Library

Арысасра ацIасква

Арысасра ацIасква сквшышвпхьадзарала йщаквгылтI. Ауи заджвгьи ймыгIвхъйымгауа зымгIвагьи йнадырдзауата йынкъвыргара рборчу цIаспI. АгIвычIвгIвыс бзира щарда йчпузтынгьи асас дизынамдасуазтын ажвлара рпны йыхв накъвитI, дмарачвахитI.

АцIас шаъула, агIвычIвгIвыс дандрысасуа ахчазтынгьи датша хвызтынгьи закIгьи аунашва ауатыкв йгIатарцIа йгьауашым. Ауыла апшвыма йгвы дасныс закIы гьазхIвам. Асас дангIайлакIгьи тшпсищаныс, йтахъу зымгIва нахъаныс ахъазла апшвыма йаргьи йтгIачвагьи йрылшауа закIгьи гьгIанырыжьуам. Асас дгIазрайгваз апшвыма йыгвлачвагьи гIайцхърагIитI, дыззыбжу кIара аъазтын даларбитI. АгIвычIвгIвыс сасра дцаныс йгвыгъазтын ддрайгвушмахIва дгьазпшуам, йгвы дъагауа аунагIва дрызцитI.
АпхъанчIви заман асас йымхIара апшцIа апны кIьыдата йырчпун. Уыжв азамангьи асас рыцIа йбзийу, йтыбгIу, йлашару апещ акIвпI йзалырхуа. Апсуа бызшвала ауи «асасааирта» – хIва йапхьитI [1]. «Асас пIатIу ду йыквырцIауата йзалху апещ апны ддрайгвитI, ддырчIвитI. Апшвыма ауи зынла дгьйыдзхъачIвум, хвду шизыбауа гIайырбауата зныкI ахъазла дихъадзгылитI, тIакIв анцIра дйыдзхъачIвитI», – йгIаликIгIитI апсуа этнограф Инал-ипа Ш. йкнига «Апсуаква» апны [2]. [2].Апещ датша заджв дгIашылпхьадза апшвымагьи асасгьи гIагылитIта йпыралитI, дрыдзхъачIваныс ддрайгвитI. ДангIайра йгIашIарышвта днардасхындзыкIьа асас зъара даъазлакIгьи (мышкIы, гIвымшкI йа йайхIата) атгIачва зымгIва ауи йайгвыгIвитI, йгIаншитI агвлачвагьи, аъахIыльчвагьи, аргванквагьи руысква надрыскIьата асас данрыцнардасуа. ПIатIу зкву агвлачвагьи асас тIакIв йыдзхъачIваныс, йгвы пшыхь тадрысныс йгIазшIыртлитI. АпхIвыскви чкIвынргIи амацIауырта йаъата айшва дрыхIазыритI, асас йыхъазла квтIу, уаса йа джьма рщитIта йырмацIауитI.
Асас даннардасхуа согIа, чвахъабага йыртлитI. Ареволюция апхъала атлахан согIата асас тшы анйыртлузгьи гIаншун. ЙгIаншун аунагIва апны асас йара йгвапхауа пкъыгIвакI аунашва анихIварыз ауи согIата йыртуата.

Айшванкъвгара

Аэтнография архъвыхраквала йгIауахвырквын, Апсны апны айшванкъвгара ацIас швабыж йалачпапI.
Ачаражвраква рпны рызкъ алых щардала йадгалу ауыжвгIанчIвиква райшва йгIаквухырквын апхъанчIвиква райшва фачIв зигIвала йгьбайамызтI. АдзыхъгIаквала, кьахв уызрауа адзайшаквала, ауатралыцIква, ажьы, ахшлыцIква йрылармацIауа афачIв зигIваквала йбайу апсуаква рмацIаура йауата айшва йгIахвындыргылуаз йдрыхIазыргIвацаз, ауи амщтахь рыцIа йгIалыркIгIуз арызкъква ракIвын. Ауи апш айшва адгалща цIаста йщаквгылын уыжв азамангьи ауат афачIвква ракIвпI апхъа йдыргылуа, ачаражвраква рагIангьи апсхъвква ракIвыршара апынгьи йдрыхIазыруа, йырмацIауа. Баста, чашв, ашвы, уаса йа щамакъ жьыжвхьа, гырраса злу, квтIужь йа гвагвыщыжь ачIванла йырмацIауа арызкъква, йбергьыльхаз апсуаква раджьыкIа (джькIа, джьыш, чыбджьи агьиквала йалу), дара рнапIыла йырчпауа аджьузым чагIыр.
Ачаражвра атшын гIамдзаскIва рыцIа паса тшаздрыхIазыруа йалагитI. Апсуаква тацанадылра йа датша хайыркI йаналу асхъан адгалчIв уысква ауи аъара йщардапIта тгIачвакIгьи дара ркъаругIваца гьаквхъум. РъахIыльчваквагьи рыгвлачваквагьи гIарцхърагIитI. Асасчва, аткъвым ахIбачва, пIатIу зкву агвлачва, дасу йахIбара-айцIбара йаквнагауата йаладырчIвитI. АшIацIахъвы гIащтIырхуата апшвыма дгIагылитIта зымгIва йшыргIуш апшта аунагIва злу ахайыр аунашва гIарылайхIвитI, йымгвжважвауа аджькIахбаста агIвыршаныс, агвыргъьахъв рыцнардасныс дахIвауата айшва йадзхъачIвакву зымгIвагьи тшырзынайырхитI. УадыргIвана ахIбара зквнадыргаз йборч йырхъйауа далагитI. Ачаражвра джвыквицIитI.
Ачаражвра айшва апны йхъаду ауысква ахIба йакIвйыршитI. Апхъапхъа апшвыма ахIба йыхъазла дхIвахIвуата шIа щтIихитI. Асасчви апшвымакви ахIвахIвра рызбжьата асогIаква амырдитI. АхIбара зквнадыргауа агIвычIвгIвыс йчхIарагьи йнаграгьи бзизара, ахабзаква йдырра, дызхIвахIвуата, агвып йызрыпшадзауата даъазара атахъыпI, йшпакIву ухIварыквын айшва хърымгIваскIва йадзхъцIуа заджвгьи дгьгIацапахуам. АцIас йшатахъу апш йнайырдзауата агвып рахIба айшва йадзхъачIву зымгIвагьи пIатIу рыквицIитI: асас йпIатIу, ахIбара-айцIбара йа аъахIльыра агьиква дырпшуамцара шIа щтIырхныс ахъазла кьазу-кьазу ажва рититI.
Айшва анхъыргIвахра асасчва гIагылхитI, апшвыма тшизынадырхауата йхIвахIвитI: «ШвунагIва анчва йырбагIватI! ШвджьыкIахбаста йазхIарагIатI!» – хIва. Апшвымагьи асасчва найдасхуата, – «ДжькIьахбастата йышвшIашваз хIальаль йшвзалтI», – йхIвитI.

Козлова Эльвира


[1][1]Инал-ипа Ш.Д. Апсуаква. СогIвым, «Алашара», 1965, 422 ан.

[2] [2] Йара ауаъа, 423 ан.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki