Library

Асаби апхъапхъадза йцри бызшва шпайылайхIвауа? ЗымгIва рапхъа йан лбжьыла йылайхIвитI, гарашва анизылхIвауа агIан. УадыргIвана алокIква дрыздзыргIвитI, асаби хъвмарщаква ййырдыритI, амультфильмква данырпшуа йджьащахъву дуней шIыц гIахъитIуазшва гIальаматра щарда йылайкIитI. Асаби алокIква данрыздзыргIвуа, амульфильмква данырпшуа афырква рыбызшвагьи шйылайкIуа гвы гьайтуам. Ажвипхьадза гIайгвынгIвуата даздзыргIвитI, йанихъазхарагьи йгIаз гIайгвалашвахуа, йхъа дачважвауа дхъвмаритI. Абараса, мачIмачIымца асаби йцри бызшва йылайкIитI.

Винни-Пух от ALASHARA на Vimeo.

Абаза район гIаншагIвацата, – «Абазаква согIата йшвзыхIчпарйа?» – хIва Уаз Мурат йангIайцIгIа арат ахъвыцраква йгвы йгIанаги йгIанамги здыруада? ЙазцIгIазгьи къарча-балкъар чкIвынргIа рыдынхалра ауысла афонд «Эльбрусоид» адиректор хъада Тоторкулов Али йакIвын. Ауи ажвлара рынхара йанархаракIта йаъапI афильмква къарча-балкъар бызшвала ратакIра. Уаз Мурат йджьауап заджвымзара заджвы йджьайщаныс ауыпI, ауаса ауи дызхIваз абаза бызшвала мультфильмкI атаркIныс акIвпI.

Абараса ауыс ахъа джвыквылтI. Апхъапхъа, асквш 2009 агIан, абанпара щарда йыргвапхуз амультфильм «Асльан-паштахI» афырква абаза бызшвала йчважвауа йалагатI, йащтагIайуаз асквш агIан – Простоквашино кыт абзазагIвчва… Абар щарда мцIуата, сентябрь а 14 атшын, Абаза муниципал район аунашвахъцIарта зыгIвну атдзы апны абаза бызшвала йатаркIыз гIвмультфильмкI – «12 мызкI» йгьи «Винни-Пух» – рпрезентация акIвшатI. Амультфильмква рдубляж дарежиссерын ГИТИС йгIалгаз , «Эльбрусоид» фонд архъйагIв директор Атмурзаев Расул. Ауи абаза бызшва йымдыруазтынгьи йпахь хачIвыта йгылаз абгата, йнардзата йырхъйатI.

– Афырква рбыжьквала йчважвуз актерква гьпрофессионалым, – йхIвитI Расул Маджьид йпа. – РщардагIв апхьарта йыцIаркIвапI, Абаза район йабзазагIвчвапI. Сара ауат рынхаща швабыж йсгвапхатI. Сшхъвыцуала, амультфильмква рыдынхалрала йгIарылалуа адырраква, аъазара апхъахьылагьи йгIарыхъвахуаштI. Амультфильм ацIыхъва хIактерква рсуратквагьи тахIцIитI. Йшызбауала, раргванква ауи анырбара даргьи рахIагьи йгвышхвуштI, ауыс бзиква штшрыдыркIылуаш йащтазлуштI. Абазаква рпны талант зму агIвычIвгIвысква щардагIвыпI. Сара датша уыскI садгылхыргьи арат йгIаджвыквхIцIаз ауыс бзи ззынардзуш ъачIвагIагIв ъаза ймачIгIвымкIва йаъапI. ХIацынхауищтара датшагьи закI гIасгвынгIвытI – хIугIахъи абазакви адызкIылуа щардапI, хIдунейпшыщала хIапшыпI.

Амультфильмаква «12 мызкI» йгьи «Винни-Пух» рпремьера анакIвшуз сасчва щардагIв гIадгылтI: Абаза район аунашвахъцIарта анхагIвчва, ахIбачва рсовет йалакву, Къарча-Черкес Республика АугIа Айззара адепутатква, «Эльбрусоид» фонд анхагIвчва, абаза кытква йрыуу апшыгIвчва хвыцква.
Асцена йгIачважвакваз зымгIвагьи йшгIарылкIгIазла, амультфильмква рбзирала асабиква рцри бызшва рыцIагьи бзита, майрата йрыларкIуаштI. Йаргьи ауи акIвпI апроект агIаджвыквцIагIвчва рпахь хачIв хъадата йдыргылуаз. Абаза район ахъада йхъвдаквцIараква зырхъйауа Ныр МухIаджьыр ари анхара ду йадгIапсалыз зымгIвагьи квырмыш рзичпауата драйхIвахIвтI, аграмотаква рнапIыцIайцIатI, актер хвыцква согIа риттI, апхъахьыла агвацчпа фильмквагьи абаза бызшвала йатаркIуата агIаджвыквцIара бзиква дшрайгвгъауа йхIватI. Арат ажваква згIаз арежиссер йлакта анлашараха абари ажванахъагьи абзазара йаларыжьныс шрылшуш кьангьаш шалам гвынгIвырахатI.

Афильмква абаза бызшвала ратакIра ауысла шIыцрата йгIаншауа зымгIва рахабар хIсайт агIарысабапыгIвчва йдхIырдырлуштI. Ужвы швгватра рзынахIырхитI мышкIыла агIамтаква штшырпсахуаз агIаншара гIальамат йгIаквчважвауа йгьи амшв чкIвын Винни-Пух аъаща джьащахъваква йгIарыквчважвауа амультфильмква.

Квициниа Инна
АгIвыра «Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki