Library

Сентябрь а 27, СогIвым Агвыргъьарамш андыртлапIуз атшын, Щынквба Баграт йыхьыз зхъу апарк апны уысарали прозагIврали аршIыйара анкъвакъвра агIарбараква йрылапштI. Абашта айсра апны апсуа уагIахъа р-АйгIайра йахъыцIуаз асквш 20 йадахIвуата акIвын анкъвакъвра аунашва сынчIва август мыз агIан ауатыкв йшгIаталыз. Ауи йагIаджвыквцIагIвхатI чкIвынргIа йгьи аспорт руысквала СогIвым аунашвачпарта акомитет анхагIвчва. АршIыйара анкъвакъвра йалан сквшы 17 йгIашIарышвта сквшы 35-дза зныбжьу авторква. Анкъвакъвра йгIадыргалыз ауысара гIвыраква 50, апроза гIвыраква 40 раъара йнадзун.

Анкъвакъвра агIарбараква йъадзарылапшуаз Апсны апны йбергьльу ауысагIвчви агIвгIвчви йгIайззакваз рпахь руысаква йгIарыпхьун. АуысагIвчва шIаква угви упси цIолата йрылалуа ауысаква шырзыгIвуа зымгIвагьи йджьаддырщатI. Анкъвакъвра анадзара швабыж йхIагIан, ауи ахIатырла рыцIа йагъькву рыхьызква рщаквыргылрала ажюри руыс гьмайрамызтI. Зныбыжьла, злахIвара къарула йапшымыз ашIаква швабыж йхIагIу аъазара гIадырбатI, рхъашыгIврала аздзыргIвчва ргвы йнадзаныс рылшатI.
АршIыйара анкъвакъвра агIарбараквала рыцIа йагъьу нхарата йырпхьадзатI Кварандзиа Инна лгIахIвахра «Йхвиту Апсны, упхьынцIыгIваква ауацIых», Квициниа Саида луыса «Апсны апхьынцIыгIваква». АршIыйара анкъвакъвра апхъагылагIвчва согIата йрыртатI Апсны йапхъахауа апрезидент Ардзынба Владислав йсурат зну ахьапщ ахчаква «апсары», Акъва асуратквала йадгалу афотоальбом.
Турава Элона лгIаджвыквцIарала, анкъвакъвра ъакIвшуз апарк апны урам библиотека адгалан. Элона йгIалхъвыцыз ауыс бзи архъйара йацхърагIатI чкIвынргIа йгьи аспорт руысквала Акъва акомитет анхагIвчва. Апарк апынгьи адзтшпурам апынгьи акнига тараква кIныхIан, йгIазтахъхауа дзачIвызлакIгьи акнигаква нарахвта йрыпхьа йа дара ркнигаква гIаргта йыртарцIа ауан. Элона лгIаджвыквцIара зпщылаз йцIыхъвахауа агIамта ауацIа чкIвынргIа акнига апхьара тшъачвдрыхъарауа акIвпI. Апроект мурад хъадата йархъйун чкIвынргIа книга апхьара рымагIальаматта тшадыркIылра. Анкъвакъвра апшыгIвчва йрылаз Логуа Алиса йшылхIвауала, акъала апаркква, адзтшпурам рпны йаныргIалыз «акнига тыдзхвыцква» – гIаджвыквцIара бзипI. Ауи Апсны апны чкIвынргIа книга апхьара шрымагIальаматхуш йазынархапI. «Сшхъвыцуала, уыжв ласыла арат асыра хвыцква рпны йапшым акнига гIацIщтраква йрылахIуштI, чкIвынргIа ауат йрыпхьаныс йгIартахъхуштI, йрымагIальамтхуштI», – йгIацылцIахтI Алиса.
Акъала акомитет анхагIвчва стенд гIважви жваба дрыхIазыртI. Ауат йбергьльу апсуа гIвгIвчва, ауысагIвчва, апрозагIвчва – Гулиа Д., Аджьпа Т., Ломиа К., Когониа И., датшагьи – ргIвыраква йгIарылху ажванахъа гвыбзыгъаква, ацитатаква рынгIвылгIан. Астендква йырнын айсра йаладзыз ауысагIвчва Бардодым Александр, Делба Саида, Чанба Олег руысаква йгIарылхыз асатыр гврыпшшгIагаква. Айззара аналга амщтахьгьи ауагIа щарда йаларкIван, философия хъвыцрали уасаражврали йырчву апсуа гIвгIвчви ауысагIвчви рсатырква йрыпхьун.

Квициниа Асида
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki