Library

Август а 26 Апсны апны адунейла ауи ахъахвитра йъацыркIыз йазынарху Амш дыртлапIатI. Агвыргъьарамш атшын щымта СогIвым Артшхъвара а-Мемориал ащапIы ахIврапшдза алапаква азгIаргтI. Квырмыш рчпауата ахIврапшдзаква щтIарцIатI Апсны апрезидент Анкваб Александр, авице-президент Логуа Михаил, Апсны апны Россия ащтийыгIв Григорьев Семен, Апсны апны ГIвадахь Осетия ащтийыгIв Боциев Олег, аправительства йалакву, ажвлара ргIащтийыгIвчва.

Агвыргъьахъв айззара Апсны акъральыгIва филармония апны йакIвшатI. АкъральыгIва баракъква анщтIырх агIан Апсны йгьи Россия ргимнква гIарттI. УадыргIвана Апсны апрезидент Анкваб Александр йгIайззаз зымгIвагьи тшырзынайырхатI: «Апсуа уагIахъа йгьи Апсны аправительства рыхьызла аразыра ажваквала тшышвзынасырхитI, араъа швгIадгылта Апсны абзазагIвчва зымгIва рыхъазла магIны зму ари агвыргъьахъв ъахIыцнажвдасуа швабыж йхIгвапапI».
Асасчва ангIачважва амщтахь айззара йалакваз зымгIвагьи гIагылын дакъикъакI ауацIа йдзыргIвуата Апсны апрезидентква Ардзынба Владислав Григорий йпа йгьи Багапш Сергей Василий йпа рджьабауата квырмыш рзырчпатI.
Агвыргъьахъв концерт йалата рыршIыйара гIадырбатI Апсны акъральыгIва ашвахIвагIвчва капелла, йбергьльу Апсны аэстрада ашвахIвагIвчва. АпшыгIвчва Россияла ауагIа рартист Лещенко Лев ашва анихIва йгылата напIы йзастI. Лещенко Лев агвыргъьарамш ахьызла апсуа уагIахъа драйхIвахIвтI: «Сара швабыж схъа аладупI ртшхъвара дула йбергьльу акъала СогIвым апны асцена съахвынгылу. ХIара араъа амари апхари рыхъазла айгвара хIызбжьата агангьи сасра хIгIайлун. Агвыргъьарамш анысла сшвайхIвахIвитI, амамырри анасыпи швзыстахъпI». ЙгIаргванхауа амарамш ду – Апсны абзазагIвчва р-Абашта айсра апны АйгIайра йахъыцIуа асквш 20 – йадахIвуата Лещенко Лев йбергьльу ашва «АйгIайра Амш» гIайхIватI.
Агвыргъьарамш ауагIа ркьахвра щтIнахуата СогIвым аурамква гIацIанакIтI. Атеатр йаргвану ауатыкв апны йбергьльу ауыжвгIанчIви ашвахIвагIв Носков Николай йыршIыйарала йадгалаз аконцерт акIвшатI.

Квициниа Асида,

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki