Library

Сентябрь а 21 йгьи а 22 рагIан Согъвым апны Егьзакь Муса йыхьыз зхъу хвитра абакIрала йапхъахауа адуней турнир акIвшатI. Атурнир адызгалыз хвитра абакIрала Апсны абжьагIвы хъада Бениа Джарназ йакIвпI. Анкъвакъвраква йрылан Краснодар, Санкт-Петербург, Ростов, Къабард-Балкъар республика, Гулькевичи, Апсны аштаква йгIартыцIыз аспортсменква, ауат 80-гIв йнадзун.

Атурнир йапшырныс йгIадрайгватI чIахI нкъвызгауа асасчва тлапIаквагьи. Ауат йрыуан спортли чкIвынргIи руысквала аспорт комитет апредседатель Авидзба Щазина, хвитра абакIрала Апсны афедерация апрезидент Хутаба Ращ, хвитра абакIрала гIван адуней йачемпионхаз Царгуш Денис, датшагьи агIатгара дуква зму аспорт мастерква.

Бениа Джарназ аюбилей турнир гIахъитIытI, асасчвагьи, аспортсменквагьи, апшыгIвчвагьи драйхIвахIвтI, адахIвра дуква шырзитахъу йхIватI. Ауи «Абаза» спорт клуб апрезидент Егьзакь Муса ХIабальа йпа Апсны апны аспорт атшауацIнарыхра йхатI ду ъалайцIауа ахъазла квырмыш йзичпауата тшизынайырхатI.

ЙгIачважвара апны Егьзакь Муса атурнир асасчвагьи аспортсменквагьи тшырзынайырхауата ргIаджвыквцIара бзиква зымгIва рпынгьи адахIвра дуква шырзитахъу йхIватI, йалкIгIата аспорт апны. «УахьчIва йапшу агвыргъьарамшква рахIагьи йщардахагыс ахъазла хIара йхIылшауа зымгIва хIчпалуштI. Ауыс бзиква рахъвдаквыщтра апны алшараква гIахIызтуа Анчва квырмыш ду йзысчпитI. Апсны апынгьи анахьанат аштаква рпынгьи хIара йапшым аспорт квпшыраква ртшауацIыхра хIацхърагIуштI. Олимпия пьедестал зщапIы ззыхвныргылыз аспортсмен ду Царгуш Денис ашIаква рпны швапх бзита дхIыдзхъагылапI. ХIара йазхъахIцIитI швыуа дзачIвызлакIгьи Апсны къральыгIва ащаквыргылра багъьата дшацIагылуаш. ХIуахьчIва бзазара апынгьи йгIаталуа хIуачIвы апыгьи хIзайгвыгъауа швара швакIвпI», – йхIватI Егьзакь Муса.

Зныбыжьли зхIатларали йахъыхацIыхыз аспортсменква ранкъвакъвра уаланахIвауата йджьащахъван. ЙгIвымшкIхуз, атурнир аналга амщтахь, апхъагылагIвчва рыхьызква гIархIватI, акубокква, амедальква, ахча согIатква рквнадыргатI.

Атурнира аналга хвитра абакIрала Апсны абжьагIвы хъада Бениа Джарназ аспортсмен шIаква тшырзынайырхауата абжьагажва пшдзаква райхIвтI, аспорт апны адахIвракви агIатгара дукви рзитахъта драйхIвахIвтI.

Квициниа Асида,
АгIвыра «Абаза Къраль» сайт йазалхпI.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki