Library

Шервашидзе-Чачба Александр Константин йпа – йапхъахауа апсуа суратчпагIв – асуратыгIвра арыпхьара дагIаныршагIвыта дырпхьадзитI. Апсуа ахIчва ртынха Чачба Александр асквш 1867 агIан Феодосия апны дйытI. Йшцазла, асквш 1866 агIан Апсны апны ауагIа тшгIащтIырхта акъральыгIва йанырпшIагыл ауи йаба дтырган ауаъа даъан. АсуратыгIвра зпхыцIаз ачкIвын, ага аршIыйара йгвы азыщтIазтынгьи, дайдзаркIвата ар къвырльыкъвхара даздрахIазыруан. ГIамтакI ауацIа ачкIвын Нижегородск апны акадетква ркорпус далата дырбжьун, дадрыпхьун. Йаба йагIамкIва адуней анихIваджь йцбахауа акласс дгIацIырдан Киев йбзазуз йан лпны дырщтихтI.

Асквш 1889 агIан Чачба Александр Киев апны аквтанай апхьарта дгIалгатI. Сквшы 24 дыртата йгвтара гIайыдахIвтI – суратгIврала, суратчпарала Москва йтагылаз аучилища дыцIалтI. Ахча ауысла ага дгIапсарыгьи дамайчуата агIарбартаква дрылалуан. ЙарыпхьагIвчва аршIыйара дшазычпаз гвы артын Париж апынгьи апхьара дцаныс йайбжьатI.
Париж апны Чачба зыхьыз бергьльыз арыпхьагIв Фернан Кормон йпны йъазара йалайырхIун, тшибжьун. Ажвлара данрылал Санкт-Петербург йауаз литератор щардагIв драбадыртI: Серов В., Бенуа А., Волошин М.А., датшагьи. Бенуа А.Н. йгIагвалашвахра гIвыра араса аницIатI: «Бальмонт йымщтахь рыцIа аргваныта йхIыщтаныкъвуз хIынбжьагIв бзи, швабыж йгIвычIвгIвыс гвапаз агьназ Шервашидзе Александр Константин йпа йакIвын. Ауи йтгIачва КIавкIаз апны апхъанчIви ахIчва, агIмыстачва йрыуан. Ага ауаса йаъазтынгьи, Александр йхъа ймырдыуата, дщаквкIыта дбзазун.
ЙгIважвахауа асквшышв агIаталымта Александр Константин йпа Санкт-Петербург дтабзазун. Асквш 1906 агIан Петербург йтагылаз аимператор йтеатр апны дизайнерта дынхарныс ддрайгватI. Ауи агIан Александр Константин йпа «Фауст» йгIвбахауа ахъвы суратла йанйыргIалныс йхъвдаквырцIатI. Асквш 1917 май мыз йгIашIарышвта Петроград акъральыгIва театрква дрконструктор хъадата ддыргылтI.
Асквш 1918 агIан Чачба йцриштала дгIацапахырныс йылшатI. СогIвым апны ауи театр труппа, драма ршIыйара ауысла апхьарта, чкIвынргIа рыхъазла ршIыйара студия гIанйыршатI. Чачба Александр йыршIыйара нхара тшанахауыргIвазара, агазет йа ажурнал гIвыраква уанрыпхьара ауи йгIважвахауа асквшышв ауацIа акультура апны ртшхъвара ду зквнагауа дышгIвычIвгIвысу уылаухIвитI.
СквшкъомкI руацIа апсуа суратгIвгIвы агIвымакъральква рпны дбзазун, дынхун, йцришта дгIацапах йызламуаш швхIаусыгIваквакI аъан. Асквш 1968 агIан сквшышвкI йныбыжьта Александр Константин йпа Монте-Карло апны адуней йхIваджьтI, Ницца апны йаныргIалу аурышв нышвынтара йадгьылхъвхатI. Йцришта ачIвыла дазынадзарныс шитахъу йцIыхъвахуз йахIваран, ауи ахIвара гьдмырхъйатI. Ужвы Апсны акъалаква раурамква Чачба Александр йыхьыз рхъарцIатI, ауи йчвахъабагата Апсны а-Банк рызна ахча гIацIнащттI. Асквш 1986 агIан СогIвым апны Александр Константин йпа йхьыз зхьзу ршIыйара апхьарта гIахъыртIытI. Асквш 1985 май мыз къральыгIва уыста йырчпан асуратчпагIв йнышвынтара СогIвымла йгIатдрыпахтI.

Квициниа Асида,
«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki