Library

ЗджьакIы гIващагIарала йшхъвыцуала, дзачIв гIвычIвгIвысызлакIгьи сквшщарда гIазпхьадзауа аныбыжь дантагылра уасаражвта дырпхьадзауа пIатIу йыквырцIитI. Ауаса ауи зымгIвагьи йгьрылшум. Ууасаражвхара ахъазла ухIальшан щаквкIыта, уакъыль щаквгылта, абзазара ацIасква цIолата йузалыргауата уаъазара атахъыпI. АпхъанчIвиква «уыжвла ащайдзаква уымрыдзуата убзаза» – хIва йырхIвалуз ажва гвыбзыгъаква Джьгватан Бильаль йынцIра шабгу йгвы йтата дгIабзазатI.

ДжьгватанргIа ртгIачва быжьгIвайщчва йнадзауата КIавкIаз айсра амщтахь Хвмаран кыт йталхтI. СынчIва ауат рткъвым унагIвашвкI раъара гIацIанакIитI. Адгьа кыт йтабзазаргьи рахIбачва апхъанчIви цIасква гьдрыдзуам, адгьа бызшвала йчважваргьи рцри абаза бызшва гьырхъаштылуам, йгIадзынгылуа айцIбачва йддырдыритI.
Къарча район апны милиция ангIандырша ауи аунашвахъцIара Бильаль йаба Джьгватан Кьарим йакIвпI йыззхъарцIаз. Араъа йбзазауа ауагIахъа адикIылныс ахъазла ауи уыс ду йхатI. Кьарим хвбызшвакIла дъазычважвуз (адыгьа, абаза, асатин, къарча, урышв бызшваквала), КIавкIаз ауагIахъа цIасква бзита йъайдыруаз рбзирала йынхара уысква майрата йалйырганыс йылшун.
Кьарим йтгIачва апны асабиква жвгIвы йнадзун – цыгIвпачви хгIвыпхIчви. Бильаль айцIбачва дрыуан. Ауи анцIрала йгвы йгIатахатI айсра йпшцIаз йащахIба дшгIащхаз зныз ашвъа ангIай атшын. ДчкIвынайдзата уцри дануылдзгIауа хьшвашварата йапщылу гIайгвынгIвытI.
ЙыквлагIвчва рапшта Бильаль дшIадзата анхара дацIагылтI, йбыжьбахауа акласс дангIалга амщтахь. Арра къвырльыкъвхара дызшIыртындзыкIьа арахврхIара дапщылан. Къвырльыкъв йхата дангIацапах уыхвагIвта дынхауа далагатI. УадыргIвана атракторнкъвцара тшазибжьан йапынкIылата жвагIсквша «Верхнекубанск» совхоз апны дынхатI.
– СанчкIвыныз ари аъачIвагIа уаланханыс майрадзысщун, – йхIвитI Бильаль Кьарим йпа. – Атракторнкъвцарагьи йара амадзаква шаму къомракI анцIы йгIасгвынгIвыхтI. Йхъаду абылчIвы цькьазланыс, йаргьи йшатахъу апш йынхарныс ракIвпI йхъаду.
Бильаль йгIайгвалашвахитI ансимшы ашвахIвара ашIадымрысуата йшынхуз. Атрактор абжьы йалажжуаз ауарад хвитта йгун, йгвы гIатнарыхIвачвгIун. Ауасамцара атшын шабгу данынхарыз йагIвсыз амш лахъвгIахъасразшва йбахуан. «Абарауаса йагIвстI сынхара сквшква рыгIамта», – дпшвырхъыччитI ауи.
ЙгIариква рсабиква, ауат йгIарыцIагылуа ахвыцква рыхъазла Джьгватан Бильаль йуасаражвра гIвынагьи цIгIвагьи гьамам, агIамта хацква хьапщла йхъирыситI. Ауи йгIахIвахраква, йбжьагажваква, йгIагвалашвахраква рбзирала ДжьгватанргIа ртгIачва сквшышвпхьадзарала йщаквгылу хIапхъанчIви цIасквагьи хIцри бызшвагьи гIархчитI.

НцIрата йыму дызтабазаз акыт ауагIагьи пIатIу ду йыквырцIитI, сквшы 83 зныбжьу ауасаражв ауат рыуа дзачIвызлакIгьи ажва гвапа йызгIайауитI, йкъару йгIанагуа ауыслагьи дйыцIагылитI. Згвы гвапарала йырчву, закъыльла агвыжвкIра зырчIвауа, йанымгIалуа аъаща йайгIайуа агIвычIвгIвыс йакIвзапI уасаражвта йырпхьадзауа. Джьгватан Бильаль ари ахъвыцща йацикIуата йгIацицIахитI: «Уцри тшгIва бзибарата йазуыму, ахIбчва пIатIута йрыквуцIауа акIвпI зымгIва злагIаджвыквылуа. Ауаса унагIвипхьадза апны асабиква ргIадзныргылра рыцIа йапхъапI. Асабиква ракIвпI ауасаражвра зрыпшдзауа, адгьыл апны абзазара тшауацIназрыхуа».

Ешерова Муъминат,
«Абаза къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki