Library

УызгIвымсхыз пхын мшыта ТIыкIва МухIамади сари айшва хIадзхъачIвата хIайчважвун. Ари айчважвара йара ахцIараква аман. Датшата йухIвушызтын, акыт амузей хIыгIвната абазаква ртурых аунашва гIахIрахатI – аугIахъа рбзазара шщаквгылуаз, зыщайдзаква хъарата асквшышвква йрылалуа ркультура абайара агьиква. МухIамад амузей шгIанйыршаз, апхъанчIви пкъыгIваква азикIкIуа дшалагаз, йбзазара апны ауи шуыс хъадахаз гвыхътIыла йгIасайхIвуан.

ДчкIвын айдзата ауи йща йалалтI йугIахъагьи ауат ртурыхгьи йрызйыму абзибара. УыжвгIандзарагьи йлымхIа йтггIаркIвитI рунагIва апны щардала йгIайззалуз алыгажвква рбыжьква. АхIакв дахьпшуа, шыхIв тIакIв тайпсауамцара ауат рхабар джьащахъваква дрыздзыргIвуан, йылайкIуан. Сквшщарда дынхатI ТIыкIва МухIамад арыпхьагIвта – апхъапхъа йцри кыт апхьарта апны, уадыргIвана ХIабаз алицей апны. Ауи оптикала йадгалу апкъыгIваква рагъьчIврала шIыцра 25 гIайхъвыцтI, швъала йрыбагъьатI. Йшбергьльу апшта, оптика йгIаквчважвауа ахъвы физика апны рыцIа йбаргвыпI. Апхьарта апны ауралагьи уыс щарда шйымазгьи аугIа ртурых гIальаматрата йазйымаз зынгьи йгьалымдзгIатI, апхъала абзазара шаъаз дашIамсуата тшахайыргIвазун, акыт ашIыпIаква гIамидумцара йщапIы ъанамдзаз тыпкIгьи гьгIанымхатI.

Амузей ахъа шгIаджвыквицIаз араса акIвпI: йынбжьагIв йпны зны дтшкIаралын абора апхъанчIви гвадзпкъагакI шыгIвназ йбатI. Щамхъаша ду дгылума ухIвауата дахIвумцара йынбжьагIв йан ауи аъамапсыма гIалыквихтI. Квача Цу ауи асхъан сквшы 80 дырзынадзахьан, агвадзпкъага чвахъабагата рунагIва йыгIвнищтара абанпара щарда штшырпсахыз гIайалхIвуан. Швабыж йазсакъуа йынкъвыргун.

Атыдз лыгъвраква рпны акъвыбгIанква гIайауан, анышвкъвара кIапсартаква рпынгьи апхъанчIви ъамапсымаква данырхъанагуз гьмачIмызтI. КвашуакI ахъыспхьадза акыт ашIыпIаква рпны МухIамад цIыкв мачва щарда йыла йгIацIашвун. Йхъвашата йгIайнапIыцIашваргьи дрызсакъуа йцIлайыркIыхуан. Ауыс магIны шаму гвы азтыз акыт абзазагIвчва рапхъанчIви пкъыгIваква кIадымрышвхуата дара-дара МухIамад йызгIаргуа йалагатI. Ажва ахъазла, ХIапачва ХIамзат сквшы 50 зхъыцIуаз айшвачкIвын йызгIайгтI, Къыкъ Мурадин йабаду дансабийыз дызлатагIвызуаз анапIлачпара тларыджаквала дйыргвыргъьатI, напIыла йхъындырхIвуаз алу Къадыжв Уасман йызгIайгтI, пшдзата йтыдзахгIата апхъала йынкъвыргуз аъахвтан апш Тобыль Бабыщ йгIайылтатI. Ауасамцара амузей апкъыгIваква йрылахIауа йалагатI: ачIвгIва йгIалху амхIачIваквала, амшI тамщакьквала…

ЗымгIва шалу ТIыкIва МухIамад йапшым пкъыгIвата, ъамапсымата 400 райхIа азикIкIытI. Апхъапхъа ауат рпны йщтIан, щарда мцIуата апхьарта апны пещ кIьыда йзалырхтI. МухIамад йагIвсызгIваца гьакIвым дыззхъвыцуа, апхъахьылагьи дпшитI. Экспонатипхьадза сурат ахъихитIта альбом йбжьайцIитI, ауат рунашва хIыбызшвалагьи урышв бызшвалагьи йаницIитI.

Амузей йыгIвну зымгIва адукIылхырквын цIабыргыта нцIракI йапсапI. КъвыбгIанкI уапшрыквын абаза пхIвыс ауи лыжвгIвахъа йыквта дзы шалагIалгуаз уыла йгIацIалитI, луыртлагьи дпшдзата, апша мачIкI йынкъвнагауа лъахвтан пшдзагьи лынгIауата, лунагIва дангIайхра апхъанчIви гIвыга дтагылата дшхъынхIвуанадзара угвы йгIанагитI.

Абарат зымгIва гIвычIвгIвыс напIыла йчпапI, ауи джьауымщушта йгьаъам. Арат рапш пкъыгIва пшдза ззычпуз аугIа дырра цIолагьи ъазара дугьи рымата ркультура шбайаз кьангьаш гьалам.

МухIамади сари апахь хIангIаджвылцIх фыгIвпшдзала йырчвыз ахIауа гIахIшIастI.

– ЙбахIума ахIауа йгIанагуа ахъгIара? – хIва дгIасцIгIитI ауи.

СквшкъомкI руацIа ащхаква шынкъвигауа, цха шцIирычIвауа ймыргIващауата ахIауа йгIанагуаз ахъгIара зынла гвы айтатI. Ауаса йара йгIайхъыцIуа ахIауагьи гIвычIвгIвысагIарала, аугIагьи йцри псадгьылгьи йрызйыму абзибарала йшырчву акIвын сара сыззхъвыцуаз. Ауи ахIауа йгIайыдзхъагылуа дзачIв гIвычIвгIвысызлакIгьи дгIащтIнахитI, йыланархIитI, йшпакIву ухIварыквын абзазара апны щта пшдзакI тынхата йгIанижьра йахъазымкIва йгIадзынгылуа абанпараква ртурых йызлапщылу ахацгьи йыргъвгъвитI. Ауи ахац шцуш знапIылахуш дара ауат йгIадзынгылуа ашIаква ракIвпI. Абараса апхъанчIви айшва адзхъа йакIвшауа айчважвара щта пшдза ачпауата акIвпI угвы йшгIатахауа.

ТIыкIва МухIамад йгIазикIкIыз апкъыгIваква:

Ешерова Муъминат
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki