыршаз агIахIвахраква асквш 1940 агазет “Черкес къапщ” анапаква йгIарыквшватI.

Абашта айсра Ду ахъа йгIашIарышвта ацIыхъвадза далан, зфырра дута йгаз агенерал Доватор йкавалерия корпус дрылата дайсытI. Айсра дангIахъынхIвых асквш 1945 йгIашIарышвта асквш 1952-дза ХIамид Дауыт йпа абаза бызшвала йгIацIцIуаз агазет даредакторта дынхатI. Ауи агIан къарута йымазла абаза литература ашIаква шгIалалуаш йаквйыргвышхвауа дынхун. Аредакция апны литература кружок гIанйыршан ауаъа йгIайуаз ачкIвынчва драйбжьун, драчважвун, агIвра тшадыркIылныс шатахъу гIаргвынйыргIвуан. ТхIайцIыхв Бемырза йуысаква апхъапхъа аредакция йаннайгыл пхата дшгIайпыралыз щарда йгIайгвалашвахуан. ДангIаджвылцIхуаз ХIамид дгIайыщтацIыртI: “Датшагьи йгIвуа аджвырагIв аъазтын ужвы уангIайуа йуыцгIад”, – хIва. “Алитература акIвын ауи асхъан ХIамид йгIазшIитуаз, – йхIвун Бемырза. – Алашцара йылаз алитература ахъазла агазет анапаква гIайыркIкIун. ЧкIвынргIа зшIитуан. АчкIвынчвагьи алымхIарыгIвква амза йшазыпссгIауа апшта агазет тшаквырпсун”.

Асквш 1952 йгIашIарышвта Джыр ХIамид Москва КПСС а-ЦК йхIаракIу апхьарта апны дапхьун. ДангIалга облисполком апредседатель дицхърагIагIвта дынхатI, уадыргIвана агазет редакторта дазгIацапахтI. Асквш 1962 август а 15 йгIацIцIыз РСФСР а-Верховна Совет а-Президиум ащаквыргылрала ЧIахIныгIва грамота гIайквнадыргатI.

ХIамид Дауыт йпа йкъальам йгIацIцIыз агIвыраква йрыуапI абаза литература апны йапхъахауа ахабаргIвыра джьащахъва “Абзазара азыпшгIара” (1958), апьеса “Мгъымца” (1960), ароман “Ащхъаква ргIашIыхара” (1962), агIагвалашвахра “Амара йгIанаршIыхаз” (1972). Асквш 1968 агIан агIвгIвчва р-АдкIылара днарахвтI.

Джыр ХIамид асквш 1972 агIан апрель мыш пхагIвыта адуней йхIваджьтI. Йахрат мгIва апны днардасныс Хъвыжвду кыт жвабапхьадзара йнадзауа амашинаквала угIа швкIыгIвпхьадзара гIайтI: агIвзачва, анбжьагIвчва, агIвгIвчва, арыпхьагIвчва, апхьагIвчва…

ТхIайцIыхв Бемырза ХIамид “алитература атшыгIв” – хIва дйыпхьун, алитературадырыгIв ТIыгв Владимир абаза проза ащаквгылра Джыр ХIамид йыршIыйара йапищылуата йгIаликIгIун: “АгIвгIвы Джыр ХIамид йыршIыйара апны азаман рыцIа йынбаргвыз, абзазара тшанапсахуаз агIамта абаза угIа рпхыцIа шщаквгылуаз цIолата йгIайырбатI. Ауи азаман абзазара йгIахъыху асуратква гIайырбауата хабаргIвырагьи романгьи йгIвытI, ареволюции атурыхи гIазырбауа ароман жанр атшауацIнарыхра йхатI ду алайцIатI”.

ЧкIала ПIитIа,

“Абаза Къраль” сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki