Library

Щардала ари сазхъвыцуан: йачIвыйищт ащхаква уанрызкIылпшуа вальс йгIахIвуазшва уыла йзгIацIалуа – зны псайспадза йгьагьасауа, зынгьи пшахъынхIвыта йхъванчуа, йгIазырхIвуа амакъымгьи упсы йалалуата улымхIа йгIатасуазшва? Йыздыруада, ащхаквагьи дара йырчIвдзу вальс макъым рымазапI… Дагвжвей Алексей йшгIасгвынйыргIвызла, амартан ауацIа ащха йгIахIвуазшва йанхъынхIвуа йхъарамкIва фачIвы гIанайаута йангIанагуа асхъан акIвпI. Ащха йнасгIасуа йгьагьасузтын афачIвгIалцIырта хъарата йаъапI.

Дагвжвей Алексей Хвмаран кыт дтабзазитI, ащхаква сквшы 30 райхIа йынкъвигитI, руысла йдыруа гьмачIым. ЗымгIва йдыритI хIхIварыквын гIващагIарахапI – ащхаква рбзазара ауи аъара мадза щарда апщылапIта. Йджьауымщушта йаъума ауат шынхауа, руыс шдырхъйауа? Анчва ащхаква агIвычIвгIвыс йыхъазла адуней йгIаквицIатI: цхата йазыркIкIуа апны швкIы йчпата ахъвыкI акIвпI йыззыбжу, арахьари зымгIва аугIа рхъа ахъазла йцIдрычIвитI. АгIвычIвгIвыс йыхъазла зарар гIазлыцIуа закIгьи ацха йгьнанауахвуам, авитаминква В-13, В-14 ацха акIвымкIва датша фачIвыкIгьи йгьалам.

Алексей йтгIачва йрыуата заджвгьи щха гьынкъвйымгузтI – йаба йакIвызтынгьи, йабаду йакIвызтынгьи. Йаргьи апхъала ауи йбзазара уысхушта дгьазымхъвыцуазтI, ага абазаква ари ауыс сквшышвпхьадзара цIуата йазъазазтынгьи. Ауаса апхъанчIви цIас быжьабанпаракI рымщтахь йатагIацапахуата рхIвитI.

Ауи Ленинград апны амшIкъапщы адынхалра йъазырбжьауа аучилища дгIалган дгIацапахтI. Йцришта апны ари аъачIвагIа йазынарху нхарта гьаъамызтI, хъарата зджьара дынхарныс йгвы дгьамгузтI. Абараса псайспадза ащхаква рынкъвгара уыс йзаргванхатI, амадзаква ййырдыртI.

Апхъапхъа ймартанква йунагIва апны йаныргIалын, ужвы ауат атирыпумцара йынкъвигитI. Ауи йыщхаква цха азыркIкIуа Светлоград адзхъа йалагитI, уадыргIвана ахIвра зигIваква ъащарду ахIагIараква рахьыла йгIайтыпауа йгIамгIвайситI. Ужвы ащхаква ачвахын йъашымту, ахIвра хъгIа ъащарду Хвмаран апсыхIва апны йгылапI. ЙхъгIачвата ащхаква йазыркIкIуа ацха ласы йтшытшытхитI, ауи ахIатырла Алексей ауат зынгьи семчкIа ъагIайуа архъаква рыдзхъа йгьйыргылуам. АмшIтIатIацIла йгIалырхуа ацха ахв дупI, ауаса ауат ацIлаква хIышта апны щардата йгьгIайуам, йара ауи акIвпI акацацIла ацхагьи ауыс зкву. АхIвра зигIваква йгIарылцIуа ацха сабапта йалугьи ауат йгьгIархьшвум. «Зъарайа хIвраквпшырата араъа йгIайуа, рыцIа сабап злу апкъыгIваква ракIвпI ащхаква ауат йгIархъырхуа», – йхIвитI Дагвжвей Алексей.

– СынчIва агIамта дахIврала йакIвшума? – ари азцIгIара йара-йара сыбыз йгIаквцIтI.
– Йайтыпауа ащхаква рыхъазла бзипIхIва гьузыхIвушым, ауаса азджьакI йшырпхьадзауала, мартанипхьадза цха килограмм 40 ануызгIатыхуа ауи хъахIара бзипI, – йджьауапхатI ауи.
– Ащхаква рбзазаща-аъащаква гIальаматрата йрылубгIауайа?

Ари азцIгIара аджьауап ангIаджвыквицIа цIхъва амчпауата йшауыру гIасгвынгIвытI. Абар гIальаматра злу пхьадзараквакI: цха мхIачIвакI ахъазла щха гIвышв хъвлагIандзакI ахIвраква йгIарыкIвшауа йазкIкIра атахъыпI, цха килограммкI ахъазла ащхаква хвынзкьны аныла-арыла йпссгIауамцара хIвра жвамильуанкI рпны йазкIкIра атахъыпI. Абари апш гIаншара гIальаматта ащхаква рбзазара йапщылу щардадзапI. Ауи аъара гIапсара шапщылугьи ацха ащхаква йгIадырхарджьуа апкъыгIваква зымгIва рацкIыс йпудпI.

Ащханкъвгара йапщылу ауысква рпны Алексей йъачIвагIа ангIайыхъвахуа щардапI: амшIпкъыгIваква зымгIва йара йнапIыла йрыхIазырхитI. СквшквакI рапхъала йапщылу амартанква гIайхъвыцын кIьыда-кIьыдата йчпакву рылайпсахтI.

Дагвжвей Алексей ащхаква уылапш рхъых йамуашта йызпхьадзаквауа рхъвыцща дгьадгылуам. Йара йшихIвауала, ащхаква дара рбзазара цIасква щаквгылапI, ауат ацIасква ууырдырта тшрыцучпара атахъыпI. Агъныла ащхаква рфачIви йрыжвуаш адзи рнархъара зымгIва йрапхъапI, йыргIапсару ацхагьи дара рыхъазла уайгьдзата амаль гьамам – ацха фачыгIвла йанупсахра йащтагIайуа агIамта апны зынла йамуата йгIарныпщитI.

Щха нкъвызгауа агIвычIвгIвыс ауат рпны пшвымата тшипхьадза гьауашым, ргIапсара пIатIу аквицIауата, «ргIахIвыща пшдза» апикъьара гьатахъым. Апсабара йгIарыланацIаз ацIасква ракIвпI ауат рбзазара злалу.

Дагвжвей Алексей йыхъазла хIапхъанчIвиква йгIартынхаз ари ауыс бзи джьащахъвапI, анцIрала йкъаругьи йдырраквагьи абгата йыздигалуа уыс пшдзата дазаъапI.

Ешерова Муъминат,
джурналистпI.

«Абаза Къраль» сайт йазалхпI

Поделиться в соц. сетях

Share to Google Buzz
Share to Google Plus
Share to LiveJournal
Share to MyWorld
Share to Odnoklassniki