Library

Беигуаа Омар йыхьыз зхъу СогIвым аурам апны агIвыма къральква йыртабзазауа апсуаква ртурых амузей гIахъыртIытI. Амузей ангIахъыртIуаз айззара йалан Апсны апрезидент Анкваб Александр, аправительства йалакву, Сирия, Трыквшта йгIартыцIыз арепатриантква, акъала абзазагIвчва.

Беигуаа Омар зыхьыз бергьльу дапсуа уысагIвпI, дтурыхдырыгIвпI, дбызшвадырыгIвпI, дарыпхьагIвпI, Трыквшта апны апсуа мхIаджьырква арыпхьара дырра щарда рылайцIатI. Омар йапхъанчIвиква Абжаква кыт йауата Трыквштала йхъысхкваз йрыуапI. Йара Беигуаа Омар хIара дыхIуыжвгIанчIвипI. Ауи асквш 2001 агIан адуней йхIваджьтI, апсуа уагIахъа ртурых ауысла швабыж магIны ду зму агIвыра гвыбзыгъаква гIайтынхатI. Апхьахьа йынхараква апсуаква рапхъанчIви культури руыжвгIанчIви культури рашIырпшра рхъвыхра швабыж йахъвуштI. РыцIа йгIалкIгIа йауаштI гIвынхара дукI – «Апсуа мифология» йгьи «КIавкIаз». Ауи акIвымкIвагьи апсыуа бызшвала уыса йгIвуан. Беигуаа Омар йлирика йцришта, дзылхъвдахаз йпсадгьыл йырзынарху алахIвараквала, афилософия хъвыцраквала йырчвыпI.
Атурых гIазырбауа амузей аэкспонатква хпещ дукI рпны йаныргIалпI. АпещкI апны йжвипщхауа асквшышв йгIашIарышвта йгIважвахауа асквшышвдза апсуаква ртурых гIазырбауа аэкспонатква аныргIалпI, йгIвбахауа апещ ду йыгIвну агIвыраква апсуа диаспора рыгIвычIвгIвыс дуква – апхьахьаква, ажвлара уыснкъвгагIвчва, аспортсменква – йгIарыквчважвитI, йхпахауа апещ аэкспонатква рщарда Беигуаа Омар йхъатачIв пкъыгIваквала йадгалапI, анапIлагIвыраквали асуратквали. Атурых йачIву апкъыгIваквали ашвъаквали йадгалу аэкспозиция айззара йалаз зымгIвагьи гIальаматра ду азырбатI, йалкIгIата атурыхдырыгIвчви чкIвынргIи. АуагIа амузей агIахътIра гвыргъьара дула йапылтI.
Амузей аунашвачпагIв Инджгиа Джамбул аэкспонатква радгалра йацхърагIаз зымгIвагьи дшырзыразу лхIватI. Ауи йшгIалылкIгIазла, амузей аэкспонатква сквшыкI ауацIала йадыргалтI. «Йапхъахауа ачIвырхъа хIчпатI. Сшхъвыцуала, агIвыма къральква рбзазагIвчва ракIвызтынгьи Апсны йауу ракIвызтынгьи Беигуаа Омар йабадырныс, йыцынханыс зынасып йгIанакIыз рбзирала амузей аэкспонатква йрылахIауа йымгIвайсуаштI», – лхIватI Инджгиа Джамбул.
Амузей ангIахъыртIуаз Трыквшта апсуа диаспора йрыуу, сквшкъомкI руацIа Беигуаа Омар йцхърагIуз Папба Махинур даъан. Араъа йапхъахауата йгIашылыз ауагIа рпахь дгIачважвауата ауи амузей агIахътIра амагIны шдуу гIалылкIгIатI. «Ари амузей адуней акъральква йрылапсу хIуагIахъа рыхъазла ныхIвартазлуштI. Зпсадгьыл йачвыхъарата апсуа бызшва атшауацIнарыхра ахъазла Беигуаа Омар йайхIа зчпаныс йзылшаз сара датша гIвычIвгIвыскIгьи дгьсыздырам, – лхIватI Папба Махинур. – ХIара щарда цIуата хIгвы йтан ауи йыхьызла музей агIахътIра. УахьчIва абари хIгвала хIыла йабитI. ЗымгIвагьи сышвзыразпI».

Квициниа Асида
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki