Library

Апрофессор, аистория наукаква рдоктор ТхIайцIыхв Михаил Семен йпа йыхьыз Лагъь КIавкIаз, Россия, агIвыма къральква рпны апхьахьаква рквта йбергьльыпI. Ауи историяли политологияли Лагъь КIавкIаз агуманитар йгьи атехнология академия акафедра апны дынхитI, гуманитар рхъвыхрала Къарча-Черкес институт апны историяла ахъвшара даунашвачпагIвпI. Зыхьыз бергьльу Лагъь КIавкIаз амараташварташтаква ртурых йырхъвыхуата хIхаквлагIв гвыбзыгъа йкъальам амонографияква, астатьяква щардата йгIацIищтитI.

Михаил акытква ртурыхква, ауат йгIартыцIыз агIвычIвгIвыс дуква йгIарыквчважвауа архъвыхра нхараквала, акнигаквала уыс ду йырхъйитI. Ауи йаквшахIатпI асквш 2011 агIан архъвыхра цIолаквала йбайата йгIацIищтыз Псыжв кыт йгIаквчважвауа акнига. Ауаъа рыцIа йдуу абаза кыт Псыжв Къвбина атшпы йангIачIвал йгIашIарышвта абзазара шакIвшуз, уахьчIвала йшаъу йауацIыхта йгIарбапI.

Акнига ргватра азынадырхатI апхьахьаква, атурых, аэтнология руысква гIальаматра рзызбауа апхьагIвчва. Ауи ахIатырла йцри кыт йгIаквчважвауа ТхIайцIыхв Михаил йынхара шIыц асквш 2011 агIан рыцIа йагъьу анаука гIвыраква йырзынархата Россия ауацIала йакIвшуз анкъвакъвра йалауреатхатI. Анкъвакъвра йхIаракIу апхьартаква рарыпхьагIвчви анаука рхъвыхра институтква рынхагIвчви рквтала йакIвшун.

Анкъвакъвра йагIаныршагIвыпI йгьи йадгалагIвпI Россия апны арыпхьара атшауацIнарыхрала а-Фонд (ауи арыпхьара ауысла Россия академиягьи йацыркIтI), арыпхьара технологияква руысла РАО а-Институт, инновацияла а-Дуней университет.

Анкъвакъвра апны йгIарбаз акнигаква нархара щарда рыман: юриспруденция, агуманитар йгьи ажвлара наукаква, психология, педагогика йгьи арыпхьара аметодика, экономика, менеджмент йгьи маркетинг, аинформация технологияква йгьи аршIыйара. Анкъвакъвра акомиссия йалаз аэкспертква Россия авузква йгIарщтийыз тшазынархара 3590 йрылапштI, уадыргIвана агIба йнадзауа аноминацияквала апхъагылагIвчви алауреаткви рыхьызква щаквдыргылтI.

АпхъагылагIвчви алауреаткви рсогIатква гIарнапIыцIарцIаныс ахъазла Сочи йдрайгван айззара акIвдыршатI. ТхIайцIыхв Михаилгьи ауаъа даъан.
Арыпхьара атшауацIнарыхрала а-Фонд а-Президент, РФ а-КъральыгIва Дума арыпхьарала акомитет апредседатель йцхърагIагIв, наукали арыпхьарали Россия а-Правительства а-КъральыгIва согIат алауреат, апедагогика наукаква рдоктор, апрофессор Берулава М. ауат драйхIвахIвуата тшырзынайырхатI: «ПIатIу ду зкву анкъвакъвра апхъагылагIвчва, алауреатква! Швара швынхара гвышхварата йалашвцIауа хIкъраль анаука ахв щтIнахитI, хIнаука атшауацIнарыхра йацхърагIитI. Швара швырхъвыхра нхара абзирала адуней апны Россия анаука ахIагIара дута йырпхьадзитI. Талант зму апхьахьакви апедагогкви ъахIщардагIву зквшахIату закIыпI: Россия апны арыпхьара уысква апхъахьыла тшауацIырхуа йымгIвайсуаштI».

ХIара хIапхьахьа гвыбзыгъа, аистория наукаква рдоктор, апрофессор ТхIайцIыхв Михаил Семен йпа абари адахIвра дула гвыхътIыла хIйайхIвахIвитI. АзгIвадара багъьа йымата анаука апны ауи йапшу адахIвра дуква апхъахьылагьи йщардаханыс йзыхIтахъпI!

НакIвахв МухIамад,

ВГТРК афилиал «Къарча-Черкес телерадиуакомпания» аунашвачпагIв йцхърагIагIв.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki