Library

Апсны агеография аъаща ашвхIаусыгIвала (хъатакIла – Грузии России, датша хъатакIла – Трыквшта) араъа абзазагIвчва рщардагIв гIвдинкI нкъвыргауа йалагатI – динисльами кьристан дини. Ауаса акъральыгIва ртурых аурала апсуаква Анчва Ду йакIвын йыззхъарцIуз.

Кьристан дин

Апсны (Пицунда) апны йпщбахауа асквшышв ахъа йапхъахауа акьристан диннкъвгагIвчва гIаншатI. Араъа ари адин ащаквгылра Византия аимператор Юстиниан йыхьыз йапщылапI. Йцбахауа асквшышв агIан Пицунда апны йапхъахауа акьристан кьлиса руыхватI. ЙащтагIайуаз азаман ауацIа Византия рцхърагIарала ауи адин къральыгIва динхатI. Акьлиса шIыцква дыргылуа, акьристан дин уазква ауагIа йгIарылархIвауа йалагатI. Ауи азаман йдыргылыз акьлисаква рызбжа уыжвгIандзара йабгаркIвапI. Ауат йрыуапI, ажва ахъазла, асквш 965 агIан Апсны апаштахI Лиуан Моква апны йыргылыз акьлиса.

Апсны акъральыгIва ашта гIвынакви аполитика хъгалри йъарылахIуз йгIалцIла Лагъь КIавкIаз ауагIахъаквагьи акьристан дин йштаржьуаш йащтан. Ауи апшта апсуа паштахIква ргIаджвыквцIарала аланква кьристан дин нкъвыргауа йалагатI. Ауи ахабар Инал-Ипа йкнига «Апсуаква» [1] апны йгIайырбитI.

href=”file:///C:/Documents%20and%20Settings/1/%D0%9C%D0%BE%D0%B8%20%D0%B4%D0%BE%D0%BA%D1%83%D0%BC%D0%B5%D0%BD%D1%82%D1%8B/Downloads/%D0%AD%D0%9B%D0%AF%20%D0%A7%D0%B0%D1%81%D1%82%D1%8C%201.docx#_ftn1″>[1]

Йжвабахуз асквшышв агIан акьристан динбзазара апны апсахраква акIвшатI. Ахъгалра Грузия акьристан диннкъвгагIвчва йнарахвтI. Йжваххауа асквшышв йгIашIарышвта Пицунда акьлиса апны акъральыгIва хъараква йгIартыцIуаз адиннкъвгагIвчва райззара дуква акIвшалун. Адиннкъвгара аурым бызшва кырт бызшвала йырпсахтI. Ари ашIыцра ашвхIаусыгIвала Апсны апны кырт бызшви ауи агIвыри швабыж тшауацIырхтI.

Йжвыхвхауа асквшышв ацIыхъва атрыквква Апсны йгIагвыквсын абзазагIвчва динисльам йтадыргылуа йалагатI. Акьристан дин ангIацапах йжвежвхауа асквшышв аквтаква рагIан Апсны ачIвыла Россия паштахIыгIва йанахъвха амщтахь акIвпI. АуагIа щардагIвыта кьристан дин нкъвыргауа йаталагахтI.

ЙгIважвахауа асквшышв ахъа Апсны апны апсуа бызшвала кьристан дин анкъвгара агIаджвыквцIагIвчва гIаншатI. СогIвым аепископи урышв диннкъвгагIвчва гвыпкIи ргIапсарала адингIвыраква апсуа бызшвала йатаркIуа йалагатI.

Асквш 1920 йгIашIарышвта СССР аштаква зымгIва рпынгьи апшта Апсны апынгьи адиннкъвгара аъаща баргвы йташватI. Ауи йгIалцIла йынхуз акьлисакви адиннкъвгагIвчви рпхьадзара швабыж йалдзгIатI. Асквш 80-ква рагIан Апсны абзазагIвчва адин йазрыму агIальаматра йалахIатI. Дырра зму апсуа диннкъвгагIвчва шIыцква гIаншауа йалагатI.

Акырт-апсуа айсра амщтахь йдууым гвыпкI ркъарула Апсны апны адиннкъвгара гIащаквдыргылхуа йалагатI. Ауат епархия совет гIандыршан Апсны-СогIвым епархия даунашвачпагIвта заманкIла аиерей Аплиа Виссарион ддыргылтI. Ауи йбзирала кьлиса щарда рпны адиннкъвгара щаквгылхтI. Апсны апны дин политикала хабза щата зрымтуа гIвкьристан дин юрисдикциякI аъапI: Апсны аправославия диннкъвгара йгьи Апсны амитрополия диннкъвгара. Дин политикала пырас йанйарыгьи Апсны апны акьристан диннкъвгара тшауацIнахитI: акьлиса шIыцкви амонастырь шIыцкви гIаншитI, акьлисаква рпны Москва йгьи Русь р-Патриарх Кирилл йыхьыз дыртлапIалитI.

Акьристан диннкъвгара йазгIашыкъу агIамдагIвчва Апсны апны щардагIвыта йгIайитI. Ауат магIны ззырбауа ашIнатлаква йрыуапI Афон ШIыц (Новый Афон). Араъа Апостол Симон Кананит йыхьыз зхъу абыхъвкIынхIара, йжвабахауа асквшышв агIан ауи йнышвынтара йахъарчпаз акьлиса йгьи Новоафон монастырь аъапI.

Динисльам

Динисльам Апсны апны йжвыхвхауа асквшышв ацIыхъва йгIаншатI. Ауи агIан араъа атрыкв диннкъвгагIвчва апсуаква рдин йштадыргылуаш амальква нарахвуа йалагатI. Йапхъахауата йымсылманхаз Апсуа ахIкви агIмыстакви йрыуан. Ауат рщардагIв аполитика уысквали аэкономика уысквали Трыквшта йырпщылан. МачI-мачIымца ахIчви агIмыстачви Апсны апны динисльам багььата йацIагылтI. Йжвибыжьхауа асквшышв агIан СогIвым апны амшIы йгIалху гIвмаджьгыт дукI дыргылтI.

Атрыкв айфандква ракIвпI Апсны апны исльам атшауацIнарыхра йазынхуз. Ъазата тшъагIадырбуз йгIалцIла ауагIа ауат щардала тшырзынадырхалун. АуагIа рцIаскви рбзазари рпны амсылман диннкъвгара ащтаква гIанхун. АхIчви агIмыстачви анышвынтара ахъадасаква эпитафия рынгIвылгIата йдыргылуан. Апсуа мсылманква хIважьы гьрымфахуазтI, ауи ахIатырла араъа ахIвархIара швабыж йалдзгIатI. Инал-ипа йшипхьадзауала, апсуа ахIчви агIмыстачви рыхьызква (хъацIа хьзызтынгьи пхIвыс хьзызтынгьи) рцIыхъваква «бей» – хIва ъацырцIузгьи динисльам йгIаннажьыз ащтаква йрыуазакIыпI [2].

href=”file:///C:/Documents%20and%20Settings/1/%D0%9C%D0%BE%D0%B8%20%D0%B4%D0%BE%D0%BA%D1%83%D0%BC%D0%B5%D0%BD%D1%82%D1%8B/Downloads/%D0%AD%D0%9B%D0%AF%20%D0%A7%D0%B0%D1%81%D1%82%D1%8C%201.docx#_ftn2″>[2]

Ауаса, атрыкв айфандква ага тшаквырщыргьи динисльам тшадызкIылыз абайагIвацаква ракIвпI.

Апсны ачIвыла Россия йаналахъвха амщтахь апаштахIи а-Урышв православия диннкъвгарти «КIавкIаз апны акьристан дин агIащаквыргылхра ауысла жвлара» гIандыршан йамайчуа йынхун. Ауи агIан апсуаква рпны динисльам хабза мыгIвхъгарахатI. Ауи ауысла йдыркъванчуз агIвычIвгIвыс Сбырла дтыргун, йгIариква йыквырхуан, къвады йыквырцIун йа йтгIачва амцIырхуан.

Йжвежвхуз асквшышв йгIвбахуз аъарагIвшара атлахан, амхIаджьырра анджвыквыл, апсуа мсылманква Трыквшатала йахъырщтуа йалагатI. Йымцырахаз адгьылква рпны йквачуаз ауагIа гIачIвауа йалагатI: аурымква, армельква, аурышвква… Ауи йадрыхвитуаз аквачыгIвчва кьристан дин нкъвыргара атахъын, ауат хвитнагIа рщардан, къвады гьрымшвузтI, ахъгалраква рыман.

Апсны апны динисльам мачI-мачIымца тшгIащтIнаххитI. АмхIаджьырква ртынхаква рыуа щардагIвы рабадучва рцришта ахьыла йъагIацапахуагьи ауи йашвхIаусыгIва закIыпI. Трыквшта йбзазауа апсуаква зымгIвагьи рыщайдзаквала йымсылманпI, ауат йызтагылу адин цкьата йынкъвыргитI. Асквш 1995 агIан СогIвым апны Апсны амсылманква рдинунашвахъцIарта гIандыршатI. УахьчIвала ауи аунашвахъцIарта анхагIвчва апсуа мсылманкви Россия, Лагъь КIавкIаз амсылманкви аргванызчIвуаш амальква нарахвитI. Йара ари ауысла Апсны Республика аунашвачвагIвчва Трыкв республика апны адиннкъвгара ауысла аунашвахъцIарта, зыкьпхьадзара йнадзауа апсуа диаспора йрыцынхитI.

Маджьуси диннкъвгара

Йцбахауа асквшышв аквтадза апсуаква маджьусийын. Аткъвым ныхахIвартаква швабыж йрызсакъхауа, магIны ду рзырбауа йынкъвыргун. Ткъвымипхьадза зылпха рауата йырпхьадзуз Анчва квырмыш йзырчпун. ЗымгIва алата йщтIырхуаз, квырмыш ду ззырчпуз Анчва Ду йакIвын. КIьыдата квырмыш рзырчпун Ажвейпша (ашварацыгIвчва дахIвра йахIвауата тшыззынадырхалуз абнакви абна швыркви рынчва), Айтар (аунагIва псауышвхIаква рахъшахъыцIра тлахан агIан тшыззынадырхуз анчва), Джьаджьа (адгьыли атшыгIври рынчва), Гвында (ащхакви ащханкъвгартакви рынчва), Швашвы (ажьийра анчва), Ерыш (асхъарыхIазырра ауысла анчва), Дзиуара (адзи акви рынчва), Афы (ажвгIванддри ацхысри рынчва). ЙашIыхIпхьадзаз рыуа уахьчIвала ауагIа йырхъмаштылуата ацIасква йгIарылахаз йрыуапI Анчва, Дзиуара, Афы.

Апсуаква йраргвану абазаква йшырпхьадзауала, апхьала адгьыл аджьын чвгьакви аджьын бзикви (ауыдква, алмастква, ашитанква, абнагIвква, апчагIвква) ыквбзазун. Ауат агIвычIвгIвыс йцхърагIун йа йызарархун. Апсабара йгIаннаршуз апхастаква ауагIа гвыгIвмыгIв гIарыланацIун, ауипхьадза апсабара акъару йазынархата ауат йапшым ацIасква щаквдыргылуан. ХIшхъвыцуала, апсабара гIаншараква рпахь дъакъарусызыз йгIалцIла агIвычIвгIвыс дгIащаквызыжьуаш амальква дырзыпшгIун.

Апсуаква рпны тотема квпшыра зму ахъвыцща сквшышвпхьадзарала йщаквгылан. Ауи ахъвыцщала ткъвымипхьадза рыщайдза йа псауышвхIакI, йа гIайыракI йапщылата йырпхьадзун, ауи квырмыш азырчпун, ныхахIвартата йынкъвыргун. Ари ахъвыцща уыжвгIандзара йынкъвыргауа аткъвымхьызквагьи йгIарныцIитI. Ажва ахъазла, аткъвымхьызква Аджьба, Джьанба, Джьопуа рыщата «аджь» («джь») ацIлахьыз «джьчIвы» гIанакIитI.

Апсны атурых аурала ауагIа йырхъмаштылуата рапхъанчIвиква рцIаскви рхабзакви нкъвыргун. Ужвы азаман йцIыхъвахауа асквшква руацIа ажвлара рбзазара апны змагIны рыцIа-рыцIа йалахIауа апсуаква рапхъанчIви дин гIащаквдыргылхуа йалагатI. Асквш 2012 агIан Абжьныха апны анчвахIвачIвыгIвчва (жрецы – Х.Б.) «Апсны апны анчвахIвачIвыгIвчва рсовет» жвлара гIандыршатI. Ауат хачIвыта рпахь йдыргылтI апсуаква рапхъанчIви дин гIащаквдыргылхта анкъвгара хабза щата амата йадыргалныс.

Синкретизм

Апсуаква рдиннкъвгара ацIасква рэтнокультура йахъвыкIта акIвын йызнымкIва апхьахьаква рырхъвыхра нхараква шырзынадырхуз. Ауаса авторква рщардагIв ргватра ауыс ахъатаква йадкIыламкIва, кIьыда-кIьыда йгIащтIырхуан: апхъанчIви диннкъвгара, акьристан диннкъвгара, суннит масхIаб йтагылу исльам диннкъвгара, ауасамцара. Барцыц Р. йшипхьадзауала, апсуаква рдиннкъвгара культура афеномен синкретизм турасы йтагылапI [3].

href=”file:///C:/Documents%20and%20Settings/1/%D0%9C%D0%BE%D0%B8%20%D0%B4%D0%BE%D0%BA%D1%83%D0%BC%D0%B5%D0%BD%D1%82%D1%8B/Downloads/%D0%AD%D0%9B%D0%AF%20%D0%A7%D0%B0%D1%81%D1%82%D1%8C%201.docx#_ftn3″>[3].

Апсуаква йапшым адинква чвалатшычпара гIарныпщуата йынкъвыргун, ауаса рапхъанчIвиква рдин анцIралагьи йазцIабыргын. АпхъанчIви диннкъвгара апны акьристан дин ахцIараквагьи рыщта алапI, араъагьи йгIадрысабаплитI ажва «Аминь». Акьристан кьлисаква аныхахIвартаква йраргванта йдыргылуан.

Апсуаква рапхъанчIви диннкъвгара хътIыпI, ауи акультура адунейла йауацIыху гIвдинкI ркультураква йдырбайатI. Барцыц Р. йшигIвуала, абараса хдинкI алалын уахьчIвала апсуаква рпны синкретизм квпшыра зму адиннкъвгара гIаншатI. Апсуаква зымгIвадзугьи айгвара рызбжьта йацнардаситI адиннкъвгара амш дуква – акьристан дин йачIвызтынгьи, динисльам йачIвызтынгьи, амаджьуси дин йачIвызтынгьи.

ЙгIарысабапу алитература:

  1. Барцыц Р.М. Адиннкъвгара уыхвараква йгьи ауыжвгIанчIви цIаснкъвгара йгIадырбауа апсуа диннкъвгара синкретизм. Монография. Москва, 2009.
  2. Джанашия Н. Апсуа диннкъвгара йгьи аунагIва бзазара ргIапсща. Анаукаква р-Академия атипография, 1917.
  3. Дзидзария Г.А. АмхIаджьыра йгьи Апсны атурыхдырра апны йжвежвхауа асквшышв йазынарху ауыс алачпаква. СогIвым, «Алашара», 1975.
  4. Димитрий Дбар (аиеромонах Дорофей): УыжвгIанчIви Апсны апны адиннкъвгара нархартаква. СогIвым, 2012.
  5. Габниа С.С. Апсуаква рапхъанчIви культура апны ахцIара квпшыраква рсистема.
  6. Инал-ипа Ш.Д. Апсуаква. СогIвым, «Алашара», 1965.
  7. Крылов А. Адиннкъвгари апсуаква рапхъанчIви цIаскви (апшыхвра-рхъвырхра материалква, асквшква 1994-2000). М., 2001.
  8. Татырба А. Апсны апны динисльам анкъвгара (атурыхзаман йалсуа ахъвыцща). 2008. Б.м.

Козлова Эльвира,

«Абаза Къраль» сайт йазалхпI.


Азгватра:

[1][1] Инал-ипа Ш.Д. Апсуаква. СогIвым, «Алашара», 1965, 569 ан.

[2][2] Инал-ипа Ш.Д. Апсуаква. СогIвым, «Алашара», 1965, 586 ан.

[3][3] Барцыц Р.М. Адиннкъвгара уыхвараква йгьи ауыжвгIанчIви цIаснкъвгара йгIадырбауа апсуа диннкъвгара синкретизм. Монография. Москва, 2009, 4 ан.

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki