Library

Хвысквша цIитI абаза угIахъа рахIбачва рсовет йапхъахауа алачIвара акIвшищтара. Асквш 2008 агIан председательта Тебердыкъва Умар далырхтI. Айззара йалакваз рщардагIв адгалра уысква дышрызъазу гIалыркIгIауата ари аъанатIа йызхъарцIатI. ЙагIвсыз асквшква руацIа Умар ари азхъацIара шгIайырцIабыргуаш дащтата йхъвдаквцIараква йырхъйун. Щарда мцIуата ахIбачва рсовет йызкьазуу алачIвара акIвшатI. Араъа председатель шIыц йалхра, абаза кытква рпны уахьчIвала йырхъйачIву ауысква ауатыкв йтан. Акытква ргIащтийыгIвчва 93-гIв йрыуата алачIвара угIа 75-гIв гIадгылтI, ауат йацшIакIта ауатыкв йту ауысква йрылапшныс йщаквдыргылтI. Тебердыкъва Умар йагIвсыз асквшква руацIа нхарата асовет йакIвдыршаз йауацIыхта даквчважватI.

– Ари аъанатIа сыхъвда йгIахъарцIищтара хIкъару абгата йыздыгIгалуаз амурад шIыцква абзазара йалажьра акIвын. Устав шIыц лыхIхтI, ауи юстицияла КЧР аминистерства йдрыбагъьатI, – йхIватI Тебердыкъва Умар. – Аустав шIыц ауысла нхара ду акIвйыршатI асовет йалу ТхIагъальаджь Борис. Ауи уыста йгIаджвыквхIцIуз зымгIвагьи ауралагьи джьгарта дрылан. ХIынхара уысква апхъапхъа баргвыра щарда гIарпырасуан. Ауи гIазхъшахъыцIуаз «Абаза» жвлара мгIвайсра апны йаъаз амакIыраква ракIвын. ЙлыхIхуаз ауысква атхIрыпунта йалыргара атахъыз ауысква хъатахIкIуан. АмакIыраква аналдырга амщтахь йлыхIхыз ауысква хIрыквгIацапахтI. АуагIа злагIахIыдгылуаз ауысква йрыуапI апсхъвква анырчпауа акврыдзраква йшрылдзгIуш хIадынхалныс. Асовет ащаквыргылрала, кытипхьадза ауи ауысла айззараква акIвхIыршатI. Сара йсыцта айззараква йрадгалагIвын «Абаза» жвлара мгIвайсра апредседатель ЧвзыкIьа Рубин, асовет йалаз агIвгIвы ЛагIвычв Джьамльадин, аимам Хвби Иналь, Абаза район араис-имам Апса Анзор. ХIынхара шакIвшауа агазет анапаква рпны дгIаквчважвун «Абазашта» акорреспондент Кълыч Руслан. Ари ачкIвын швабыж хIизыразпI. Швабыж хIырзыразпI аредакция анхагIвчвагьи аредактор хъада Къвыл Фардауысгьи. АбзазагIвчва хIанрынйуз уыс щарда хIрылачважвун. ГвыргIва ду гIахIыралцIун ашварахъва йхънагIвуз анышвынтараква. Айззараква рпны йакIвшаз айчважвараква рымщтахь аугIа разазаъаща рпсахтI, уахьчIвала анышвынтараква рыцIа йалыргапI, йцкьапI. Хiанйараква йрыщтагIайуата щардагIвы апсхъвква анырчпауа йаквдрыдзуа ахчагьи амлыквгьи йшрылдырдзгIазгьи нахвапI.
Тебердыкъва Умар йшихIвазла, асовет йалакваз ареспублика ауацIала йакIвшуз анйараквагьи айззараквагьи джьгарта йрылан, ражва хвы аман. Асовет алачIвараква рпны уахьчIвала йырхъйачIву ауагIахъа уысква ауатыкв йгIатарцIалун, йрылачважвун. Ауат йрыуапI асинкви ахъмаштылра гъвкви рыргылра, хIтурых йапщылу аурамква рыхьызква ргIащаквыргылхра. Швапха бзита йгIараха йауаштI йбергьльу апхьахьа, анаукаква рдоктор, апрофессор ТIыгв Владимир йыхьыз Къвайдан аквтанай апхьарта йахъцIара, ЙынджьыгьчкIвын кыт аурамкI ахьыз псахта ЛоургIа рыхьыз ахьцIара.

Асовет йалакву ргIаджвыквцIарала арат акытква рапхъанчIви хьызква ргIацарпахра хIащтан: Къвбина – Къвбиналокт, ЙынджьыгьчкIвын – Йынджьыгьлокт, АлбыргIан – Бибаркт, Псыжв – Дарыкъвакт, ПсауычIадаха – Къылчкт. ХIара йызнымкIва йгIащтIыхIтI Гвымлокт абзазагIвчва руыс зкву. УахьчIвала ауаъа псабара газгьи дзгьи гьаъам, ареспублика телебара атраква гьырзагIакIуам, аквта урамгIваца акIвпI асфальтла йхъгIву. Акыт ауысква рырхъйара швабыж йъатащахIахауа гвасрапI, ауаса йцIыхъвахауата акыт апсабара газ акIылгара ауыс, датша уысквакIгьи апщылата рырхъйара асквш 2013 абюджет апны йгIарбапI. Асовет йгIащтIырхуаз ауагIахъа уысква йрыуапI адемография, анхадара, чкIвынргIа рцхърагIара йазынархата йчпачIву ауыс дуква. АхIбачва рсовет рынхара йанархарта кIьыдан апсуакви абазакви хIайщчвара, хIайгвара, хIащтаныкъвара рыцIолара, йрыбагъьара, тшауацIнарыхра.

Умар асовет анхара агIарбараква дрыцIачIвагъвахуата, мурадта йрымаз зымгIва шырзынамырдзас гIаликIгIатI. Ари аъанатIа ъадзанкъвигуз Тебердыкъва Умар йцхърыгIуз, йыцызкIуаз зымгIвагьи дшырзыразу йхIватI. Алхра шIыцква рпны йзгIвадара ъатIахсахаз йгIалцIла ауи йыхьыз ауатыкв йатагIатарымцIахныс дахIватI. Акытква ргIащтийыгIвчва апхъапхъа йауацIыхта ажвлара уысква йрылачважватI. АнапIщтIыхра анджвыквыл ащардагIв Гваджьа Къахвын МхIамат йпа йыхьыз йацыркIтI. Ауи ахIбачва рсовет дапредседатель шIыцхатI. Апхъала ауи «Адгылара» жвлара агIаныршара джьгарта дадынхалуан, уадыргIвана ауи дапредседательтагьи дынхатI. Датшагьи ауи ажвлара, акультура, ауагIахъа уысква йырзынархата Къарча-Черкес, Апсны, Къабард-Балкъар, Чачаншта, Йынгвыщшта рпны йакIвшалауа айззараква дрылата дынхалитI.Ауи ауралагьи йажва багъьата, къдзыра ацIата ауагIахъаква рангIалра, ращтаныкъвара дазгылапI. Акыртква Апсны йангIагвыквс хIайщчва апсуаква рыхъазла ацхърагIара уысква адигалтI. Асквш 2002 агIан хIреспублика президент шIыц даналырх а-Президенти а-Правительстви информация политикала р-УнашвахъцIарта аунашвачпагIв йхъвдаквцIараква йырхъйун. Пенсия данца агумантиар рхъвыхраква р-Институт ахъвшара даунашвачпагIвхатI. Гваджьа Къахвын асоцилогия наукаква дыркандидатпI, афилософия наукаква дырдокторпI, КЧГУ дапрофессорпI, ауасамцара. Ауи наука нхара 130 дыравторпI, адунейла йгьи Россияла конгресс, конференция, симпозиум 38 дрылата дынхатI. ЙгIвыраква рщарда абазаква рэтнос атурых, уахьчIвала аъащата йызтагылу, апхъахьыла йырпхыцIахуш ауысква дрыквчважвитI. АхIбачва рсовет апны Къахвын МхIамат йпа йквнадыргаз азхъацIара шгIайырцIабыргуаш, абаза уагIахъа рбзира гIазлыцIуаш дащтата йдырракви йкъаруи абгата ари анхара йшадигалуаш гIайхIватI.

Джьандар Залина,
«Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki