Library

Ужвы хIара йхIчвыхъарахаз йгIважвахауа асквшышв йгIвынгIважвахауа асквшква рагIан Абашта айсра Ду айбащраква рпны швкIыгIвпхьадзара йнадзауата абаза хъачваква аладзтI. Псыжв кытгIваца йауата айсра йпшцIалтI угIа 450-гIв, ауат йрыуата 216-гIв гьгIацампахтI, айбащра штаква рпны рчIвылахъв раутI. «ЧкIвынргIа ргвардия» – хIва йзхьзу амузей апны айсра йгIаквчважвауа ашвъаква адкIылапI. Ауи унашва ахъылцIитI ЧвзыкIьа Фаризат МухIадин йпхIа. Жвасквшапхьадзара руацIа Фаризат дамайчуата айсра йпшцIаз акыт абзазагIвчва рхабарква, ауат йгIарыквчважвауа ашвъаква, асуратква азылкIкIитI.

Сквшы 40 руацIа Фаризат йлыдкIылата йынхуз апшгIагIвчва гвыпква айсра шакIвшуз йашахIатта экспонат пщынзыкь раъара гIазыркIкIытI: асуратква, йаладзыз йа йабгата йгIацапахыз айсыгIвчва рбзазара хабарква… АйсыгIвчва йгIаргIвыз асальамшвъаква ангIауахвра ауи агIамта утагылызшва нахвата йуылситI. Абар хIыла йгIацIашвитI азаман ащтаква гIазквхаз «ххъатакIта йаквцIу» Быжда ШахIым йсальамшвъа: «Айсра апшцIасыртала сальам настйитI. Агвардия айсыгIв йсальам. Швымш бзита, пIатIу ду зкву сани саби… Сшабгу, сшызгIваду нашвсырдыритI, Любвена къала хIазабакIуата йакIвшаз айбащра сгIапшцIыцIхгIвацатI. Любвена ззырхIвауа Варшава уаззырцауа амгIва апны йыквгылу, анамыцаква швабыж тшъатадрыбагъьаз акъала акIвпI… Хвду ззызбауа сцриква, сцри кыт сачвыхъарапI, съатанагаз агIвыма шта апны абзазари апсри сырбжьата лахъвгIахъасрипхьадза аджьаль зджьарамзара-зджьара йуызпшитI, чIвырхъипхьадза арыцхIагIа уашIашвитI, ухъвыцраквагьи цIолата йпшгIитI…»

ДакъикъакIла дгIахвитхапхьадза сквшы гIважви хпа йырталгIвацаз ари ачкIвын йъахIыльчва рсальамшвъа дазпшуан, йаргьи дашIамсуа йгIайыгIвуан. Уыжвласыла дшафицархушыз ахабаргьи гIайыргатI: «уыжвгIандзара уызафицарымйахIва швгIасцIгIузтын сара схъатала йгьстахъымызтI, анамыцаква ррыхъвашара апхъан, йауа ухIварыквын афицар чын гIауыртра ахъазла уапхьара, акъральыгIва рхъвыхраква урыцIсра атахъыпI, ауи ахъазла айбащраква ъакIвшауа уачвыхъарата упшцIымцIкIва йгьауам. Ауаса хIара борч хъадата йхIыму анамыца йыгIвара дтахIцахта далахIрыхъвашара, Берлин апны хIбаракъ щтIыхIхырныс акIвпI».

Асквш 1942 агIан, совет ры КIавкIаз аштаквала щтахьла йангIатхъуз, жваба-жвахсквша рахIа йыртамыз абаза чкIвынчва айдзаква (ауат йрахIбаз рщарда айсра йпшцIан) йхвыз акрасноармеецква къарчIвахуан. Йанлащцарахара ауат рхъа йамайгьдзауата афашистква ркъалагIвырква ржьауамцара, ашIунаква рцIапхаква амдырцуамцара йыртакIыз апартизанква, йгъархаз айсыгIвчва гIадырхвитхуан. Айсра алганадзыкIьара зунагIваква рпны йгIанхаз ачкIвынчва агъа чвгьата йзылахьын. Быжда ШахIым йъахIльыз ашIакI араса йзыгIайыгIвуан: «НамыцакI дашIыжвжвата йыжьтшыт йызназгныс дъахIвауа Давлет йсальамшвъа сапхьатI. Щта, Давлет, агъа уизылахьзара атахъыпI, арат рапш агъа адуней шабгугьи йрагъапI, ауаса айсра амщтахь амамыр бзазара акIвпI хIыззхъвыцуаш, йтахаз хIычвагьи нахIырхъахуата…»
ЧIахъвацынхъвыта йзалуаз йцриква рсальамшвъаква лахъвгIахъасрипхьадза дрызпшуан. «Сабгата снацапахуазтын йшвасхIвхуаш ацIабырг гIаншараква щардапI, асальамшвъа зымгIва гьузанцIум, ауи ахъазла тетрад гIважвакI раъара атахъхуштI», – хIва гIайыгIвуан ШахIым. Ауи дгьгIацампахтI, йыла йабата йцриква йрайхIвхуашыз закIгьи дгьахамдзахтI. Быжда ШахIым Берлиндза днадзатI. ДафицархатI, дполитрукхатI…
Асквш 1945 апрель а 30 атшын айбащра даладзтI, анцIрала Германия йчIвылахъвхатI.

Емельянова Надежда

Асуратква амузей «ЧкIвынргIа ргвардия» архив йгIалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki