Library

«Дасу йбзазаща йбзазащапI, хIара ари акIвпI йхIбзазару.
Адуней апны хъадата йхIпхьадзауа акIвпI ари,
ХIара бзи йыгIбауа, хIзыргвышхвауа акIвпI ари,
Ари акIвпI хIара йхIпсыпнкъвгару,
Брейк-данс акIвпI ари».

Абарат ажваква ахъадзгылата июль а 28 Апсны апны брейк-дансла й-II-хауа адуней фестиваль гIахъыртIытI.

Апсны апны брейк-данс from Alashara on Vimeo.


Афестиваль адызгалыз брейк-данс гвып «Апсны –Q» рунашвачпагIв, ауат ргIахIвраква йрыдынхалуа Тачулиа Джамал Юрий йпа, арыпхьагIвчва Лазариди Константин йгьи Саманба Адгур ракIвпI. Афестиваль адгалра йацхърагIатI ажвлара «ЙшIу Апсны» йгьи Согъвым къала апны аспорт ауысла акомитет апредседатель Арчелиа Беслан.

Абрейкерква (ауат рхъа датшатагьи йапхьитI – b-boys йгьи b-girls) Россия йапшым аштаква йгIартыцIын йгIайтI: Москва, Сочи, Къабард-Балкъар. Афестиваль йалалныс йахвитын асасчва, атуристква, апшыгIвчва рыуа дзачIвызлакIгьи.

Афестиваль гIванкъвакъвракIла йалан (дара рхIваща «гIвбаттлкIла»). Йапхъахуз анкъвакъвра апны 5-12 сквша зныбжьу ачкIвын-чкIвынква ракIвын йалаз, йгIвбахуз апны ахIбачва – 14-17 сквша зныбжьу чкIвынргIа. «Абаттл апны йанйауа агIвыджь рыуа йайгIайуа агIахIвра рыцIа йазъазу йакIвпI, ауи йгIайырбауа аквпшыраква анахьани дазычпамызтын», – йхIвитI Апсны абрейк-данс гвып аунашвачпагIв.

Йара брейк-данс агIагIвыщаквагьи гьапшым: йаъапI хип-хоп, йаъапI къару щарда ъагIадрысабапуа («power move»), йаъапI геликоптер (рнапIквала йгылата рщапIква анхъындырхIвуа, йаъапI бекспин – бгъала йщтIата йанхъынхIвуа, ауасамцара . «Ауат рыуа рыцIа йбаргву агIахIвыща «power move» ззырхIвауа акIвпI, йшпакIву ухIварыквын араъа абакIыща атехникагьи, акробат хъапалщагьи, йгIахIвуа агIвычIвгIвыс йара дыззычпугьи йзыгIарбауата акIвпI йшгIахIвуа. Къару зпщылу агIахIвыща ажва аламкIва уымч йалазырхIауа атшыбжьараква рамальквала тшазурахIазырра атахъыпI: унапIква ркъару бзита, ущапIквагьи багъьата», – йгIаликIгIатI Тачулиа Джамал.

«ХIара хIгвып гIаншищтара хвысквша цIитI, – йхIвитI Апсны абрейк-хореограф хъада, – Апсны апны брейк тшыбжьарта ангIахъхIтIы чкIвынчвата йнайуаз 12-15-гIв йгьрайхIамызтI, ужвы ауат рпхьадзара 64-гIв йнадзитI. Ари агIахIвыща Апсны апны тшауацIнахуа йалагатI: Гагра, Ткъварчал, анахьанат арайонква рпны апхьартаква гIахъыртIытI, Согъвым апны гIвапхьартакI аъапI».

Анкъвакъвра агIарбараквала айцIбачва рпны Апсны йауу Гигава Леван дапхъагылагIвхатI, апшыгIвчва рсогIа Мумджан Славик йквнадыргатI. Й-II-хауа адуней брейк-фестиваль дачемпионхатI Апсны ргвып йрылу Адлейба Анрик.

Афестиваль хъыргIвахуата ауи апны зъазара гIазырбакваз ачIахIныгIва ртшхъвагакви амедалькви рыртатI.

Квициниа Асида,
«Абаза Къраль» сайт йазалхпI

Асуратквагьи авидеохъыхрагьи автор лхъатачIв архив йгIалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki