Library

Апсуара – сквшышвпхьадзарала йщаквгылыз апсуаква руагIахъа тшдырра йадамыгъапI, ажвлара хвду ззырбауата йынкъвыргуз ацIаскви ахабзакви аднакIылитI, агIвычIвгIвыс йъадаб-намыс щаквнаргылитI, ауи аптшра аджьаль йагIвызата йырпхьадзитI, адуней цивилизация апны апсуа уагIахъа ргыларта гIазырбауа апхъанчIви культурапI. Абараса акIвпI апхьахьа Инал-ипа йкнига апны апсуара дшаквчважвауа [1].[1].

Апсуаква рапхъанчIви культура, ауи щайдза цIолата йазалуа апсуара сквшышвпхьадзарала йщаквгылуаз гIаншарапI.
Адуней йгIаквлищтара апсуаква йрыгвлаз ауагIахъаква ркультураква йгIаршIыркIгIуз дара йрыквыргIапста, йрыхъвушта йырпхьадзаквуз аъащакви адырракви ракIвын. Ауат адырракви аъащакви дара йынкъвыргуз ацIасква рпны йангIалуата йгIадрысабапуан, рбзазара мачI-мачIымцара йалалуан, йахъвхун, хабзата йщаквгылуан. Абараса ауагIахъаква йащтаныкъвумцара ркультураква байахун, рыщайдзаква багъьахун, хъатачIв джыпха йтагылата тшауацIырхуан.

Бжьара

Апсуара абзазара апны агыларта рыцIа-рыцIа йбагъьахун, бжьара, гIадзныргылра амальла абанпараква йамырдун.
Ауи ацIасква атгIачва рпны асабиква йшчкIвыныз йгIашIарышвта йрыларцIун. Араъа ани аби ракIвын швапха бзита ргIариква йырзалуаз. Ауи йацхърагIун, йарыбагъьун ажвлара рыргIапсщагьи, атгIачва рпынгьи ажвлара рпынгьи апсуара цIас багъьата йщаквгылан.

ЙгIважвахауа асквшышв апныдза апсуаква рпны асабитгIачваква щардан, атгIачва рпны айцIбачви ахIбачви разазаъащаква цIас багъьала йаныргIалын. АтгIачва рпхьадзара 30-гIв йаннадзуз гIаншун. АтгIачва дуква рпны ацIасла йазалху ахъгал рыман абзазара йарыгвыбзыгъаз ахIбачва – абадучва, андучва. ЙалкIгIата ауат ракIвын ауагIа культура йашвапха хъадаз. Ауат йрыквырцIуз апIатIу швабыж йдууын, айгвыгIвра дули чIахIрали йкIвыршан.
Хабзала йалыхын ахъацIи апхIвыси, анчви-абачви ргIарикви, дара асабиква азаджв азаджв йпны разазаъащаква шаъазара атахъу. Ауат азазаъащаква щатата йрыман абзибара, агвхътIыра, ацкьара, ацIабыргра, айгвыгIвра, аджьауапкIра.
Асабиква ръадаб-намыс атгIачва йырхъазымкIва ажвларагьи ахъпшылуан. Ани аби ракIвымкIва ауат йрайбжьун дзачIв ахIбазлакIгьи, йалкIгIата атажв-лыгажвква. АхIба дъахIльызтынгьи, дгвлазтынгьи, дгIвымазтынгьи асаби йанымгIалуа закI йчпузтын дгIашIайкIныс дахвитын. Ажвлара ражва амагIны дууын, асабиква ауи хвы шазырбуш йазырбжьун. АуагIа ргвыбзыгъара апны йанымгIалуа аъаща-чпаща этикетлагьи йгIарбан – «пхащарапI», «йгьцIасым», «гвнахIпI» рхIвун. Асабиква йшхвыцыркIву йгIашIарышвта раъащаква рпны йангIалуи йанымгIалуи гIаргвындыргIвуа йгIадзындыргылуан. АчкIвынчва щардала рабадучва, рабачва, райщчва ахIбачва йрыцта аунагIва уысква тшырзырбжьун, ргIапсара йзайгвыргъьахуа йгIадзынгылуан. АхIвссаква ранчва йрыцта амацIаура, асасчва айшва рзадгалра тшазырбжьун, аъадаб-намыс рыларкIуан. АчкIвынчва ргIадзныргылра апны магIны ду азырбун рхIальшан асайра: ахъацIара, агвышхвара, ачхIара, аджьгарра, абагъьара рыларцIун. Ахъвмарракви анкъвакъвракви дызту атурыхзаман йгIаквхта агIвычIвгIвыс абзазара уысква дрыздрыхIазыруан (анхара акIвызтынгьи, айсра уысква ракIвызтынгьи).
АуагIа ршIалахIвара асабиква арыгвыбзыгъун, рдырраква арыцIолун. Асабиква алокIква, атурыхква, НартргIа рхабарква йрыздзыргIвуа, ажважвквала, аласхIвараквала йхъвмаруа, кытча йасуа йгIадзынгылуан. Ауипхьадза асабиква ракъыль пшгIун, рхъвыцща тшауацIнахуан. АлокIкви атурыхкви рфырква хъацIари гвапари нкъвыргауата, чхIари, гвчIагIври, джьгарри рылата, ахIбачви апхIвыскви пIатIу рыквырцIауата акIвпI ртурасква шгIарбу. Асабиква ауат ршвапха йашIпшуа, рхIаль бзиква рыларкIныс ртахъыта акIвын йшгIадзынгылуаз.


[1][1]Инал-ипа Ш.Д.: Апсуаква. СогIвым, «Алашара», 1965.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki