Library

Лакоба Нестор Аполлон йпа – атурых апны щта пшдза гIанызжьыз дгIвычIвгIвыспI, й-ХХ-хауа асквшышв й-30-хауа асквшква рагIан Апсны а-Нарком (ауат асквшква рагIан йщаквгылаз аправительства – ХI.Б.) апны дынхун. Нестор Аполлон йпа Апсны зщапIы багъьу къральыгIвата йщаквгылныс, апсуа уагIахъа рбзазара тшауацIнахныс ахъазла къару ду алайцIатI. Ауи ахIатырла хIуыжвгIанчIвиква Лакоба Нестор йыхъазла агIвыра гIальаматква ъагIандыршауа йджьаущушта йгьаъам. Дабар Апсны къральыгIва университет йгIалгаз Гулиа Эслинда – ауи лкъальам йгIацIцIтI США апны англьыз бызшвала адуней йгIаквлыз акнига «Нестор йгьи Сария Лакоба».

Лакоба Нестор Аполлон йпа йбзазара йапщылата уыжвгIандзара йбергьльым щардапI. Асквш 1921 йгIашIарышвта Нестор Аполлон йпа Апсны даунашвахъцIагIвын, ауагIа пIатIу ду йыквырцIун, швабыж бзи дырбун. Абзазара аъаща анхьантаз ауагIахъа шгIайхчуш, апсуа уагIахъа рыжвлара-культура бзазара атшауацIнарыхра, арыпхьара уысква рырхъйара, ауагIахъа ъачIвагIагIвчва ррыхIазырра дащтан. Зуысква аквзыршваныс зтахъыз ауагIа анахьанат ажвлара уыснкъвгагIвчва йырзымцауата рейша Нестор йыдгылуан, ауи йакIвымкIва датша аджвырагIв гIарцхърагIушшва йгьрымбузтI. Швабыж йгвасрапI, ауаса акъральыгIва уыснкъвгагIв ду йгвалаква рщарда абзазара йгьизаламыжьтI – асквш 1936 декабр мыз агIан дпсытI (архъвыхыгIвчва рызджьакI йшырпхьадзауала, ауау дадыргатI).
Лакоба Нестор йхъапщыла – Лакоба Сария – дпхIвыс пшдзан, лщала дтрыквын, зыхьыз бергьльыз ари акъральыгIва уыснкъвгагIв йбзазара апны лалацIара амагIны дупI. Сария зпхьадзара щардамкIва зальмагIала йхъатаркIыта цIкъьара злаз ашвъаква мачвы рыцIазымцIаз СССР акъральыгIва уыснкъвгагIвчва рхъапщылаква дрыуапI. Ауищтара лыхьыз Сария нкъвызгауата йгIаншаз ахIвссаква щардагIвыпI. Ййиуа ахIвссаква СарияхIва анрыхьырцIауа джьгарра ду гIазырбаз абауи апхIвыс мчхъа пIатIу шлыквырцIауа гIанырщтитI. Апсуа уагIахъа Апсны апатриот, агIвычIвгIвыс ду Лакоба Нестор анцIарала ргвы дтапI, дгьырхъаштылуам. СогIвым аквта ауи йхъмаштылга син дыргылтI, Апсны акъалаква зымгIва рпынгьи йгылапI ауи йапшу асинква.

Квициниа Асида,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki